Iyyasu 7 - ጌሻ ማፃፋ

አካና ናጋራ

¹ እስራኤለ አሳይ ድገትዳባ ቦችድ፥ ጎዳስ ኪተቶና እፅዶሶና። ይሁዳ ኮቸ ግድዳ ካርማ ናአይ፥ ዘብዳ ናኣ ናአይ፥ ዛራ ናአይ አካን፥ ድገትዳባታፐ ኤክድ እስራኤለ ቦላ ጎዳ ሀንቁዋ ደንስ።

² እስራኤለ አሳይ እያርኮ ማታን ዱንካንድ ደእሽን፥ እያሱይ ቤት-አዌና ማታን ቤተለፐ ዶሎሀ ባጋን ደእያ ጋየ ካታማነ እያ ሄራ ፆሞስድ ያና መላ ጉ አሳታ ኪትስ። ኪተትዳ አሳት ብድ፥ ጋየ ካታማ ፆሞስዶሶና።

³ ኤንቲ እያሱኮ ስሚድ ይድ፥ “ጋየ ካታማ ኦላናዉ አሳ ኡባይ ባናዉ ኮሸና፤ ናምኡ ዎይኮ ሄ ሙኩሉ ኦላንቾት ቢኮ ግዳና። ያን ጉ አስ ደእያ ግሾ፥ አሳ ኡባይ ዳቡራናዉ በሰና” ያግዶሶና።

⁴ ያትን፥ ሄ ሙኩሉ ግድያ አሳት ኦላናዉ ጋየ ካታማ ብዶሶና። ሽን እስራኤለት ጋየ ካታማ አሳ ስንፈ ባቃትዶሶና።

⁵ ጋየ ካታማ አሳይ እስራኤለ አሳፐ ሀስታማነ ኡሱፑን አሳ ዎድ፥ ካታማ ድርሳ ፐንግያፈ ዶምድ፥ ሸባርመ ጋካናዉ እስራኤለ አሳ ዎሸ ጎድዶሶና። እስራኤለ አሳ ዎዛናይ ትልእድ፥ ሃ ግድስ።

⁶ ያንን፥ እያሱይነ እስራኤለ ጭማት አዛንድ፥ ባንታ ማኡዋ ዳክዶሶና። ጎዳ ታቦትያ ስንን ኦማርስ ጋካናዉ ጉፋንዶሶና። ባንታ ሁጰን ብዶ ቆልዶሶና።

⁷ ያትን፥ እያሱይ፥ “ሀይእ ጎዳ ፆሳዉ፥ ዮርዳኖሰ ሻፋ ፕንዳ ነ ኑና ኤህዳይ አሞረታስ ኑና አ እማናሴ? ዮርዳኖሰፐ ሄፍንን ደእዳኮ ኑስ ሎኦሽን።

⁸ አቤት ጎዳዉ፥ እስራኤለ አሳይ ፆነትድ፥ ባንታ ሞርከታ ስንፈ ባቃትኮ፥ ታ ዎይጎ?

⁹ ካናነትነ ሀ ቢታን ደእያ አሳ ኡባይ፥ ሄሳ ስእድ፥ ኑና ተቅድ፥ ቢታፈ ይሳና። ያትን፥ ነ ግታ ሱን ግሾ ነ ኦናይ አይቤ?” ያግስ።

¹⁰ ጎዳይ እያሱኮ፥ “አይስ ጉፋናዲ? ደንዳ ኤቃ።

¹¹ እስራኤለ አሳይ ቆህዶሶና፤ ታ ኤንታና ኪትዳ ኪታ ናጎና እፅድ፥ ጫቁዋ መንዶሶና። ኤንቲ ድገትዳባፐ ኤክዶሶና፤ ካይሶትዶሶና፤ ዎርዶትዶሶና፤ ቃስ ሄ ሚሽያ ባንታ ሚሽያራ ዋላክዶሶና።

¹² ሄሳ ግሾ፥ እስራኤለ አሳይ ባንታ ሞርከታ ስንን ኤቃናዉ ዳንዳእቦኮና። ኤንቲ ያናዉ በሲያ ግሾ፥ ባንታ ሞርከታ ስንፈ ጉየ ስሚድ ባቃትዶሶና። ህንተ ግዶፈ ያናዉ በሲያባ ህንተ ይሶና እፅኮ፥ ህዛፐ ታ ህንተራ ግድከ።”

¹³ ባዳ አሳ ጌሻ። ጎዳይ፥ እስራኤለ ፆሳይ፥ “ህንተ ኤካናዉ በሶናባ ኤክዳ ግሾ፥ ዎንቶስ ህንተናተ ጌሽተ” ያጌስ ጋዳ ኦዳ። እስራኤለ አሳዉ፥ ሄሳ ህንተ ግዶፈ ድጎና እፅኮ፥ ህንተ ሞርከታ ስንን ኤቃናዉ ዳንዳኤከታ።

