አይሰይሳታ 11 - ጌሻ ማፃፋ

¹ ጋላዳ ቢታን ደእያ ዮፍታሄይ ምኖ ኦላንቾ። እያ አዋ ሱንይ ጋላዳ፤ ሽን እያ አይያ ላይማ ማጫስ።

² ጋላዳ ማችያ እያዉ አደ ናይታ የላሱ። ኤንቲ ድጭድ ጋክዳ ዎደ ባንታ እሻ ዮፍታሄ፥ “ኔኒ ሀራ ማጫሳፐ የለትዳ ናአ ግድያ ግሾ ኑ አዋ አቁዋፐ አይኮካ ላታካ” ያግድ ሶፐ የደዶሶና።

³ ያትን፥ ዮፍታሄይ ባ እሻታፐ ባቃትድ፥ ቶባ ቢታን ደእስ። ያን እ ደእሽን ጉ ዎራንት እያኮ ሺቅድ እያ ካልዶሶና።

⁴ ጉ ዎደፐ ጉየ አሞነት እስራኤለታራ ኦለትዶሶና።

⁵ አሞነት እስራኤለታራ ኦለትዳ ዎደ ጋላዳ ቢታ ጭማት ቶባፐ ዮፍታሄ ዛሪድ ኤሀናዉ ብዶሶና።

⁶ ኤንቲ እያኮ፥ “አሞነታ ኑኒ ኦላና መላ ያዳ ኑስ ሀላቃ ግዳ” ያግዶሶና።

⁷ ሽን ዮፍታሄይ፥ “ታና እፅድ፥ ታ አዋ ኬፈ የደቤከቲ? ሀእ ህንተና መቶይ ጋክን ታኮ አይስ ይደቲ?” ያግስ።

⁸ ጋላዳ ጭማት፥ “ግዶሽን ሀእ ኑኒ ኔኮ ስምዳ፤ ኔኒ ኦላ ካለዳ አሞነታ ኑስ ኦላና መላነ ጋላዳ ቢታስ ሀላቃ ግዳና መላ ኮዮስ” ያግዶሶና።

⁹ ዮፍታሄይ፥ “አሞነታራ ኦለታና መላ ህንተ ታና ጉየ ዛርን፥ ጎዳይ ኤንታ ታ ኩሸን አድ እምኮ፥ ህንተ ቱማ ታና ሀላቃ ኦኔ?” ያግስ።

¹⁰ ጋላዳ ጭማት፥ “ጎዳይ ኑ ግዶን ማርካ፤ ኔኒ ግያባ ኑ ኦና” ያግዶሶና።

¹¹ ዮፍታሄይ ጋላዳ ጭማታራ ብስ፤ ኤንቲ እያ ባንታ ሀላቃነ ካለይሳ ኦዶሶና። ዮፍታሄይ ምፅጳን ጎዳ ስንን ዛሪድ ቃላ ገልስ።

¹² ዮፍታሄይ አሞነ ካዋኮ አሰ ኪትድ፥ “ኔኒ ኑ ቢታ ኦላና መላ ኑኒ ነዉ አይ ኦዶ?” ያግድ ኦይችስ።

¹³ አሞነ ካዎይ ዮፍታሄይ ኪትዳ አሳኮ፥ “እስራኤለ አሳይ ግብፀፈ ከይዳ ዎደ አርኖና ሻፋፐነ ያቦቃ ሻፋፐ ግዶን፥ ዮርዳኖሰ ሻፋ ጋካናዉ ደእያ ታ ቢታ ኤክዶሶና። ሀእ ታ ቢታ ታዉ ሳሮን ዛርተ” ያግድ ዛርስ።

