Iyyasu 8 - ጌሻ ማፃፋ

ጋየ ካታማ ኩንደ

¹ ጎዳይ እያሱኮ፥ “ያዮፋ፤ ህርጎፋ፤ ኦላንቾታ ኡባ ኔራ ኤካዳ፥ ጋየ ካታማ ኦላናዉ ከያ። ጋየ ካዋ፥ እያ አሳ፥ እያ ካታማነ እያ ቢታ ታ ነ ኩሸን አዳ እማስ።

² ኔን እያርኮ ቦላነ እያ ካዋ ቦላ ኦዳይሳዳ ጋየ ቦላነ እያ ካዋ ቦላ ኦና። ሽን ህንተ ሀእ ኦልድ ድእያ ሻሎነ መሄ ህንተዉ ኤክተ። ካታማፐ ጉየ ባጋራ ቆፖና መን ገላናዉ ጊገታ።”

³ ሄሳ ግሾ፥ እያሱይነ ኦላንቾት ኡባይ፥ ጋየ ካታማ ኦላናዉ ደንድዶሶና። እያሱይ ባ ኦላንቾታ ግዶፈ ሀስታሙ ሙኩሉ ግድያ ምኖ ኦላንቾታ ዶርድ ቃማ የድሸ፥

⁴ ኤንታና ሀይሳዳ ያግድ ኪትስ፤ “ብድ ካታማፐ ጉየ ባጋራ ቆሰትድ ናግተ። ካታማፐ ሃክድ ቦናሽን፥ መን ገላናዉ ጊግድ ናግተ።

⁵ ታነ ታራ ደእያ አሳ ኡባይ፥ ካታማኮ ሺቃና። ሄ ዎደ ጋየ ካታማ አሳይ ኑና ኦላናዉ ያ ዎደ ካሰይሳዳ ኑ ኤንታ ስንፈ ጉየ ስሚድ ባቃታና።

⁶ ኤንቲ ከሰይሳዳ ኑ ኤንታ ስንፈ ባቃትያ ዳንን፥ ኑፐ ባቃቶሶና ግድ፥ ካታማፐ ኑ ኤንታ ሃሳና ጋካናዉ ኑና ካላና።

⁷ ሄ ዎደ ህንተ ቆሰትዳ በሳፈ ከይድ ካታማ ኦይክተ። ጎዳይ ህንተ ፆሳይ ካታማ ህንተ ኩሸን አድ እማና።

⁸ ካታማ ኦይክዳፐ ጉየ፥ ጎዳይ ኪትዳይሳ መላ ታማን ፁግተ። ታ ህንተና ኪታስ” ያግስ።

⁹ ሄሳፈ ጉየ እያሱይ ኦላንቾታ ኪትስ። ኤንቲ ብድ ጋየ ካታማፐ ዉሎሀ ባጋን ቤተለፐነ ጋየፐ ግዶን ቆሰትድ ናግዶሶና። ሽን እያሱይ ሄ ቃማ አሳራ አቅስ።

¹⁰ ዎንተ ጋላስ ጉራ እያሱይ ደንድድ፥ ኦላንቾታ ፄግስ። ያትድ፥ እነ እስራኤለ ጭማት ኦላንቾታ ካለድ ጋየ ካታማ ብዶሶና።

¹¹ እያራ ደእያ ኦላንቾት ኡባይ፥ ስን ብድ ጋየ ካታማ ማትድ፥ ካታማፐ ፑደሀ ባጋን ዱንካንዶሶና። ኤንታፈነ ጋየ ካታማፐ ግዶን ዛንጋር ደኤስ።

¹² እያሱይ እቻሹ ሙኩሉ ኦላንቾታ ዶርድ፥ ካታማፐ ዉሎሀ ባጋራ፥ ቤተለፐነ ጋየፐ ግዶን ቆስድ ዎስ።

¹³ ኦላንቾታፐ ባጋ ካታማፐ ፑደሀ ባጋራ፥ ቃስ ካታማ መንድ ገላና ኦላንቾታ ዉሎሀ ባጋራ በሰ በሰ ኦይስ። ሄ ቃማ እያሱይ ሄ ዛንጋራን አቅስ።

¹⁴ ጋየ ካታማ ካዎይ ሄሳ በእዳ ዎደ፥ ባ ኦላንቾታ ኡባ ኤክድ፥ እስራኤለ አሳራ ኦለታናዉ ደምባ ቢታ ከይዶሶና። ሽን ካዎይ ካታማፐ ጉየ ባጋራ ቆሰት ኡትዳ ኦላንቾት ደኤይሳ ኤርቤና።

¹⁵ እያሱይነ እስራኤለ አሳ ኡባይ ፆነትዳባ ዳንድ፥ ኤንታ ስንፈ መላ ቢታ ስሚድ ባቃትዶሶና።

¹⁶ ጋየ ካታማን ደእያ አሳ ኡባይ፥ ኤንታ የደናዉ ፄገረት ከይድ፥ እያሱ ጎድሸ ካታማፐ ሃክድ ብዶሶና።

¹⁷ ጋየ ዎይኮ ቤተለን ደእያ አሳ ኡባይ፥ እስራኤለ አሳ የደናዉ ካታማ የግድ ከይን ካታማ ፐንገያ ናግያ አስ ይዳ ግሾ፤ ዶያ አትስ።