¹⁴ ዎንቶ ዎንታ፥ ህንተ ዛርያን ዛርያን ሺቅተ። ጎዳይ ሻክያ ዛረይ ባ ኮቻን ኮቻን ሺቆ። ጎዳይ ሻክያ ኮቻይ ባ ሶ አሳን አሳን ሺቆ፤ ቃስ ጎዳይ ሻክያ ሶ አሳይ፥ እሶይ እሶይ ባዉ ሺቆ።

¹⁵ ድገትዳባ ኤክዳ ኡራይ ጎዳ ጫቁዋ መንዳይነ እስራኤለ አሳ ቆህዳይ እያ ግድያ ግሾ፥ እነ እያዉ ደእያባ ኡባይ ታማን ፁገቶ።

¹⁶ እያሱይ ዎንተ ጋላስ ጉራ ደንድድ፥ ኮቻን ኮቻን እስራኤለ አሳ ሺሽን፥ ጎዳይ ይሁዳ ኮቻይ ባላ ግደይሳ በስስ።

¹⁷ እያሱይ ይሁዳ ኮቻ ሺሽን፥ ጎዳይ ዛራሀ ኮቻይ ባላ ግደይሳ በስስ። ዛራሀ ኮቻ ሺሽን፥ ጎዳይ ዛብዳ ሶ አሳይ ባላ ግደይሳ በስስ።

¹⁸ ዛብዳ ሶ አሳይ እሶይ እሶይ ባዉ ሺቅን፥ ዉርሰን ጎዳይ ዛብዳ ናአ ናኣ፥ ካርማ ናኣ አካን ባላ ግደይሳ ቆንጭስስ።

¹⁹ እያሱይ አካናኮ፥ “ታ ናአዉ፥ ጎዳ፥ እስራኤለ ፆሳ ቦንቻ፤ አነ ነ ኦዳባ ታዉ ቆሶና ኦዳ” ያግስ።

²⁰ አካን ዛሪድ፥ “ኤ ቱማ፥ ታኒ ጎዳ እስራኤለ ፆሳ ናቃስ። ታኒ ኦዳይ ሀይሳ፤

²¹ ኑኒ ድእድ ኤክዳ ሚሽያ ግዶፈ እስ ሎኦ ሳናኦራ ቢታ ካባ፥ ናምኡ ክሎ ግድያ ብራታ ብራነ ባጋ ክሎ ግድያ ዎርቃ በአዳ አሞታስ፤ ኤካስ። ያታዳ ታ ዱንካንያ ግዶን ቢታ ቦካዳ ብራ ጋርሳራ ዎዳ ሞጋስ።”

²² ያትን፥ እያሱይ አሰ ኪትስ። ኤንቲ ዎፅ ብድ ዱንካንያ ግዶን ብራ ጋርሳራ ዎድ ሞግዳ ሚሸታ ደምዶሶና።

²³ ኪተትድ ብዳ አሳት ሄ ሚሸታ ዱንካንያፐ እያሱኮነ እስራኤለ አሳ ኡባኮ ኤህድ፥ ጎዳ ስንን ዎዶሶና።

²⁴ ያትን እያሱይነ እስራኤለ አሳ ኡባይ፥ አካና፥ ብራ፥ ካባ፥ ዎርቃ፥ እያ አደ ናይታነ እያ ማጫ ናይታ፥ እያ መህያ፥ እያ ሀረታ፥ እያ ዶርሳታ፥ እያ ዱንካንያነ እያዉ ደእያባ ኡባ መቶ ዛንጋራ ጌተትያ በሳ ኤፍዶሶና።

²⁵ እያሱይ አካናኮ፥ “ሀ መቱዋ ኑ ቦላ አይስ ኤሀዲ? ጎዳይ ሀች ነ ቦላ መቶ ኤሀና” ያግስ። ያትን እስራኤለ አሳ ኡባይ፥ አካናነ እያ ሶ አሳ ሹቻን ጫድ ዎድ፥ እያዉ ደእያባ ኡባራ ዎል ጋድ ታማን ፁግዶሶና።

²⁶ ኤንቲ አካና ቦላ ሀች ጋካናዉ በንትያ ዳሮ ሹች ኬልዶሶና። ያትን፥ ጎዳይ ባ ኤፅያ ሀንቁዋፈ ስምስ። ሀች ጋካናዉ ሄ በሳይ መቶ ዛንጋራ ጌተትድ ፄገቴስ።