¹⁴ ዮፍታሄይ ናምአን አሞነ ካዋኮ አሰ ኪትስ።

¹⁵ ኪተትዳ አሳይ፥ “እስራኤለ አሳይ ሞአበ ቢታ ዎይኮ አሞነ ቢታ ኤክቤና።

¹⁶ እስራኤለ አሳይ ግብፀፈ ከይዳ ዎደ ባዞ ካን ብድ፥ ዞኦ አባ ጋክስ፤ ያፐ ቃደሳ ብስ።

¹⁷ እስራኤለ አሳይ ኤዶመ ካዋኮ፥ ‘ነ ቢታራ ኑና አርኪ?’ ያግድ አሰ ኪትስ፤ ሽን ኤዶመ ካዎይ አና እፅስ። ሄሳዳካ፥ ሞአበ ካዋኮ ኪትን፥ እካ አና እፅስ፤ ያትን፥ እስራኤለ አሳይ ቃደሳን ጋምእስ።

¹⁸ “ዉርሰን ኤንቲ ባዙዋ ካንድ፥ ኤዶመነ ሞአበ ቢታ ጋፃ ኦይክድ፥ ሞአበ ቢታፈ ዶሎሀ ባጋራ ይድ አርኖና ሻፋፐ ሄፍን ባጋን ዱንካንዶሶና። ሽን አርኖና ሻፋይ ሞአበ ዛዋ ግድዳ ግሾ ሞአበ ባጋ ፕንቦኮና።

¹⁹ “ሄሳፈ ጉየ፥ እስራኤለ አሳይ ሀሰቦና ካታማን ደእያ አሞረታ ካዋ ስሆናኮ አሰ ኪትድ፥ ‘ሀያና፥ ነ ቢታራ ኑና አርክ’ ያግድ ኦይችስ።

²⁰ ሽን ስሆነይ እስራኤለ አሳ አማነቶና ግሾ አናዉ ኮይቤና። እ ባ ኦላንቾታ ኤክድ ያሃፃን ዱንካንድ እስራኤለ አሳ ኦልስ።

²¹ ጎዳይ እስራኤለ ፆሳይ ስሆናነ እያ ኦላንቾታ እስራኤለ አሳ ኩሸን አድ እምን፥ ኤንታ ፆንዶሶና። ያን ደእያ አሞረታ ቢታ ኡባ ላትዶሶና።

²² አርኖና ሻፋፐ ብድ ያቦቃ ሻፋ ጋካናዉ፥ ባዙዋፈ ብድ ዮርዳኖሰ ሻፋ ጋካናዉ ደእያ አሞረታ ቢታ ኡባ ኤክዶሶና።

²³ “ሄሳዳ ኦድ ጎዳይ፥ እስራኤለ ፆሳይ ባ አሳ እስራኤለ ስንፈ አሞረታ የደድ ይስስ። ያትን፥ ኔኒ ዛራዳ ነዉ ኤካናዉ ዋታ ቆፓይ?

²⁴ ኔኒ ነ ፆሳይ ካሞሽ ነዉ እመይሳ ኤክኪ? ሽን ኑኒ፥ ጎዳይ ኑ ፆሳይ ኑስ እምዳባ ኡባ ላትድ ዳና።

²⁵ ግዶሽን ኔኒ ስፎራ ናኣ፥ ሞአበ ካዋ ባላቃፐ ምናይ? እ እስራኤለ አሳራ ኦየትደ ዎይኮ ኦለትዴ?

²⁶ እስራኤለ አሳይ ሀሰቦና፥ አሮኤራነ ኤንታ ዩሹዋን ደእያ ጉታታ ኡባ፥ ቃስ አርኖና ሻፋ ማታን ደእያ ካታማታ ኡባ ላትድ ሄ ፄቱ ላይ ደእስ። ያትን፥ ሄ ዎደ አይስ ዎ ኤካብኪ?

