አይሰይሳታ 14 - ጌሻ ማፃፋ

ሳምሶን ማቾ ኤኩዋ

¹ እስ ጋላስ ሳምሶን ትምና ዎስ፤ ያን እስ ፍልስፄመ ጌላእዉ በእስ።

² እ ሶ ስሚድ ባ አዋነ ባ አይዉ፥ “ታኒ ትምናን እስ ፍልስፄመ ጌላእዉ በአስ፤ ሀእ እዮ ታዉ ኦይችድ እምተ” ያግስ።

³ ሽን እያ አዋነ አይያ፥ “ማቾ ኦይቻናዉ ሀ ቃፃረትቦና ፍልስፄመታኮ ባናዉ ነና አይ ኮሽዴ? ኑ ኮቻ ግዶን ዎይኮ ኑ አሳ ኡባ ግዶን ነዉ ሀንያ ማጫ ናአ ደማናዉ ዳንዳአብኪ?” ያግድ ኦይችዶሶና። ሽን ሳምሶን ባ አዋኮ፥ “ታኒ እዮ ዶስዳ ግሾ፥ እዮ ኦይቻዳ ታዉ እማ” ያግስ።

⁴ ፍልስፄመታ ኦላናዉ ጎዳይ ጋሶ ኮይድ፥ ሄሳ ኤንታ ቦላ ኦይሳ ሳምሶና አዋይነ አይያ ኤርቦኮና። ሄ ዎደ ፍልስፄመት እስራኤለታ ሃሮሶና።

⁵ ሳምሶን ባ አዋራነ ባ አየራ ትምና ዎስ። ኤንቲ ትምና ዎይነ ጋደ ማታራ ካንድ አያ ዎደ እስ ዎዳላ ጋሞይ ጉድሸ እያ ቦላ ከይስ።

⁶ ሄ ዎደ ጎዳ አያናይ ሳምሶና ቦላ ዎልቃን ዎስ፤ እ ዴሻ ማር ዱሰረይሳዳ ባ ኩሸን አይኮካ ኦይኮና ጋሙዋ ዱሰረ የግስ። ባ ኦዳይሳ ባ አዋስነ ባ አየስ ኦድቤና።

⁷ ሄሳፈ ጉየ ብድ ጌላእዉ ኦድስስ፤ እዮ ዶስስ።

⁸ ጉ ዎደፐ ጉየ እዮ ኤካናዉ ያ ስሚድ ብስ። ኦግያ ብሸ ባ ዎዳ ጋሞ ባዉታ በአናዉ ኦገፐ ጋፃ ከይድ ብያ ዎደ ጋሞ ባዉታ ግዶን ማ ኤስ ኤስዳይሳ በእስ።

⁹ ሄ ኤሳፈ ጉራ ቃንፅ ኤክድ ምሸ ኦግያ ብስ። ባ አዋነ ባ አይዉ ጋክድ፥ ባ ኦይክዳ ኤሳፈ ጉራ እምን፥ ኤንትካ ምዶሶና። ሽን ሳምሶን ሄ ኤሳ ጋሞ ባዉታ ግዶፈ ኤክዳይሳ ኤንታዉ ኦድቤና።

¹⁰ እያ አዋይ ጌላእዉ በአናዉ እ ሶ ብን፥ ሳምሶን ያን ግብራ ጊግስስ። ሄሳ መላ ግብራይ ያጋኖን ናአተት ኦያ ሜዘትዳ ዎጋ።

¹¹ ፍልስፄመ አሳይ እያ በእዳ ዎደ እያራ ጋምአና መላ ሀስታሙ ናአተታ ዶርድ የድዶሶና።

¹² ሳምሶን ኤንታ፥ “አነ ህንተ ኤርያኮ እስ ቃንእሸ ታ ህንተና ኦይቻና። ያጋኖይ ቦንቸትያ ላፑን ጋላሳ ግዶን ሀ ቃንእሽያ ብርሸ ታዉ ህንተ ኦድያባ ግድኮ ታኒ ህንተዉ ሀስታሙ ሊኖ አፍላነ ሀስታሙ ኩመ ማኦ እማና።

¹³ ሽን ህንተ ታዉ ብርሸ ኦዳናዉ ዳንዳኦና እፅኮ ህንተ ታዉ ሀስታሙ ሊኖ አፍላነ ሀስታሙ ኩመ ማኦ እሜታ” ያግድ ኦይችስ። ኤንቲ፥ “ኤሮ፥ ነ ቃንእሽያ ኑስ ኦዳ” ያግዶሶና።

¹⁴ እ፥ “መይሳፈ ሜተትያባይ በንትስ፤ ምኑዋ ጋርሳፈ ማልእያባይ ከይስ” ያግስ። ሄ ጋላስ ጋካናዉ ኤንቲ ቃንእሽያ ብርሻናዉ ዳንዳእቦኮና።

¹⁵ ኦይዳን ጋላስ ኤንቲ ሳምሶና ማችዉ፥ “ነ አዝና ጭማዳ ቃንእሽያ ብርሸ እ ኑስ ኦዳና መላ ኦ። ሄስ ሀኖና እፅኮ፥ ኑኒ ነናነ ነ አዋ ኬ ታማን ፁጋና። ህንተ ኑና ፄግዳይ ኑና ማንቅሳናሴ?” ያግዶሶና።

¹⁶ ያትን፥ ሳምሶና ማችያ ዬካሸ እያኮ ሺቃዳ፥ “ኔኒ ታና ዶሳካ፤ ነ ታና ዳሮ እፃሳ። ኔኒ ታ ቢታ አሳ ቃንእሸ ኦይቻዳ ብርሸ ታዉ ኦዳባካ” ያጋሱ። እ ዛሪድ፥ “ሄሳ ታኒ ታ አዋስነ ታ አየስ ኦዳብከ። ያትን፥ ነዉ አይስ ኦዶ?” ያግስ።

¹⁷ ያጋኖይ ቦንቸትያ ላፑን ጋላሳ ኡባን ዬካዳ ሸምፖ ድጋሱ። ላፑን ጋላስ ቃንእሽያ ብርሸ እዉ ኦድስ፤ እያ ባዳ ባ ቢታ አሳስ ኦዳሱ።

¹⁸ ያትን፥ ላፑን ጋላስ አው ዉላናፐ ስን ካታማ አሳይ፥ “ኤሳፈ አድ ማልእያባይ፥ ጋሞፈ አድ ምንያባይ አይቤ?” ያግድ ቃንእሽያ ብርሸ ኦድዶሶና። ሳምሶን ኤንታኮ፥ “ህንተ ታ ኡሰን ጎዮናባ ግድያኮ፥ ታ ቃንእሽያ ብርሸ ኤረከታሽን” ያግስ።

¹⁹ ሄሳፈ ጉየ፥ ጎዳ አያናይ እያ ቦላ ዎልቃን ዎን፥ አስቃሎና ዎድ፥ ሀስታሙ አስ ዎስ። ኤንታ ማኡዋ ቃር ኤክድ ቃንእሽያ ብርሽዳ አሳስ እሚስ። ሀንዳባ ኡባን ዳሮ ሸነትድ ባ አዋ ሶ ስምስ።

²⁰ ሳምሶና ማችያ ዋና ላዛን ግድዳ እያ ላግያስ እመታሱ።