አይሰይሳታ 13 - ጌሻ ማፃፋ

ሳምሶና የለተ

¹ እስራኤለ አሳይ ጎዳ ስንን ቃስካ ኢታባ ኦዶሶና። ያትን፥ ጎዳይ ኤንታ ኦይታሙ ላይ ፍልስፄመ አሳ ኩሸን አድ እሚስ።

² ሄ ዎደ ፆርአ ካታማን ማኑሄ ጌተትያ እስ አደይ ደኤስ። እ ዳነ ኮቸ፤ እያ ማችያ ማይን ግድዳ ግሾ እያዉ ናአ የላቡኩ።

³ እስ ጋላስ ጎዳ ኪታንቾይ ሄ ማጫሴስ ቆንጭድ፥ “ኔኒ ማይን፤ ነዉ ናእ ባዋ፤ ሽን ነ ቃንታና፤ አደ ናአካ የላና።

⁴ ሄሳ ግሾ፥ ዎይነ ዎይኮ ማይያ ኡሽ ኡዮና መላነ ቱናባ አይባካ ሞና መላ ናገታ።

⁵ ነ ቃንታዳ አደ ናአ የላና። ናአይ የለትዳ ዎድያፐ ዶምድ ፆሳስ ዱማትዳ ናዝራወ ግድያ ግሾ እያ ሁጵያ ሜዶፓ። እ እስራኤለ ፍልስፄመታ ኩሸፐ አሾ ዶማና” ያግስ።

⁶ ማጫስያ ባዳ፥ ባ አዝናስ ሀይሳዳ ያጋዳ ኦዳሱ፤ “እስ ፆሳ አስ ታኮ ይስ፤ እያ መይ ፆሳ ኪታንቾ መላ ዳሮ ያሼስ። እ አዉፐ ይዳኮ ታኒ እያ ኦይቻብከ፤ እካ ባ ሱን ታዉ ኦድቤና።

⁷ ሽን እ ታኮ፥ ‘ነ ቃንታና፤ አደ ናአ የላና። ናአይ የለትዳ ዎደፐ ዶምድ ሀይቃና ጋካናዉ ፆሳስ ዱማትዳ ናዝራወ ግድያ ግሾ ዎይነ ዎይኮ ማይያ ኡሽ ኡዮፓ፤ ቱናባካ ሞፓ’ ያግስ” ያጋሱ።

⁸ ሄሳፈ ጉየ፥ ማኑሄይ፥ “አቤት ጎዳዉ፥ ናአይ የለትያ ዎደ አይ ኦናዉ ኮሽያኮ ኤርሳና መላ ኔኒ ኪትዳ ፆሳ ኡራይ ኑኮ ስሚድ ያና መላ ኦርክ” ያግድ ጎዳ ዎስስ።

⁹ ፆሳይ ማኑሄ ዎሳ ስእስ። ማችያ ጋደን ኡትዳሽን ፆሳ ኪታንቾይ ናምአን ይስ፤ ሽን ሄ ዎደ እ አዝናይ ማኑሄይ ኢራ ዴና።

¹⁰ ማችያ ኤለሳዳ ባ አዝናኮ ባዳ፥ “ሄደ ታኮ ይዳ አደይ ሀች ታዉ ቆንጭስ” ያጋሱ።

¹¹ ማኑሄይ ኡትዳ በሳፈ ደንድድ፥ ባ ማችዉ ካል ብድ ኡራኮ፥ “ታ ማቸራ ኦደትዳይ ነኔ?” ያግድ ኦይችስ። ኡራይ፥ “ኤ፥ ታና” ያግስ።

¹² ማኑሄይ፥ “ኔኒ ኦድዳ ቃላይ ፖለትያ ዎደ የለታና ናኣ ደኡዋስነ ኦሱዋስ ዎጋይ አይቤ?” ያግድ እያ ኦይችስ።

¹³ ጎዳ ኪታንቾይ፥ “ነ ማችያ ታኒ ኦድዳ ኡባፈ ናገቶ።

¹⁴ ዎይነ ምፈ በንትያባ አይባካ ሞፖ፤ ዎይነ ዎይኮ ማይያ ኡሽ ኡዮፖ፤ ቱና ግድዳባ ሞፖ። ታኒ እዉ ኦድዳ ኡባ ኦ” ያግስ።

¹⁵ ማኑሄይ ጎዳ ኪታንቹዋኮ፥ “ኑኒ ነዉ እስ ኡርገ ዴሽ ሹክድ ጊግሳና ጋካናዉ ሀያና ጉ ጋምአርክ” ያግስ።

¹⁶ ጎዳ ኪታንቾይ፥ “ታኒ ጋምእያኮካ ነ ካ ሚከ። ሽን ኔኒ ፁሳ ያርሾ ጊግሳናዉ ኮይኮ፥ ጎዳስ ያርሻናዉ ዳንዳኣሳ” ያግስ። እ ጎዳ ኪታንቾ ግደይሳ ማኑሄይ ኤርቤና።

¹⁷ ማኑሄይ ጎዳ ኪታንቹዋኮ፥ “ኔኒ ኦድዳ ቃላይ ፖለትያ ዎደ ኑኒ ነና ቦንቻና መላ ነ ሱንይ ኦኔ?” ያግድ ኦይችስ።

¹⁸ ጎዳ ኪታንቾይ፥ “ነ ታ ሱን አይስ ኦይቻይ? ታ ሱንይ ማላልሰይሳ” ያግድ ዛርስ።

¹⁹ ማኑሄይ ኡርገ ዴሽነ ካ ያርሹዋ ኤክድ ሹቻ ቦላ ጎዳስ ያርሽስ። ማኑሄይነ እያ ማችያ ፄልሽን፥ ጎዳይ ማላልስያባ ኦስ።

²⁰ ያርሾ በሳፈ ታማ ላጮይ ፑደ ላፅድ ከይሽን፥ ጎዳ ኪታንቾይ ታማ ላጩዋ ግዶራ ሳሎ ከይስ። ማኑሄይነ እያ ማችያ ሄሳ በእድ ሶምኦራ ሳአን ጉፋንዶሶና።

²¹ ጎዳ ኪታንቾይ ማኑሄስነ እያ ማቼስ ዛር በንቶና አግን፥ ማኑሄይ እ ጎዳ ኪታንቾ ግድዳይሳ ሄ ዎደ አኬክስ።

²² ማኑሄይ ባ ማቸኮ፥ “ኑኒ ፆሳ በእዳ ግሾ ሀይቃና” ያግስ።

²³ ሽን እያ ማችያ፥ “ጎዳይ ኑና ዎናዉ ኮይዳባ ግድያኮ፥ ፁሳ ያርሹዋነ ካ ያርሹዋ ኑፐ ኤከና ዎይኮ ሀ ኡባ ኑና በሰና ዎይኮ ሀይሳ ኑስ ኦደና” ያጋዳ ዛራሱ።

²⁴ ማችያ አደ ናአ የላሱ፤ እያ ሱን ሳምሶና ጋዳ ፄጋሱ። ናአይ ድጭስ፤ ጎዳይካ እያ አንጅስ።

²⁵ ናአይ ፆርአፈነ ኤሽታኦላፐ ግዶን ደእያ ዳነ ጉታን ደእሽን ጎዳ አያናይ እያ ደን ዶምስ።