Iyyasu 6 - ጌሻ ማፃፋ

¹ እስራኤለ አሳስ ያይዳ ግሾ፥ እያርኮ ካታማ ግምበ ድርሳ ፐንገት ጎርደትዶሶና። ኦንካ ካታማ ገላናዉነ ከያናዉ ዳንዳኤና።

² ጎዳይ እያሱኮ፥ “እያርኮ ካታማ እያ ካዉራነ እያ ምኖ ኦላንቾታራ ነ ኩሸን አ እማስ።

³ ኔራነ ነ ኦላንቾታራ ሳልፕድ፥ ጋላሳን እስ ቶሆ ኡሱፑን ጋላስ ጋካናዉ፥ ካታማ ግምበ ድርሳ ዩሹዋ ዩይተ።

⁴ ላፑን ካህነት እሶይ እሶይ ሞይዘ ኦይክድ፥ ጎዳ ጫቆ ታቦትያ ስንን ቦ። ላፑን ጋላስ ካህነት ሞይዘ ፑንያ ዎደ ህንተ ካታማ ላፑን ቶሆ ዩይተ።

⁵ ካህነት ሞይዘ ጎችድ ፑኑዋ ህንተ ስእያ ዎደ፥ አሳ ኡባይ ኤለስድ ባንታ ቃላ ቁ ኦድ ዋሶ። ሄሳፈ ጉየ፥ ካታማ ግምበ ድርሳይ ኩንዳና። ሄ ዎደ አሳ ኡባይ ግዶ ላዉሁ ግድ ገላና” ያግስ።

⁶ ናወ ናአ እያሱ ካህነታ ፄግድ፥ “ጎዳ ጫቆ ታቦትያ ቶክተ። ህንተፈ ላፑን ካህነት ሞይዘ ኦይክድ፥ ጫቆ ታቦትያፐ ስን አድ ቦ” ያግስ።

⁷ አሳኮ ቃስ፥ “ብድ፥ ካታማ ዩሹዋን ዩይተ፤ ኦላንቾት ጎዳ ጫቆ ታቦትያ ስንን ሄመቶና” ያግድ ኪትስ።

⁸ እያሱይ ኦድዳይሳዳ፥ ላፑን ካህነት ላፑን ሞይዘ ፑንሸ ጎዳ ስንን ሄመትዶሶና፤ ቃስ ጎዳ ጫቆ ታቦተይ ኤንታ ካልስ።

⁹ ኦላስ ዳንጭዳይሳት ሞይዘ ፑንያ ካህነታ ስንን ሄመቶሶና። ካህነት ቃንፆና ሞይዘ ፑንያ ዎደ ደረይ ታቦትያፐ ጉየራ ካሌስ።

¹⁰ ሽን እያሱይ፥ “ታ ህንተና ዋሶ ጎናሽን ዋሶፍተ ዎይኮ ህንተ ቃላ ስሶፍተ፤ ሀር አቶሽን እስ ቃላካ ኦደቶፍተ። ታ ህንተና ዋሶ ግያ ሄ ጋላስ ዋስተ” ያግድ አሳ ኪትስ።

¹¹ ሄሳ ግሾ፥ ጎዳ ጫቆ ታቦተይ ሄ ካታማ እስ ቶሆ ዩያናዳ ኦስ። ያትድ አሳይ ባንታ ዱንካንዳ ጉታ ስሚድ፥ ያን አቅዶሶና።

¹² ዎንተ ጋላስ እያሱይ ጉርድ ደንድስ፤ ካህነትካ ጎዳ ጫቆ ታቦትያ ቶክዶሶና።

¹³ ላፑን ሞይዘታ ኦይክዳ ላፑን ካህነት ባንታ ሞይዝያ ቃንፆና ፑንሸ ጫቆ ታቦትያ ስንን ቦሶና። ሞይዘይ ቃንፆና ፑነትያ ዎደ ኦላንቾት ካህነታፐ ስንን ቃስ ደረይ ታቦትያፐ ጉየራ ካሌስ።

