Isayaasa 60 - ጌሻ ማፃፋፅዮነ ቦንቹዋ 1 ነ ፖኦይ ይዳ ግሾ፥ ደንዳዳ ፖእሳ፤ ጎዳ ቦንቾይ ነ ቦላ ፖአና። 2 ሄኮ፥ ም ሳኣ፥ ሳካና ም አሳ ካማና፤ ሽን ጎዳይ ነ ቦላ ደንዳና፤ እያ ቦንቾይ ነ ቦላ ፖአና። 3 ካዎተት ነ ፖኡዋኮ፥ ካዎትካ ነ ዎንታ ፆልቀኮ ያና። 4 ቁ ጋዳ ነ ዩሹዋ ፄላ፤ ኡባይ እስፈ ኔኮ ያና። ነ አደ ናይት ሃሆፐ ያና፤ ነ ማጫ ናይት ባኤትድ ኔኮ ያና። 5 ሄ ዎደ ኔኒ በአዳ ኡፋይታና፤ ነ ዎዛናይ ኡፋይሳን ኖጩ ጋና። አባ ቦላ ደእያ ሻሎይ ኔኮ ያና፤ ካዎተታ ዱረተይ ነባ ግዳና። 6 ምድያመፐነ ኤፋ ቢታፈ ይዳ፥ ግማለ ዉደይ ነ ቢታ ካማና። ዎርቃነ እፃነ ኤሄይሳት ጎዳ ጋላታ አዋጅሸ ሳባፐ ያና። 7 ቀዳረነ ነባዮታ ዶርሳ ዉደ ኡባይ፥ ታ ያርሾ በሳ ኔኮ ያና፤ ታኒ ታ ቦንቾ ኬ ቦንቻና። 8 “ሀይሳቲ ሻራዳ ዎይኮ ሆለዳ ባንታ ኬኮ ፓለይሳት ኦኔ? 9 ቱማ ዩሾይ አባን ተቀትዳ ቢታት፥ ታናን ኡፋይስ ዎና፤ እስራኤለ ጌሻይ፥ ጎዳይ ህንተ ፆሳይ፥ ህንተና ቦንችዳ ግሾ፥ ታርሰሳ ማርካበት ስንት ከይድ፥ ነ ናይታ ሃሆ ቢታፈ ኤንታ ብራራነ ዎርቃራ ፆሳ ቦንቹዋስ ኤሀና። 10 “አላጋ ቢታት ነ ድርሳ ግምባና፤ ኤንታ ካዎት ነዉ ኦና። ነና ታኒ ታ ሀንቁዋን ካሰ ሾጫስ፥ ሽን ሀእ ታ ቃያን ነና ማራስ። 11 ነ ፐንገት ኡባ ዎደ ዶያ ዳና፤ ካዎተታ ዱረተይነ ኤንታ ካዎት ድኤትድ ኔኮ ያና መላ ጋላስነ ቃማ ጎርደቶኮና። 12 ነዉ ኦና አስ ዎይኮ ካዎተ ኡባይ ያና። 13 ታ ኬ በሳ ሎይና መላ ልባኖሰ ቦንቾ ግድዳ ዝጋይ፥ ፂዳይነ ፃይይ ኔኮ ያና፤ ታኒ ታ ቶሁዋ ዎያ በሳ ቦንቻና። 14 ነና ኡንኤዳ አሳ ናይት ይድ ነዉ ሆካና፤ ነና ካዳ ኡባይ ነ ስንን ጎይናና። ኤንቲ ነና፥ ‘ጎዳ ካታመ፥ ፅዮነ፥ እስራኤለ፥ ጌሻ ካታመ’ ያግድ ፄጋና። 15 “ሀይሳፈ ካሰ ኦንካ ነ ግዶራ ካንና መላ የገታዳሳነ እፀታዳሳ። ሽን ሀእ ታኒ ነና መርናዉ ግታ ኦና፤ የለተ ኡባይ ነናን ኡፋይታና። 16 ኔኒ ካዎተታ ማ ኡያና፤ ካዎታ ን ማና። ጎዳይ፥ ነና አሸይሳ፥ ዎዘይሳነ ያይቆባ ዎልቃማ ግደይሳ ኔኒ ኤራና። 17 ናሰ ብራታ ግሾ ዎርቃ፥ ብራታ ግሾ ብራ፥ ም ግሾ ናሰ ብራታ፥ ሹቻ ግሾ ብራታ ታኒ ነዉ ኤሀና። ታኒ፥ ሳሮተ ነና አይሰይሳ፥ ፅሎተ ነዉ ሀላቃ ኦና። 18 ጌላተ ነ ቢታን፥ ዮይ ዎይኮ ቦሽ ነ ዛዋን ስኤተና። ኔኒ ነ ድርሳ ግምብያ፥ ‘አቶተ’፥ ነ ፐንግያ፥ ‘ጋላታ’ ያጋዳ ፄጋና። 19 ጋላስ አዋ ፖኦ፥ ቃማ አጌና ፖኦ ነዉ ኮሸና፤ ጎዳይ ነዉ መርና ፖኦ፥ ነ ፆሳይ ነዉ ቦንቾ ግዳና። 20 አው ናምአን ዉለና፤ ነ አጌናይ ፖኦ አገና። ጎዳይ ነዉ መርና ፖኦ ግዳና፤ ኔኒ ዬክዳ ጋላሳት ነዉ ግዳና። 21 ነ አሳ ኡባይ ፅሎ ግዳና፤ ኤንቲ ቢታ መርናዉ ላታና። ኤንቲ ታኒ ታ ቦንቹዋ ቆንጭሳናዉ ቶክዳ ፑቶታ፤ ታ ኩሸ ኦሶታ። 22 ህንተ ግዶን እስ ኬን ደእያ ጉ አሳታ ዳርሳና፤ ኡባፈ ጉ ግታ ካዎተ ኦና። ታኒ ጎዳ፤ ዎደይ ጋክያ ዎደ፥ ታኒ ሄሳ ኤሶን ፖላና” ያጌስ። |
The Word for the World International and The Word for the World Ethiopia