¹⁸ ሄሳፈ ጉየ ጎዳይ እያሱኮ፥ “ነ ቶራ ጋየ ካታማ ቦላ ደን። ታኒ ጋየ ካታማ ነ ኩሸን አዳ እማና” ያግስ። ያትን እያሱይ ባ ቶራ ካታማ ቦላ ደንስ።

¹⁹ እያሱይ ባ ቶራ ደንዳ ዎደ ቆሰትዳ ኦላንቾት ባንታ በሳፈ ደንድድ፥ ካታማ ገል ኦይክድ፥ ኤለስድ ታማን ፁግዶሶና።

²⁰ ጋየ ካታማ አሳይ ጉየ ስሚድ ፄልያ ዎደ፥ ካታማ ጩያይ ሳሎ ደንድሽን በእዶሶና። መላ ቢታ ባቃትዳ እስራኤለ አሳይ፥ ባንታና የደያ አሳ ቦላ ጉየ ስምዳ ግሾ፥ ኤንቲ አዉ ባጋራካ ከስ ኤካናዉ ዳንዳእቦኮና።

²¹ እያሱነ እያራ ደእያ አሳ ኡባይ፥ ቆሰት ኡትዳ ኦላንቾት ካታማ ኦይክዳይሳነ ጩያይ ሳሎ ደንድዳይሳ በእዳ ዎደ ጉየ ስሚድ፥ ጋየ ካታማ አሳ ዎዶሶና።

²² ካታማ ገልድ ኦይክዳ ኦላንቾትካ ካታማፐ ኤንታ ቦላ ከይዶሶና። ያትን፥ ጋየ አሳይ እስራኤለ ኦላንቾታን ኡባ ባጋራ ተቀትዳ ግሾ፥ እሶይካ አቶና ዎይኮ ከስ ኤኮና ኡባ ዎድ ዉርስዶሶና።

²³ ሽን ጋየ ካታማ ካዋ ደእድ፥ እያሱኮ ኤህዶሶና።

²⁴ እስራኤለ አሳይ ጋየ ካታማ አሳ ኤንታና የደዳ በሳን ማሻን ዎድ ኦንግዳፐ ጉየ፥ ኡባይ ጉየ ካታማ ስሚድ፥ ካታማን አትዳ አሳ ኡባ ማሻን ዎዶሶና።

²⁵ ሄ ጋላስ ጋየ ካታማን ሀይቅዳ አደይነ ማጭ ታማነ ናምኡ ሙኩላ።

²⁶ እያሱይ ጋየ ካታማን ደእያባ ኡባ ኦንጋና ጋካናዉ ካታማ ቦላ ደንዳ ቶራ ዱገ ዎቤና።

²⁷ ሽን ጎዳይ እያሱ ኪትዳይሳ መላ እስራኤለ አሳይ ሄ ካታማ መህያነ ሻሉዋ ባንታዉ ድእዶሶና።

²⁸ እያሱይ ጋየ ካታማ ፁግስ፤ ሄ ካታማይ ሀች ጋካናዉ ላለ ዶረነ አስ ባይና በሲ ግድድ አትስ።

²⁹ እያሱይ፥ ጋየ ካታማ ካዋ ዎድ ኦማርስ ጋካናዉ ም ቦላ ካቅስ። አው ዉልያ ዎደ፥ እያ አሀ ካታማ ገልያ ፐንገን የጋና መላ ኦስ። እያ ቦላ ዳሮ ሹቻ ኬልዶሶና፤ ሄ ኬላ ሹቻይ ሀች ጋካናዉ ሄ በሳን ደኤስ።

ጫቆ ቃላይ ኦራፅስ

³⁰ ሄሳፈ ጉየ፥ እያሱይ ኤባላ ደርያ ቦላ ጎዳስ እስራኤለ ፆሳስ ያርሾ በሲ ኬፅስ።

³¹ ጎዳ አይለይ ሙሰይ እስራኤለ አሳ ኪትዳይሳዳነ ህገ ማፃፋን ፃፈትዳይሳዳ፥ ያርሾ በሳ ማሰትቦናነ ብራት ቦችቦና ሹቻፈ ኬፅድ፥ እያ ቦላ ጎዳስ ፁሳ ያርሾነ እስፈተ ያርሾ ያርሽዶሶና።

³² እያሱይ፥ እስራኤለ አሳ ስንን፥ ሙሰ ህግያ ሹቻ ቦላ ዛሪድ ፃፍስ።

³³ እስራኤለ አሳ አንጃና መላ ጎዳ አይለይ ሙሰይ ኪትዳይሳዳ እስራኤለ አሳ ኡባይ፥ አሳ ጋደ አሳታ፥ ኤንታ ጭማት፥ ኤንታ ሹማትነ ዳይናት ኡባይ፥ ጎዳ ጫቆ ታቦትያ ቶክዳ ሌወ ኮቸ ግድዳ ካህነታ ስንን ኡሻቻ ባጋንነ ሀድርሳ ባጋን ኤቅዶሶና። ኤንታፈ ባጋይ ጋርዛና ዙማ ስንን፥ ቃስ ባጋይ ኤባላ ደርያ ስንን ኤቅዶሶና።

³⁴ ህገ ማፃፋን ፃፈትዳይሳዳ፥ እያሱይ ህገ ቃላ ኡባ፥ አንጁዋነ ባደ ናባብስ።

³⁵ ሙሰይ ኪትዳ ህግያ እያሱይ፥ እስራኤለ አሳ ኡባስ፥ ማጫሳስ፥ ናይታስነ፥ አሳ ጋደ አሳስ እስ ቃላካ አሾና ናባብስ።