Isayaasa 9 - ጌሻ ማፃፋ

ናእ የለትስ

¹ ግዶሽን፥ ዋየትዳይሳታስ ህዛፐ ጉየ መና። በን ዎደ ጎዳይ ዛብሎና ቢታነ ንፍታለመ ቢታ ካዉሽስ። ሽን ስንፈ መደትራነ አባ ኦግያን ደእያ ቢታነ ዮርዳኖሰ ሻፋፐ ሄፍንን ደእያ አይሁደ ግዶና አሳይ ደእያ ጋልላ ቢታ እ ቦንቻና።

² ማን ሄመትያ አሳይ ዎልቃማ ፖኦ በእስ፤ ቃስ ሀይቆ ማን ደኤይሳታስ ፖኦይ ፖእስ።

³ ኔኒ ካዎተ ዳርሳዳሳ፤ ኤንታ ኡፋይሳ ጉጃዳሳ። አስ ካ ሺሽያ ዎደ ኡፋይተይሳዳ ዎይኮ ድኡዋ ሻክድ ኤክያ ዎደ ኡፋይተይሳዳ ነ ስንን ኡፋይታና።

⁴ ኔኒ ምድያመ ቢታ ፆንዳይሳዳ ኤንታ ዴፆ ቃምባራ፥ ኤንታ ጋናስ ጊግዳ ፃምአነ ኤንታ ኡንኤይሳታ ጉምባ መንዳሳ።

⁵ ኦላንቾታ ጫማይነ ሱን ሙኑቀትዳ ማኦ ኡባይ ታማን ፁገታና፤ ታማስ ኦይሰ ግዳና።

⁶ ኑስ ናእ የለትስ! አደ ናእ ኑስ እመትስ! ካዎተ ማት እያ ሀሽያን ግዳና፤ እያ ሱንይ፥ “ማላልስያ ዞራንቾ፥ ዎልቃማ ፆሳ፥ መርና አዋ፥ ሳሮተ ሀላቃ” ጌተታና።

⁷ እያ ካዎተ ዳልጋተስነ እያ ሳሮተስ ዛው ባዋ። ሀችፈ ዶምድ፥ መርና ጋካናዉ ሱረ ፕርዳንነ ፅሎተን ምንናዉነ ኤሳናዉ ዳዊታ አራታንነ እያ ካዎተን እ ካዎታና። ኡባፈ ዎልቃማ ጎዳ ቃናተይ ሀይሳ ኦና።

እስራኤለ ቦላ ጎዳ ሀንቁዋ

⁸ ጎዳይ ያይቆባ ዘረ ቦላ ፕርዳ ቃላ ኪትን፥ እስራኤለ ካዎተ ቦላ ዎስ።

⁹ ኤፍሬማ አሳይነ ሳማረ ካታማ አሳይ ሀይሳ ኦዳይ ጎዳ ግደይሳ ኤርሸ፥ ኦቶሮንነ ጬቆን፥

¹⁰ “ፁበፐ ኬፀትዳ ኬት ላለትዶሶና፤ ሽን ኑ ዛሪድ ማሰትዳ ሹቻን ኬፃና፤ ቦባ ምት ቃንፀትዶሶና፤ ሽን ኑ ኤንታ በሳን ዝጋታ ላማና” ያግዶሶና።

¹¹ ሽን፥ ፆሳይ ራሶና ሞርከታ ምንና፤ ኤንታ ቦላ ኤሀና፤ ኤንታራ ኤቀትያ ሞርከታ ኤንታ ቦላ ደንስ።

¹² ዶሎሀፐ አራመታ፥ ዉሎሀፐ ፍልስፄመታ ደንን፥ ኤንቲ ባንታ ዶና ዶይድ፥ እስራኤለ ምትዶሶና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

¹³ ግዶሽን፥ አሳይ ባንታና ሾጭዳይሳኮ ስምቦኮና፤ ኡባፈ ዎልቃማ ጎዳ ኮይቦኮና።

¹⁴ ሄሳ ግሾ፥ እስ ጋላስ ጎዳይ እስራኤለፐ ሁጰነ ጎይና፥ ዛምባ ዳሻነ ማቃ ቃንፃና።

¹⁵ ጭማትነ ቦንቸትዳይሳት ሁጰ፤ ዎርዶ ታማርስያ ናበት ጎይና።

¹⁶ ሀ አሳ ካለይሳት ባለሶና፤ ኤንታ ካለይሳትካ ባሎሶና።

¹⁷ ሄሳ ግሾ፥ ጎዳይ ኤንታ ናአተታን ኡፋይተና፤ ይኦ ናይታስነ አምኤታስ ቃተና። አስ ኡባይ ኢታነ ፆሰ ኤሮናይሳ ግዳና፤ ኡባይ ባ ዶናን ኢታባ ኦደቴስ። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

¹⁸ ታም ክንቾተነ አጉን መይሳዳ ኢታተ ፁጌስ፤ ስከትዳ ዎር ፁገትን፥ ጩያይ ቱሳዳ ከየይሳዳ ከዬስ።

¹⁹ ኡባፈ ዎልቃማ ጎዳ ሀንቁዋን ቢታይ ፁገታና፤ አስካ ታማ ኦይሰያባ ግዳና፤ ኦንካ ባ እሻ አሻናዉ ቆፐና።

²⁰ ኤንቲ ኡሻቻ ባጋራ ቦንቃና፥ ሽን ኮሻታና፤ ኤንቲ ሀድርሳ ባጋራ ማና፥ ሽን ካሎኮና፤ ኤንቲ ባንታ የልዳ ናይታ ማና።

²¹ ምናሰይ ኤፍሬማ፥ ኤፍሬምካ ምናሰ ማና፤ ኤንቲ እስፈ ግድድ ይሁዳ ቢታ ሞርካና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።