Iyyasu 2 - ጌሻ ማፃፋ

ራቦነ ዎችያ አሳታ

¹ ናወ ናአይ እያሱይ፥ ቢታ ዎች በእያ ናምኡ አሳታ ሴፅማ ጌተትያ በሳፈ ቆሳን ኪትሸ፥ “ብድ ቢታ ዎችተ፤ ቃስ እያርኮ ካታማ ዱማይድ ዎችተ” ያግድ ኪትስ። ኤንቲ ብድ፥ ራቦ ጌተትያ ላይማተን አቅያ አሰ ሶ አቃናዉ ገልዶሶና።

² እያርኮ ካዎይ፥ “እስራኤለ አሳፐ ኪተትዳይሳት ሀ ቢታ ዎቻናዉ ሀች ቃማ ይዶሶና” ግያ ኦዳ ስእስ።

³ ያትን፥ እያርኮ ካዎይ ራብኮ፥ “ነ ሶ ገልዳ አሳት ቢታ ዎቻናዉ ይዳ አስ ግድያ ግሾ፥ ኤንታና ከሳዳ እማ” ያግድ ኪትስ።

⁴ ሽን ማጫስያ ሄ ናምኡ አሳታ ቆታዳ፥ “ኤ አሳት ታኮ ይዶሶና፥ ሽን ኤንቲ አዉፐ ይዳኮ ታ ኤርከ።

⁵ ኦማርስ ካታማ ፐንግያ ጎርዳና ሀንያ ዎደ፥ ኤንቲ ከይድ ብዶሶና። ኤንቲ አዉ ብዳኮ ታ ኤርከ። ኤለስድ ኤንታ ህንተ ካልኮ፥ ኦይካና” ያጋዳ ኤንታዉ ኦዳሱ።

⁶ ሽን እያ አሳታ ዳሳ ቦላ ከሳዳ ታልባ ጮይና ግዶን ቆሳሱ።

⁷ ያትን፥ ካዎይ ኪትዳ አሳት ዎቸይሳታ ኮይሸ፥ ዮርዳኖሰ ሻፋ ፕንያ ኦግያ ጋካናዉ ብዶሶና። ኤንቲ ካታማፐ ቡሮ ከይዳ መላ ካታማ ፐንገይ ጎርደትስ።

⁸ ዎቸይሳት ስካናፐ ካሰታዳ፥ እያ ኤንታኮ ከያዳ፥

⁹ ሀይሳዳ ያጋሱ፤ “ጎዳይ ሀ ቢታ ህንተዉ እምዳይሳ ታ ኤራይስ። ጋሶይካ፥ ህንተፈ ደንድዳይሳን ግታ ያሻን አሳ ኡባይ ትልእስ።

¹⁰ ግብፀ ቢታፈ ህንተ ከይዳ ዎደ፥ ጎዳይ ህንተ ስንን ዞኦ አባ ዋት መልስዳኮ ኑ ስእዳ። ቃስ ዮርዳኖሰ ሻፋፐ ዶሎሀ ባጋራ ደእያ አሞረ ካዎታ ናምአታ፥ ስሆናነ ኦገ ህንተ ዋትድ ዎዳኮነ ኤንታ ካታማ ዋትድ ይስዳኮ ኑ ስእዳ።

¹¹ ኑኒ ሄሳ ስእዳ ዎደ፥ ኑ ዎዛናይ ያሻን ትልእስ። ህዛ፥ ህንተ ጎዳይ፥ ፆሳይ ሳሉዋካ ሳኣካ ሃረይስ እያ ግደይሳ ኑ ኤርዳ።

¹² ሄሳ ግሾ፥ ታ ህንተዉ ኬህዳይሳዳ ህንተ ታ አዋ ሶ አሳስ ኬሀናዳ ጎዳ ሱንን ጫቅተ። ሄሳስ አማንያ ማላ ታዉ እምተ።

¹³ ታ አዋነ ታ አይዉ፥ ታ እሻታነ ታ ምቸታ ኤታ ሶ አሳ ኡባ ዎኮ ግድ ጫቅተ” ያጋሱ።

¹⁴ ሄ አሳት ዛሪድ፥ “ኑ ነዉ ጫቅዳ ጫቁዋ ፖሎና እፅኮ፥ ፆሳይ ኑና ዎ። ኑ ኦያባ ነ አሳስ ቆንጭሶና እፅኮ፥ ጎዳይ ሀ ቢታ ኑስ እምያ ዎደ፥ ኑኒ ነዉ አማነታናነ ኬሀና” ያግዶሶና።

¹⁵ ራኣብ ኬይ ካታማ ግምበ ድርሳራ ኦይከትድ ኬፀትዳ ግሾ፥ ማስኮትያራ ዎዶሮ ዱገ የዳዳ፥ ኤንታና ዱገ ዎሳሱ።

¹⁶ ራኣባ ኤንታኮ፥ “ህንተና ኮየይሳት ደሞና መላ ደርያኮ፥ ብድ ኤንቲ ስማና ጋካናዉ ያን ሄ ጋላስ ቆሰትተ። ያን ስሚድ፥ ህንተ ብያ በሳ ባናዉ ዳንዳኤታ” ያጋሱ።

^17-18 አሳት ዛሪድ፥ “ኑኒ ሀ ቢታ ኦይካናዉ ገልያ ዎደ፥ ሀ ዞኦ ዎዶሩዋ ነ ኑና ዎስዳ ማስኮትያን ቃቾና እፅኮነ ነ አዋ፥ ነ አይዉ፥ ነ እሻታነ ነ ሶ አሳ ኡባ ነ ሶ ሺሾና እፅኮ፥ ነ ኑና ጫቅስዳ ጫቆይ ኑስ ጎመ ግደና።

¹⁹ ኦንካ ነ ሶፐ ካረ ከይድ ሀይቅኮ፥ ሄስ እያ ጎመ። ኑኒ ሄሳስ ኦይሸቶኮ። ኔራ ሶን ደእሸ ኦንካ ቆሄትኮ፥ እያ ሱ ጎመይ ኑና ጋኮ።

²⁰ ሽን ኑ ኦያባ ኔን አሳስ ቆንጭስኮ ኔን ኑና ጫቅስዳ ጫቆይ ኑስ ጎመ ግደና” ያግዶሶና።

²¹ እያ ዛራዳ፥ “ህንተ ቃላዳ ሀኖ” ጋዳ ኤንታ ሞይዛሱ። ኤንቲ ብዳፐ ጉየ፥ ሄ ዞኦ ዎዶሩዋ ማስኮትያን ቃቻሱ።

²² ኤንቲ ደርያኮ ብድ፥ ኤንታ ኮየይሳት እያርኮ ስማና ጋካናዉ ያን ሄ ጋላስ ቆሰትዶሶና። ኤንታ ኮየይሳት ኦገ ኡባን ኮይዶሶና፥ ሽን ደምቦኮና።

²³ ሄሳፈ ጉየ ሄ ናምኡ አሳት ደርያፐ ዎዶሶና። ዮርዳኖሰ ፕንድ፥ ናወ ናኣ እያሱኮ ይድ፥ ባንታና ጋክዳባ ኡባ ኦድዶሶና።

²⁴ ኤንቲ እያሱኮ፥ “ጎዳይ ቱማ ሄ ቢትዉ ኑስ አድ እምስ። ቃስ ሄ ቢታን ደእያ አሳ ኡባይ፥ ኑስ ያይድ ትልእዶሶና” ያግዶሶና።