Isayaasa 8 - ጌሻ ማፃፋ

አሶረ ካዋ ዩሳ

¹ ጎዳይ ታኮ፥ “ግታ ሳሌዳ ኤካዳ፥ ‘ድአናዉ ኤለሳ! ቦንቃናዉ ድርጋ!’ ያጋዳ ናባበትያ ፕዳለን ፃፋ።

² ካህንያ ኡራያነ ባራካ ናኣ ዛካርያሳ አማነትያ ማርካ ኦዳ ታኒ ፄጋና” ያግስ።

³ ሄሳፈ ጉየ፥ ታኒ ናበ ግድዳ ታ ማቸራ አቃስ፤ እያ ቃንታዳ አደ ናአ የላሱ። ጎዳይ ታኮ፥ “እያ ሱን፥ ‘ማሃር-ሻላል-ሀሽ-ባዝ’ ያጋዳ ፄጋ።

⁴ ናአይ፥ ‘አቦ፥ እሞ’ ግድ ፄስ ኤራናፐ ስን አሶረ ካዎይ፥ ዳማስቆ ዱረተነ ሳማርያ ሻሉዋ ኤክድ ባና” ያግስ።

⁵ ቃስካ ጎዳይ ታኮ ሀይሳዳ ያግስ።

⁶ “ሀ አሳይ ሎዳራ ጎግያ ሳልሆመ ሃ እፅድ፥ ራዝናነ ራማላ ናኣ ኡፋይትድ ኤክዶሶና።

⁷ ሄሳ ግሾ፥ ጎዳይ ምኖነ ዳሮ ግድዳ ኤፍራፂሳ ሃ፥ አሶረ ካዋ፥ እያ ኦላንቾታራ ኤሀና ሀኔስ። እ ሃ ክፅድ ኩመይሳዳ ጋፃ ኡባ ማእድ ጎጋና።

⁸ ድእሸ ይሁዳ ገላና፤ ክፃይ ቆ ጋካናዉ ኩምድ ያራ ካንና።” አቤት አማኑኤላ፥ እያ ቀፍያ ምጨይ ነ ቢታ ኡባ ማእስ።

⁹ ህንተኖ ካዎተቶ፥ እስፈ ኦላስ ሺቅተ፥ ሽን ህንተ ያና። ሃሆ ቢታን ደእያ አሳቶ፥ ስእተ፤ ኦላስ ጊግተ፤ ሽን ህንተ ሊቃና! ኤ፥ ኦላስ ጊግተ፤ ህንተ ዉራና።

¹⁰ ፆሳይ ኑራ ደእያ ግሾ፥ ኦላስ ማቀትተ፥ ሽን ህንተ ማቆይ ካንና፤ ሀልችተ፥ ሽን ህንተ ሀልቾይ ሀላና።

ፆሳ ያያ

¹¹ “ጎዳይ ባ ምኖ ኩሽያ ታ ቦላ ዎድ፥ ታ ሀ አሳ ኦግያን ቦና መላ ታዉ ምንድ ኦድስ።

¹² ሀ አሳ ማቆ ኡባ ማቆ ጎፕተ፤ ኤንቲ ያይያባ ያዮፍተ፤ ዳጋሞፕተ።

¹³ ህንተ ጌሽ ጋናዉ በሰይ ኡባፈ ዎልቃማ ጎዳ፤ እያዉ ያያናዉነ ዳጋማናዉ በሴስ።

¹⁴ እ፥ ጌሻ በሲ ግዳና፤ ሽን ይሁዳስነ እስራኤለስ እ፥ በ ሹችነ ኩንድስያ ዛላ ግዳና። የሩሳላመን ደእያ አሳስ እ ግተነ ፅሄ ግዳና።

¹⁵ ኤንታፈ ዳሮት በታና፤ ኩንድድ መአና፤ ፅሄን ኦይከትድ ድኤታና” ያግስ።

¹⁶ ታ ኦደይሳ ናጋ፤ ታ ታማረታ ግዶን ህግያ አታማ።

¹⁷ ታኒ ባ ሶምኡዋ ያይቆባ ዘረፈ ገንያ ጎዳ ናጋና፤ እያን አማነታና።

¹⁸ ታናነ ታዉ ጎዳይ እምዳ ናይታ በእተ። ኑኒ ፅዮነ ደርያን ደእያ ኡባፈ ዎልቃማ ጎዳፐ እስራኤለ አሳስ ማላነ ማላታ።

¹⁹ “ሱይቅሸነ ካልካሽሸ ኦድያ ማሮታነ ሞይትለታ ኦይችተ” ያግድ ህንተና ዞርያ አሳይ ደኦሶና። ደኦን ደኤይሳታስ ሀይቅዳይሳታ ኦይቸይሳፈ አሳይ ባንታ ፆሳ ኦይቻናዉ በሰኔ?

²⁰ ህግያነ ጎዳ ማርካ ስእተ! ሄ አሳት ሀ ቃላዳ ሃሳዮና እፅኮ ኤንታዉ ሳእ ዎንተና።

²¹ አሳይ ዋየትሸነ ኮሻትሸ ቢታ ቦላ ቶይላታና። ኤንቲ ኮሻትዳ ዎደ ይሎትድ፥ ፑደ ሳሎ ፄልድ ባንታ ካዋነ ባንታ ፆሳ ባዳና።

²² ሳኣ ዱገ ፄልያ ዎደ ዋየ፥ ማነ ያሽያ ጫጋና በአና፤ ኤንቲ ሳካና ማን ሆለታና።