Iyyasu 20 - ጌሻ ማፃፋ

ባቃትድ አትያ ካታማታ

¹ ሄሳፈ ጉየ ጎዳይ እያሱኮ ሀይሳዳ ያግስ፤

² “ታኒ ሙሰ ባጋራ ኪትዳይሳዳ፥ ‘አሳይ ባቃትድ አትያ ካታማታ ዱማያና መላ’ እስራኤለ አሳስ ኦዳ።

³ ኦንካ ቆፖናነ ኤሮና አሰ ዎኮ፥ ያ ባቃትድ ጉክዳ ሱ ግሾ ሱ ዛራናዉ ኮያ ኡራፐ አታና።

⁴ አሰ ዎዳይስ ሄ ካታማታፐ እሱዋኮ ባቃትድ ብድ፥ ካታማ ፐንገን ኤቅድ፥ ሀንዳባ ኡባ ሄ ካታማ ጭማታስ ኦዶ። ሄሳፈ ጉየ፥ ኤንቲ ባንታ ካታማ ኤፍድ፥ እ ዳና በሲ እምኮ ኤንታራ ያን ደኦ።

⁵ ሱ ግሾ ሱ ዛራናዉ ኮያ ኡራይ እያ ካልድ ዪኮ፥ እ ባ እሻ ኤርድ፥ ቆሀናዉ ኮይድ ዎቦና ግሾ ሄ ካታማ ጭማት እያ አድ እሞፎ።

⁶ ሻንጎ ስንን ሺቅድ፥ ፕርደታና ጋካናዉነ ሄ ዎደ ደእያ ካህነ ሀላቃይ ሀይቃና ጋካናዉ ሄ ካታማን ደኦ። ሄሳፈ ጉየ፥ ባቃትድ ከይዳ ካታማ ጉየ ስሚድ ባ ሶ ገሎ” ያግስ።

⁷ ያትን እስራኤለ አሳይ ደረይ ዳርያ ንፍታለመን ጋልላን ደእያ ቃደሳ፥ ደረይ ዳርያ ኤፍሬማን ደእያ ሴከማነ ደረይ ዳርያ ይሁዳን ደእያ ቅርያት-አርባ ዎይኮ ከብሮና ዱማይዶሶና።

⁸ ዮርዳኖሰ ሻፋፐ ሄፍንን፥ እያርኮፈ ዶሎሀ ባጋን ቃን፥ መላ ቢታን፥ ሮቤላ፥ ኮቻታ ቢታን ደእያ ቦሶራ፥ ጋዳ ኮቻታ ቢታን፥ ጋላዳን ደእያ ራሞታነ ምናሰ ኮቻታ ቢታን፥ ባሳነን ደእያ ጎላና ዱማይዶሶና።

⁹ እስራኤለ አሳይነ ኤንታ ግዶን ደእያ በታንቾት ባቃትድ አታና መላ ዱማትዳ ካታማት ሀይሳታ። ኦንካ ኤሮና ደእሸ አሰ ዎኮ፥ ሻንጎ ስንን ፕርደቶና ደእሸ፥ ሀይቆና አታናዉ ሀ ካታማታፐ እሱዋኮ ባቃታናዉ ዳንዳኤስ።