Iyyasu 3 - ጌሻ ማፃፋ

እስራኤለ አሳይ ዮርዳኖሰ ፕነ

¹ ዎንተ ጋላስ፥ ዎንታ ጉራ እያሱይነ አሳይ ሴፅማ ጌተትያ በሳፈ ደንድድ፥ ዮርዳኖሰ ሻፋ ብድ፥ ፕኖና ያን ዱንካንዶሶና።

² ሄ ጋላሳፐ ጉየ፥ ሀላቃት ኤንቲ ዱንካንዳ ጉታ ገልድ፥

³ “ሌወ ኮቸ ግድዳ ካህነት ቶክዳ፥ ጎዳ፥ ህንተ ፆሳ ጫቆ ታቦትያ ህንተ በእዳ ዎደ ዱንካንዳ ጉታፐ ደንድድ ኤንታ ካልተ።

⁴ ህንተ ካሰ ሀ ኦግያራ ብድ ኤሮና ግሾ፥ ህንተ ባና ኦግያ ኤንቲ በሳና። ሽን ጫቆ ታቦትያኮ ሺቆፕተ። ህንተ ግዶንነ ጫቆ ታቦትያ ግዶን ናምኡ ሙኩሉ ዋ ግድያ ሃሆተ ደኦ” ያግድ ኦድዶሶና።

⁵ እያሱይ አሳኮ፥ “ጎዳይ ዎንቶ ህንተ ግዶን ማላልስያባ ኦና ግሾ፥ ህንተናተ ጌሽተ” ያግስ።

⁶ ቃስ ካህነታስ፥ “ጫቆ ታቦትያ ቶክድ፥ አሳፐ ስን አተ” ያግድ ኪትስ። ካህነት ጫቆ ታቦትያ ቶክድ፥ አሳፐ ስን አዶሶና።

⁷ ጎዳይ እያሱኮ፥ “ታኒ ሙሰራ ግድዳይሳዳ፥ ኔራካ ግዳናይሳ አሳ ኡባይ ኤራና መላ ሀች እስራኤለ ኡባ ስንን ነና ቁ ቁ ኦሶ ዶማና።

⁸ ኔን፥ ጫቆ ታቦትያ ቶክያ ካህነታስ፥ ‘ዮርዳኖሰ ሻፋ ዶና ጋክያ ዎደ ሃ ግዶ ገልድ ኤቅተ’ ጋዳ ኪታ” ያግስ።

⁹ እያሱይ እስራኤለ አሳኮ፥ “ሃ ይድ ጎዳ፥ ህንተ ፆሳ ቃላ ስእተ።

¹⁰ ደኦ ፆሳይ ህንተ ግዶን ደኤይሳ ህንተ ኤራናይ፥ ካናነታ፥ ህተታ፥ ህወታ፥ ፓርዘታ፥ ገርገሰታ፥ አሞረታነ ያቡሰታ ህንተ ስንፈ እ ጎድድ ከሰይሳና።

¹¹ ቢታ ኡባ ጎዳ ጫቆ ታቦተይ ህንተፈ ስንትድ፥ ዮርዳኖሰ ሻፋ ፕናና።

¹² ህዛ ታማነ ናምኡ እስራኤለ ዘረታፐ እስ እስ አስ ዶርተ።

¹³ ቢታ ኡባ ጎዳ ጫቆ ታቦትያ ቶክዳ ካህነታ ቶሆይ ዮርዳኖሰ ሃ የያ ዎደ ሃይ ኤቃና። ቆሞፈ ዱገ ጎግያ ዮርዳኖሰ ሃይ እስ ቦላ ሺቅድ ዶረታና” ያግስ።

¹⁴ አሳይ ዮርዳኖሰ ሻፋ ፕናናዉ ዱንካንዳ ጉታፐ ደንድያ ዎደ፥ ጫቆ ታቦትያ ቶክዳ ካህነት አሳ ስንን ቦሶና።

¹⁵ ካ ሺሽያ ዎደ ዮርዳኖሰ ሻፋይ መይሳዳ ክፅኮካ፥ ጫቆ ታቦትያ ቶክዳ ካህነት ዮርዳኖሰ ሻፋ ጋክድ፥ ኤንታ ቶሆይ ሃ ጋፃ የዳ ዎደ፥

¹⁶ ቆሞፈ ዱገ ጎግያ ሃይ ኤቅስ። ዛርታና ማታን ደእያ አዳማ ካታማ ጋካናዉ ሺቅድ ዶረትስ። ዱገ ማፅነ አባኮ ጎግያ ሃይ ኤቅስ። ያንን፥ አሳይ እያርኮ ካታማ ፕንዶሶና።

¹⁷ እስራኤለ አሳይ መላ ቢታራ ፕንድ ዉራና ጋካናዉ ጎዳ ጫቆ ታቦትያ ቶክዳ ካህነት ዮርዳኖሰ ሻፋ ግዶን መላ ቢታን ኤቅዶሶና።