Iyyasu 9 - ጌሻ ማፃፋ

ጋባኦናታ ጭሙዋ

¹ ዮርዳኖሰ ሻፋፐ ዉሎሀ ባጋን ደረይ ዳርያ ቢታንነ ጋን መደትራነ አባፈ ብድ ልባኖሰ ጋካናዉ ደእያ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ካዎት ኡባይ፥ ጋየ አሳይ ፆነትዳይሳ ስእዳ ዎደ፥

² እያሱነ እስራኤለታ ኦላናዉ እስፈ ሺቅድ ዞረትዶሶና።

³ ጋባኦና አሳይ እያሱይ እያርኮ ቦላነ ጋየ ካታማ ቦላ ኦዳባ ስእድ፥

⁴ እያሱ ጭማናዉ ኮይዶሶና። ኤንቲ ሽንቀ ቃችድ፥ ጭማ ዎይነ ኦጎሮነ ጩርቃ ቃርፂቴ ሀረ ቦላ ጫንድ፥ እያሱኮ አሰ ኪትዶሶና።

⁵ ኪተትዳ አሳት ዉርዳ ጫማ አዶሶና፤ ፔትዳ አፍላ ማእዶሶና፤ ኤንቲ ኦይክዳ ሽንቀይካ መልዳባነ መቀርትዳባ።

⁶ ኤንቲ እስራኤለ አሳይ ዱንካንዳ ጉታ ጋልጋላ ብድ፥ እያሱኮነ እስራኤለ አሳኮ፥ “ኑኒ ሃሆ ጋደፐ ይዳ። ኑ ይዳይ ህንተራ ጫቀትድ ሳሮ ዳናሳ” ያግዶሶና።

⁷ ያትን፥ እስራኤለ አሳይ ጋባኦነ አሳኮ፥ “ህንተ ኑ ማታን ደእያ አሰኮሽ? ኑ አይብን ኤርድ ህንተራ ጫቀታኔ?” ያግዶሶና።

⁸ ኤንቲ እያሱኮ፥ “ኑ ነ አይለታ” ያግድ ዛርዶሶና። እያሱይ ዛሪድ፥ “ህንተ ኦናንቴ? አዉፐ ይደቲ?” ያግድ ኦይችስ።

⁹ ኤንቲ ዛሪድ፥ “ኑኒ ነ አይለት ጎዳይ ህንተ ፆሳይ ግብፀን ኦዳይሳ ስእዳ ግሾ፥ ዳሮ ሃሆ ጋደፐ ይዳ።

¹⁰ ቃስ ዮርዳኖሰ ሻፋፐ ሄፍንን ዉሎሀ ባጋን ደእያ ናምኡ አሞረ ካዎታ፥ ሀሰቦና ካዋ ስሆናነ አስታሮተን ደእያ ባሳነ ካዋ ኦገ ቦላ እ ኦዳይሳ ኑ ስእዳ።

¹¹ ኑ ቢታ ጭማትነ ኑ ቢታን ደእያ ኡባይ፥ ኦገስ ሽንቀ ጊግስ ኦይክድ ብድ ኤንታራ ጋሄትድ፥ ኤንታኮ፥ ‘ኑ ህንተ አይለታ፤ ኑ ይዳይ ህንተራ ጫቀትድ ሳሮ ዳናሳ’ ያግተ።

¹² “ኑ ኦይክዳ ሽንቅያ በእተ። ኑ ሶፐ ኤክድ ከይያ ዎደ ሆኦ፥ ሽን ሀእ መልዳይሳነ ፑሉምዳይሳ በእተ።

¹³ ሀ ዎይንያ ኦጎሮታን ኑ ኩንያ ዎደ ኦራ፥ ሽን ሀእ ዳከትዳይሳ በእተ። ኦግያ ሃሆተፈ ደንዶይሳን ኑ ማኦይነ ኑ ጫማይ ዉርስ” ያግዶሶና።

