አይሰይሳታ 10 - ጌሻ ማፃፋ

ቶላ

¹ አብመለከይ ሀይቅዳፐ ጉየ፥ ይሳኮራ ኮቸ ግድዳ ዶዳ ናኣ፥ ፑሀ ናአይ ቶል፥ እስራኤለ አሳ አሻናዉ ደንድስ። እ ደረይ ዳርያ ኤፍሬማ ቢታን ሳምራን ደእስ።

² ቶል እስራኤለ አሳ ላታማነ ሄ ላይ አይስስ። ቶል ሀይቅድ፥ ሳምራን ሞገትስ።

ያእራ

³ ቶላፐ ካልድ፥ ጋላዳ አደይ ያእር ደንድስ። እ እስራኤለ አሳ ላታማነ ናምኡ ላይ አይስስ።

⁴ እያዉ ሀስታሙ ባቁሎ ቶግያ ሀስታሙ አደ ናይት ደኦሶና። ኤንታዉ ጋላዳ ቢታን ሀስታሙ ካታማት ደኦሶና። ሄ ካታማት ሀች ጋካናዉ ያእራ ካታማታ ጌተትድ ፄገቶሶና።

⁵ ያእር ሀይቅድ ቃሞናን ሞገትስ።

ዮፍታሄ

⁶ ቃስካ እስራኤለ አሳይ ጎዳ ስንን ኢታባ ኦዶሶና። ኤንቲ ባኣለነ አስታሮታ ኤቃታ፥ ሶረ ፆሳታ፥ ስዶና ፆሳታ፥ ሞአበ ፆሳታ፥ አሞነ ፆሳታነ ፍልስፄመ ፆሳታ ጎይንዶሶና። ኤንቲ ጎዳ አጋግዶሶና፤ እያ ጎይንቦኮና።

⁷ ጎዳይ እስራኤለ አሳ ቦላ ሀንቀትድ፥ ኤንታ ፍልስፄመ አሳስነ አሞነ አሳስ አድ እሚስ።

⁸ ሄ ላይ ፍልስፄመትነ አሞነት እስራኤለ አሳ ኡንኤዶሶና። ዮርዳኖሰ ሻፋፐ ዶሎሀ ባጋን፥ አሞረት ካሰ ደእዳ ጋላዳ ቢታን ደእያ እስራኤለ አሳ ኤንቲ ታማነ ሆስፑን ላይ ሃርዶሶና።

⁹ ቃስካ አሞነ አሳይ ይሁዳ፥ ብንያመነ ኤፍሬማ ኮቻታ ኦላናዉ ዮርዳኖሰ ሻፋ ፕንዶሶና፤ እስራኤለ አሳይ ዳሮ ኡንኤትዶሶና።

¹⁰ ሄሳፈ ጉየ፥ እስራኤለ አሳይ፥ “ኑኒ ነና ኑ ፆሳ አግድ፥ ባኣለ ጎይንድ፥ ናጋራ ኦዳ” ያግድ ጎዳኮ ዋስዶሶና።

¹¹ ጎዳይ ኤንታኮ፥ “ግብፀት፥ አሞረት፥ አሞነት፥ ፍልስፄመት፥

¹² ስዶናት፥ አማለቃትነ ሞኣነት ህንተና ኡንኤን፥ ህንተ ታኮ ዋስን፥ ታኒ ህንተና ኤንታ ኩሸፐ አሻብክና?

¹³ ሽን ህንተ ታና አግድ ሀራ ፆሳታ ጎይንደታ፤ ህዛፐ ታኒ ህንተና አሽከ።

¹⁴ ብድ ህንተ ዶርዳ ፆሳኮ ዋስተ። ህንተና መቶይ ጋክያ ዎደ አነ ኤንቲ አሾ” ያግድ ዛርስ።

¹⁵ ሽን እስራኤለ አሳይ ዛሪድ ጎዳኮ፥ “ኑኒ ናጋራ ኦዳ። ነ ኮይዳባ ኑ ቦላ ኦ፤ ሽን ሀያና ሀች ኑና አሻ” ያግዶሶና።

¹⁶ አላጋ ፆሳታ ባንታ ግዶፈ ድግድ፥ ጎዳ ጎይንዶሶና። ጎዳይ እስራኤለ አሳ ኡንኤተ በእድ ምሸትስ።

¹⁷ ሄሳፈ ጉየ፥ አሞነ ኦላንቾት ኦላስ ጊግድ፥ ጋላዳን ሺቅዶሶና። እስራኤለ አሳይ እስፈ ሺቅድ ጋላዳን ምፅጳን ዱንካንዶሶና።

¹⁸ ጋላዳ ቢታ ሀላቃት ባንታ ግዶን፥ “አሞነ ኦላንቾታራ ኮይሮትድ ኦላ ጋሄታናይ ኦኔ? ሄ አደይ ጋላዳ ቢታን ደእያ አሳ ኡባስ ሀላቃ ግዳና” ያግዶሶና።