²⁷ ታኒ ህንተና አይኮካ ቆሀብከ፤ ሽን ታና ኦላናዉ ደንዳዳ ናቀይ ነና። ፕርድያ ጎዳይ ሀች እስራኤለፐነ አሞነፐ ግዶን ፕርዶ” ያግስ።

²⁸ ሽን ዮፍታሄይ ኪትዳ ኪታ አሞነታ ካዎይ ስኦና እፅስ።

²⁹ ሄ ዎደ ጎዳ አያናይ ዮፍታሄ ቦላ ዎን፥ ጋላዳነ ምናሰ ቢታ ካን ብድ፥ ጋላዳ ቢታን ደእያ ምፅጳ ስምስ። ያፐ ኦላንቾታ ካለድ አሞነ ቢታ ብስ።

³⁰ ዮፍታሄይ ጎዳስ ቃንገትድ፥ “ኔኒ አሞነታ ታ ኩሸን አዳ እምኮ፥

³¹ ታኒ ኦላ ፆናዳ ሶ ስምያ ዎደ ታና ሞካናዉ ታ ሶፐ ከይያ አይብካ ኔሳ፤ ታኒ እያ ፁግያ ያርሾ ኦዳ ነዉ ሺሻና” ያግስ።

³² ሄሳፈ ጉየ፥ ዮፍታሄይ አሞነታ ኦላናዉ ዛዋ ብን፥ ጎዳይ ኤንታ እያ ኩሸን አድ እሚስ።

³³ አሮኤራፐ ብድ ምንታነ አቤል-ክራምማ ጋካናዉ ደእያ ላታሙ ካታማታ ኦልድ ይስስ፤ ዳሮ አሳ ዎስ። ሄሳፈ ጉየ፥ አሞነት እስራኤለታስ ሃረትዶሶና።

³⁴ ዮፍታሄይ ባ ሶ ምፅጳ ስምያ ዎደ እያ ናእያ ካራቦ ኦይካዳ የፃሸነ ዱራሸ እያ ሞካናዉ ከያሱ። እያዉ ኢፐ አትሽን፥ ሀራ ናእ ባዋ።

³⁵ እ እዮ በእዳ ዎደ አዛንድ ባ ማኡዋ ዳክድ፥ “ሀይ ታ ናተ! ታና ካዉሻዳሳ፤ ታና መቶን የጋዳሳ። ታኒ ጎዳስ ቃንጋስ፤ ጋና አጋናዉ ዳንዳእከ” ያግስ።

³⁶ ናእያ፥ “ታ አዋዉ፥ ኔኒ ጎዳስ ቃንግዳባ ግድኮ፥ ጎዳይ ነ ሞርከታ፥ አሞነታ ቦላ ኔኒ ሀሎ ከይዳ ግሾ ነ ቃንግዳባ ታ ቦላ ፖላ” ያጋሱ።

³⁷ ሽን እያ ባ አዋኮ፥ “ታዉ እስባ ኦርክ። ታኒ አዝና ገሎና አትያ ግሾ፥ ታ ላገታራ ባዳ ዙማ ቦላ ታ ጌላኦተስ ዬካና መላ ናምኡ አጌናስ ታና የዳርክ” ያጋዳ ኦይቻሱ።

³⁸ እ፥ “ባ” ያግድ፥ ናምኡ አጌናስ እዮ የድስ። እያ ባ ላገታራ ዙማ ቦላ ከያዳ ባ ጌላኦተስ ኤንታራ ዬካሱ።

³⁹ ናምኡ አጌናፐ ጉየ፥ ባ አዋኮ ስማዳ ያሱ። እ አዋይ ጎዳስ ቃንግዳ ባ ቃንገ ጋስ፤ እያ ጌላኦሽን ሀይቃሱ። ሄ ዎደፐ ዶምድ፥

⁴⁰ እስራኤለ ማጫ ናይት ላይን ላይን ኦይዱ ጋላስ ባንታ ሶፐ ሃክ ብድ፥ ጋላዳ አድያ ዮፍታሄ ናኤስ ዬከይስነ ካዮተይስ ሜዘ ግድስ።