አይሰይሳታ 15 - ጌሻ ማፃፋ

ሳምሶን ፍልስፄመታ ሀሎ ከይስ

¹ ጉ ዎደፐ ጉየ፥ ግስተ ጫካ ዎደ ሳምሶን ባ ማችዉ በአናዉ እስ ኡርገ ኮለ ኤክድ ብስ። ናኤ አዋኮ፥ “ታኒ ታ ማችያ ደእያ ክፍልያ ገላናዉ ኮያይስ” ያግስ። ሽን እ አዋይ እ ገሎናዳ ድግስ።

² እ አዋይ ሳምሶናኮ፥ “ኔኒ እዮ እፅዳባ ዳንን እዮ ነ ላዛንስ እማስ። ሽን እ፥ ካሎ ምችያ ኢፐ አዳ ማላ ሎኦ ግደኬ? እዮ ኤካ” ያግስ።

³ ሳምሶን፥ “ታኒ ሀእ ፍልስፄመ አሳ ቦላ ኢታባ ኦኮ ባላ ግድከ” ያግስ።

⁴ ሄሳፈ ጉየ፥ ብድ ሄ ፄቱ ዎርካናታ ኦይክድ ናምኣ ናምአ ጎይና እስፈ ጋ ቃችድ ጎይናታፐ ግዶን ፆምፐ ዎድ ቃችስ።

⁵ ፆምፕያን ታማ ኦይድ ቡሮ ጫከትቦና ፍልስፄመታ ካ ግዶ ዎርካናታ የድስ። ታማይ ጫከትዳ ካ፥ ኤቆን ደእያ ካ፥ ዎይንያነ ሻማሁዋ ምስ።

⁶ ፍልስፄመት፥ “ሀይሳ ኦዳይ ኦኔ?” ያግድ ኦይችዶሶና። አሳይ፥ “ሄሳ ኦዳይ ሳምሶና። ትምና አስ ግድዳ እያ ቦሎይ፥ እያ ማችዉ እያ ላዛንስ እምዳ ግሾ ሄሳ ኦስ” ያግዶሶና። ፍልስፄመት ብድ እዮነ እ አዋ ታማን ፁግዶሶና።

⁷ ሳምሶን ኤንታኮ፥ “ህንተ ሄሳ ኦዳ ግሾ ታ ሀሎ ከዮና አግከ” ያግስ።

⁸ እ ኤንታ ዎልቃማ ኢታ ሾች ሾጭድ ዳሮታ ዎስ። ሄሳፈ ጉየ ብድ፥ ኤታማ ጎንጎሉዋን ደእስ።

⁹ ፍልስፄመ አሳይ ይድ ይሁዳን ዱንካንድ ለሀ ካታማ ኦልስ።

¹⁰ ይሁዳ አሳይ፥ “አይስ ኑና ኦላናዉ ይደቲ?” ያግድ ኦይችዶሶና። ኤንቲ፥ “ኑኒ ሳምሶና ኦይክድ ቃቻናዉነ እ ኑ ቦላ ኦዳይሳዳ እያ ቦላ ኦናዉ ይዳ” ያግድ ዛርዶሶና።

¹¹ ያትን፥ ይሁዳፐ ሄ ሙኩሉ አሳይ ኤታማ ጎንጎሉዋ ብድ፥ ሳምሶና፥ “ኑና ሃረይ ፍልስፄመ ግደይሳ ኤርኪ? ያትን፥ ኑ ቦላ ሀይሳ መላ ፓላባ አይስ ኦይ?” ያግዶሶና። እ ዛሪድ፥ “ኤንቲ ታ ቦላ ኦዳይሳዳ ታንካ ኤንታ ቦላ ኦስ” ያግስ።

¹² ኤንቲ ዛሪድ፥ “ኑኒ ይዳይ ነና ቃችድ፥ ፍልስፄመታስ አድ እማናሳ” ያግዶሶና። ሳምሶን ዛሪድ፥ “ህንተ ኑ ነና ዎኮ ግድ ታዉ ጫቅተ” ያግስ።

¹³ ኤንቲ፥ “ኤሮ፥ ኑኒ ነና ቃችድ ኤንታዉ አድ እማናፐ አትሽን፥ ዎኮ” ያግድ ዛርዶሶና። ሄሳ ግሾ፥ ናምኡ ኦራ ዎዶሮን ቃችድ ጎንጎሉዋፐ ከስድ ኤፍዶሶና።

¹⁴ ሳምሶን ለሀ ብዳ ዎደ ፍልስፄመት ቡራቅሸ እያኮ ይዶሶና። ጎዳ አያናይ እያ ቦላ ዎልቃን ዎስ። እያ ኩሸይ ቃሸትዳ ዎዶሮይ ሻሎይ ታማ በእድ ዱፀረተይሳዳ ዱፀረት ዎስ።

¹⁵ ማታ ዎደ ሀይቅዳ ሀረ ጋጮ ደምድ፥ እያራ ሙኩሉ አስ ዎስ።

¹⁶ ሳምሶን፥ “ሀረ ጋጮን፥ አሀ ቦላ አሀ ዶራስ። ሀረ ጋጮን ሙኩሉ አስ ዎስ” ያግስ።

¹⁷ ሃሳያ ዉርስዳፐ ጉየ፥ ባ ኦይክዳ ጋጩዋ ሆልድ ሄ በሳ ራማት-ለሀ ያግድ ፄግስ።

¹⁸ ሳምሶን ዳሮ ሳሞትድ፥ “ኔኒ ሀይሳ መላ ግታ ፆኖ ታዉ ነ አይልያስ እማዳሳ። ያትን፥ ታኒ ሀእ ሳሞን ሀይቆ? ሀ ቃፃረቶና አሳ ኩሸን ዎ?” ያግድ ፆሳኮ ዋስስ።

¹⁹ ፆሳይ ለሀን ደእያ አፎ ካካ ጳልቅን እያፐ ሃ ከይስ። ሳምሶን ሄ ሃ ኡይድ አልዳ ዎደ እያዉ ሸምፖይ ስምስ። ሄሳ ግሾ፥ ሄ በሳ አይን-ሀቆረ ያግድ ፄግስ። ሄ በሳይ ሀች ጋካናዉ ለሀን ደኤስ።

²⁰ ፍልስፄመት ቢታ ሃርያ ዎደ ሳምሶን እስራኤለ ላታሙ ላይ አይስስ።