Isayaasa 61 - ጌሻ ማፃፋ

አቶተ ምሽራቾ

¹ ኡባ ሃርያ ጎዳ አያናይ ታ ቦላ ደኤስ፤ ማንቆታስ ሎኦባ ኦዳና መላ ጎዳይ ታና ትይስ። ዎዛን መቅዳይሳታ ኮላና መላ፥ ድኤትዳይሳታ ላአ ከሳና መላነ ቃሸትዳይሳታ ብላና መላ ጎዳይ ታና ኪትስ።

² ዶሰትዳ ጎዳ ላይ ኦዳና መላ፥ ኑ ፆሳይ ሀሎ ከያና ጋላሳ አዋጃና መላ፥ አዛነይሳታ ኡባ ምንና መላ ታና ኪትስ።

³ ፅዮነን ካዮተይሳታስ፥ ብዶ ግሾ ካላቻ፥ ዬሆ ግሾ ኡፋይሳ ዛይተ፥ አዛኖ ግሾ ጋላታ ማኦ እማና መላ ታና ኪትስ። ኤንቲ ጎዳይ ባ ቦንቹዋስ ቶክዳ ፅሎ ም ጌተትድ ፄገታና።

⁴ ኤንቲ በን ላለትዳ በሳታ ዛሪድ ኬፃና፤ በን ኩንድዳ በሳታ ዛሪድ ኤሳና። ኤንቲ ዳሮ የለተፈ ካሰ ላለትድ ኦንዳ ካታማታ ዛሪድ ኬፃና።

⁵ አላጋ አሳት ህንተ ዶርሳ ዉድያ ሄማና፤ እማት ህንተ ጋድያ ጎያና ኤንቲ ህንተ ዎይነ ጋድያ ናጋና።

⁶ አሳይ ህንተና፥ “ጎዳ ካህነታነ ኑ ፆሳ ኦሳንቾታ” ያግድ ፄጋና። ህንተ ካዎተታ ዱረተ ማና፤ ኤንታ ሻሉዋን ህንተ ናሸታና።

⁷ ታ አሳይ ባንታ ዬላ ግሾ ናምኡ ኩሸ ኤካና፤ ባንታ ካዉሻ ግሾ ላታን ኡፋይታና። ሄሳ ግሾ፥ ህንተ ኤንታ ቢታን ዳኮ ላታና፤ ህንተ ኡፋይሳይ መርና ኡፋይስ ግዳና።

⁸ “ታኒ፥ ጎዳይ ሱረ ፕርዳ ዶሳይስ፤ ቦንቀነ ኢታ ኦሶ እፃይስ። ታኒ ቱማ ኤንታ ኦሱዋ ጋትያ ቃንፃና፤ ታኒ ኤንታራ መርናዉ ጫቃና።

⁹ ኤንታ ኮቻት ካዎተታ ግዶን፥ ኤንታ ናይት ደረታ ግዶን ኤረታና፤ ኤንታ በእዳ ኡባይ ታኒ፥ ጎዳይ፥ ኤንታ አንጅዳ አስ ግደይሳ ኤራና።”

¹⁰ ታኒ ጎዳን ዳሮ ኡፋይታይስ፤ ታ ሸምፕያ ታ ፆሳን ሀሹ ጋዉሱ። ኤከይስ ባ ሁጰን ካላቻ ዎይሳዳ፥ ገልያራ ባና አሌቅሰይሳዳ፥ እ ታና አቶተ ማኦ ማይዝስ፤ ፅሎተ አፍላ ቦላራ ጉጅስ።

¹¹ ቢታፈ ም ማት ዶለይሳዳ፥ ጋደይ ቶክዳባ ድቸይሳዳ፥ ኡባ ሃርያ ጎዳይ ፅሎተነ ጋላታ ካዎተ ኡባ ስንን ፑርጭሳና።