¹⁴ ናምአን ጋላስ ካታማ እስ ቶሆ ዩይድ፥ ባንታ ዱንካንዳ ጉታ ስምዶሶና። ኡሱፑን ጋላስ ጋካናዉ ሄሳዳ ኦዶሶና።

¹⁵ ላፑን ጋላስ ጎንተይ ዋሽን ደንድድ፥ ካሰይሳዳ ካታማ ላፑን ቶሆ ዩይዶሶና። ሄ ጋላሳ ፃላላ ካታማ ላፑን ቶሆ ኤንቲ ዩይዶሶና።

¹⁶ ላፑን ዩሹዋን፥ ካህነት ሞይዘ ፑንያ ዎደ፥ እያሱይ አሳኮ፥ “ጎዳይ ሀ ካታማ ህንተዉ አድ እምዳ ግሾ፥ ዋስተ” ያግድ ኪትስ።

¹⁷ “ካታማይነ እያ ግዶን ደእያባ ኡባይ ጎዳስ ቃንገትዳባ ግድድ ያናዉ በሴስ። ኑኒ ቢታ ፆሞሳና መላ የድዳ አሳታ ቆሳዳ አሽዳ፥ ላይምያ ራባነ እ ሶን ደእያ አሳ ፃላል አታናዉ በሴስ።

¹⁸ ሽን ህንተ መቶነ ቆሆ እስራኤለ ጉታ ቦላ ኤሆና መላ ያናዉ በሲያባፐ አይባካ አሞትድ ኤኮናዳ ህንተ ሁጰስ ናገትተ።

¹⁹ ብራይነ ዎርቀይ፥ ናሰ ብራታፐ ኦሰትዳ ሚሸት ኡባይ፥ ጎዳስ ዱማትዳባ ግዶ። ኤንቲ ጎዳ ሚሽያ ምንጅያ ሻልያን ደኦ” ያግስ።

²⁰ ሄሳ ግሾ፥ ሞይዘይ ፑነትስ፤ አሳይ ዋስስ። ደረይ ሞይዘ ፑኑዋ ስእዳ ዎደ ባንታ ቃላ ቁ ኦ ዋስን፥ ካታማ ግምብያ ድርሳይ ኩንድስ። ሄ ሳተን አሳይ ላዉሁ ግድ ገልድ ካታማ ኦይክዶሶና።

²¹ ባንታ ማሻ ደንድ፥ ማጫ አደ፥ ናአ ጭማ፥ መሄ፥ ዶርሰ፥ ሀረነ ካታማን ሸምፖራ ደእያባ ኡባ ዎዶሶና።

²² እያሱይ ቢታ ፆሞሳናዉ ኪተትዳ ናምኡ አሳታኮ፥ “ላይመ ራብ ሶ ብድ፥ ካሰ ህንተ እዉ ጫቅዳይሳዳ፥ እዮነ እ ሶ አሳ ኡባ ከስተ” ያግስ።

²³ ኤንቲ ብድ፥ ራቦ፥ እ አዋ፥ እ አይዉ፥ እ እሻታነ እ ዳቦታ ኡባ እስራኤለ አሳይ ዱንካንዳ ጉታፐ ጋፃ ከስድ ዎዶሶና።

²⁴ ያት ስሚድ ካታማነ እያ ግዶን ደእያባ ኡባ ፁግዶሶና። ሽን ብራነ ዎርቃ፥ ናሰ ብራታፐ ኦሰትዳ ሚሸታ ጎዳ ሚሽያ ምንጅያ ሻልያን ዎዶሶና።

²⁵ ሽን ላይምያ ራባ እያርኮ ፆሞሳና መላ ኪተትዳ አሳታ ቆሳዳ አሽዳ ግሾ፥ እያሱይ እዮ፥ እ አዋ ሶ አሳነ ኢራ ደእያ ዳቦታ ኡባ ሀይቆፐ አሽስ። እ ኮቻት ሀች ጋካናዉ እስራኤለ ቢታን ደኦሶና።

²⁶ ሄ ዎደ እያሱይ፥ “እያርኮ ካታማ ዛር ኬፃናዉ ደንድያ ኦንካ፥ ጎዳ ስንን ባደትዳባ ግዶ። ቡሮ ባስያ ዎደ እያ ባይራ ናአይ ሀይቆ፥ ፐንግያ አያ ዎደ እያ ተሾ ናአይ ሀይቆ” ያግድ ባድስ።

²⁷ ጎዳይ እያሱራ ግድዳ ግሾ፥ እያ ሱንይ ቢታ ኡባ ጋክስ።