¹⁴ ሽን ጎዳ ሸንያ ኦይቾና ደእሸ፥ እስራኤለ አሳይ ኤንታ ሽንቅያፈ ጉራ ኤክዶሶና።

¹⁵ ያትን፥ እያሱይ ህንተና ዎኮ ግድ ሳሮ ጫቆ ኤንታራ ጫቀትስ። እስራኤለ ጭማትካ ሄ ጫቁዋ መንኮ ግድ ጫቅዶሶና።

¹⁶ ኤንታራ ጫቅዳ ሄን ጋላሳን ሄ አሳት ኤንታ ቢታን ደኤይሳነ ኤንታዉ ሾሮ ግደይሳ እስራኤለ አሳይ ስእዶሶና።

¹⁷ እስራኤለ አሳይ ሄ ጋላስ ሄመትድ፥ ሄ አሳት ደእያ ካታማታ ጋክዶሶና። ኤንታ ካታማት ጋባኦና፥ ካፍራ፥ ባሮተነ ቅርያት-ይኣርማ ጌተትድ ፄገቶሶና።

¹⁸ ሽን እስራኤለ ጭማት ኤንታዉ ጎዳ፥ እስራኤለ ፆሳ ሱንን ጫቅዳ ግሾ፥ እስራኤለ አሳይ ኤንታ ዎቦኮና። ያትን፥ አሳ ኡባይ ጭማታ ቦላ ዙዙምዶሶና።

¹⁹ ሽን እስራኤለ ጭማት፥ “ኑ ኤንታዉ ጎዳ እስራኤለ ፆሳ ሱንን ጫቅዳ ግሾ፥ ሀእ ኤንታ ቦቻናዉ ዳንዳኦኮ።

²⁰ ኑኒ ኤንታዉ ሀይሳዳ ኦና፤ ኑኒ ኤንታዉ ጫቅዳ ጫቁዋ መንን ጎዳ ሀንቆይ ኑ ቦላ ዮናዳ ኤንታ ዎኮ።

²¹ ኤንቲ ደኦ ጊተ። ግዶሽን እስራኤለ አሳ ኡባስ ምነ ሃ ሺሸይሳታ ግዶ” ያግዶሶና። ሄሳ ግሾ፥ ጭማት ባንታ ጫቁዋ ናግዶሶና።

²² እያሱይ ጋባኦና አሳ ፄግድ፥ “ኑ ማታን ደእሸ፥ ‘ኑኒ ዳሮ ሃሆ ቢታፈ ይዳ’ ግድ፥ ኑና አይስ ጭምደቲ?

²³ ህንተ ሄሳ ኦዳ ግሾ፥ ባደትዳይሳታ። ህንተ መርናዉ ታ ፆሳ ኬን ምነ ሃ ሺሽያ አይለ ግዳና” ያግስ።

²⁴ ኤንቲ ዛሪድ፥ “ኑኒ ነ አይለት፥ ጎዳይ ህንተ ፆሳይ ሀ ቢታን ደእያ አሳ ኡባ ይስድ፥ ቢታ ህንተዉ እማናዉ ባ አይልያ ሙሰስ ኦድዳይሳ ስእዳ። ሄሳ ግሾ፥ ህንተዉ ባብድ ሀይሳ ኦዳ።

²⁵ ሀእ ኑኒ ነ ኩሸን ደኦስ። ነዉ ሎኦነ ሱረ ዳንድ በንትዳባ ኦ” ግድ ዛርዶሶና።

²⁶ እያሱይ እስራኤለ አሳይ ኤንታ ዎና መላ አሽስ።

²⁷ ሄ ጋላስ እያሱይ፥ ጋባኦና አሳታ እስራኤለታስነ ጎዳይ ዶርዳ በሳን ደእያ እያ ያርሾ በሳስ ሃነ ም ሺሽያ አስ ግዳና መላ ኦስ። ጋባኦና አሳት ሀች ጋካናዉ ሄሳ ኦሶና።