Iyyasu 4 - ጌሻ ማፃፋ

ሀሳይሶ ሹቻታ

¹ አሳ ኡባይ ዮርዳኖሰ ፕንዳፐ ጉየ ጎዳይ እያሱኮ፥

² “እስ እስ እስራኤለ ኮቻፈ እስ እስ አስ ኤካዳ ታማነ ናምኡ አሳታ ዶራ።

³ ሄ አሳት ዮርዳኖሰ ሻፋ ግዶን ካህነት ኤቅዳ በሳፈ ታማነ ናምኡ ሹቻታ ኤካና መላነ ሄ ሹቻታ ሀች ህንተ ዱንካንድ አቅያ በሳን ዎና መላ ኦዳ” ያግስ።

⁴ እያሱይ እስራኤለ ዘረታፐ ዶረትዳ ታማነ ናምኡ አሳታ ፄግስ።

⁵ ኤንታኮ፥ “ጎዳ ህንተ ፆሳ ጫቆ ታቦተይ ደእያ በሳ ጉየ ዮርዳኖሰ ሻፋ ገልድ፥ እስ እስ እስራኤለ ዘረታ ታይቦን ኡባይ እስ እስ ሹች ህንተ ሀሸን ቶክተ።

⁶ ሀ ሹቻት፥ ጎዳይ ሀች ኦዳባ ህንተና ቆፍስያ ማላታ ግዳና። ዎንቶ ህንተ ናይት፥ ‘ሀ ሹቻት አይብሴ?’ ያግድ ኦይችያ ዎደ፥

⁷ ህንተ ዛሪድ፥ ‘ጎዳ ጫቆ ታቦተይ ፕንያ ዎደ ዮርዳኖሰ ሃይ ጎገ አግስ። ሄሳ ግሾ፥ ሀ ሹቻት ሀ በሳን ሀንዳባ እስራኤለ አሳ ኡባ ዎደ ቆፍስያባ ግዳና’ ” ያግስ።

⁸ ሄ አሳት እያሱይ ኪትዳይሳዳ ኦዶሶና። ጎዳይ እያሱስ ኦድዳይሳዳ፥ እስራኤለ ዘረታ ታይቦን ዮርዳኖሰ ሻፋፐ ታማነ ናምኡ ሹቻታ ኤፍድ፥ ኤንቲ አቅያ በሳን ዎዶሶና።

⁹ እያሱይ፥ ካህነት ዮርዳኖሰ ሻፋን ጫቆ ታቦትያ ቶክድ፥ ኤቅዳ በሳን ታማነ ናምኡ ሹቻታ ኤስስ። ሄ ሹቻት ሀች ጋካናዉ ያን ደኦሶና።

¹⁰ ሙሰይ እያሱ ኪትዳይሳ መላ፥ ጎዳይ እያሱ ኪትዳባ ኡባይ ፖለታና ጋካናዉ፥ ጫቆ ታቦትያ ቶክዳ ካህነት ዮርዳኖሰ ሻፋን ኤቅድ ጋምእዶሶና። አሳይ ኤለስድ ሻፋ ፕንዶሶና።

¹¹ አሳ ኡባይ፥ ፕንዳፐ ጉየ፥ ጎዳ ጫቆ ታቦትያ ቶክዳ ካህነት አሳፐ ስን አድ ካለዶሶና።

¹² ሙሰይ ኪትዳይሳዳ፥ ሮቤላነ ጋዳ ኮቻት፥ ቃስ ምናሰ ኮቻፈ ባጋይ ኦላስ ዳንጨትድ፥ አሳፐ ስንትድ ፕንዶሶና።

¹³ ዳሮተን ኦይታሙ ሙኩሉ ግድያ ኦላንቾት፥ ጎዳ ስንን፥ እያርኮ ማታን ደእያ ደንባን ኦለታናዉ ሺቅዶሶና።

¹⁴ ሄ ጋላስ፥ ጎዳይ እያሱ እስራኤለ አሳ ኡባ ስንን ቁ ቁ ኦስ። ኤንቲ ሙሰ ቦንችዳይሳዳ እያሱካ እያ ደኦ ላይ ኡባን ቦንችዶሶና።

¹⁵ ጎዳይ እያሱኮ፥

¹⁶ “ጫቆ ታቦትያ ቶክዳ ካህነት ዮርዳኖሰ ሻፋፐ ከያና መላ ኦዳ” ያግስ።

¹⁷ እያሱይ ካህነት ዮርዳኖሰ ሻፋፐ ከያና መላ ኦድስ።

¹⁸ ጎዳ ጫቆ ታቦትያ ቶክዳ ካህነት ዮርዳኖሰ ሻፋፐ ከይዶሶና። ኤንታ ቶሆይ መላ ቢታ የዳ ዎደ ኤለስድ፥ ዮርዳኖሰ ሃይ ባ በሳ ስሚድ፥ ካሰ ጎገይሳዳ ጋፃ ጋክድ ጎገ ኦይክስ።

¹⁹ አሳይ ኮይሮ አጌናን ታማን ጋላሳን ዮርዳኖሰ ሻፋ ፕንድ፥ እያርኮስ ዶሎሀ ባጋን ደእያ ጋልጋላን ዱንካንዶሶና።

²⁰ እያሱይ ዮርዳኖሰ ሻፋፐ ኤከትዳ ታማነ ናምኡ ሹቻታ ጋልጋላን ኤስድ፥

²¹ እስራኤለ አሳኮ ሀይሳዳ ያግስ፤ “ዎንቶ ህንተ ናይት፥ ‘ሀ ሹቻት አይብሴ?’ ያግድ ህንተና ኦይችያ ዎደ፥

²² ‘እስራኤለ አሳይ ዮርዳኖሰ ሻፋ መላ ቢታራ የድ ፕንዳይሳ ቆፍስያባ’ ያግድ ኦዴታ።

²³ ኑኒ ፕናና ጋካናዉ፥ ጎዳይ፥ ኑ ፆሳይ ዞኦ አባ ካሰ ኑ ስንን መልስዳይሳዳ፥ ህንተካ ፕናና ጋካናስ፥ ጎዳይ፥ ህንተ ፆሳይ ዮርዳኖሰ ሻፋ ህንተ ስንን መልስዳይሳ ኦድተ።

²⁴ ሄሳ ግሾ፥ ቢታን ደእያ አሳ ኡባይ፥ ጎዳ ዎልቃይ አይ መላ ግቴኮ ኤራና፤ ህንተካ ጎዳ፥ ህንተ ፆሳ፥ መርናዉ ቦንቻና” ያግስ።