Isayaasa 56 - ጌሻ ማፃፋ

አቶተ ሀራታስ

¹ “ሱረ ፕርዳ ናግተ፤ ፅሎ ኦተ፤ ታ አቶተይ ኤለስድ ያና፤ ታ ፅሎተይ ማታን ቆንጫና።

² ሀይሳ ኦያ ኡራይ፥ ሳምባታ ቱንሶና ቦንችያ ኡራይነ ባ ኩሸይ ኢታባ ኦና መላ ተቅያ ኡራይ አንጀትዳይሳ” ያጌስ ጎዳይ።

³ ጎዳኮ ሺቅዳ በተ አስ፥ “ጎዳይ ታና ባ አሳፐ ሻካና” ጎፖ፤ ሹፋይ፥ “ታኒ መልዳ ም” ጎፖ።

⁴ “ታ ሳምባታ ቦንችያ፥ ታና ኡፋይስያባ ዶረይነ ታ ጫቁዋ ምንድ ናግያ ሹፋታስ፥

⁵ ኤንታዉ ታኒ ታ ኬንነ ታ ድርሳ ግምብያ ግዶን ኤንቲ ሀሳየትያባ እማና። ኤንቲ ማጫ ናአነ አደ ናአ የልድ፥ ደምያ ቦንቹዋፈ አያ ሱን ታኒ ኤንታዉ እማና፤ ታኒ መርናዉ ዮና ሱን ኤንታዉ እማና።

⁶ ጎዳ ሀጋዛናዉ፥ ጎዳ ዶሳናዉነ እያ አይለ ግዳናዉ ባንታና እያኮ ሺሽያ፥ ሳምባታ ቱንሶና ቦንችያነ ታ ጫቆ ቃላ ምንድ ናግያ በተ አሳታ፥

⁷ ታኒ ታ ጌሻ ዙማ ቦላ ኤሀዳ ታ ዎሳ ኬን ኤንታ ኡፋይሳና። ኤንቲ ታ ያርሾ በሳን ሺሽያ ፁሳ ያርሾይነ ሀራ ያርሾይ ኤከታና፤ ታ ኬይ አሳ ኡባይ ፆሳ ዎስያ ኬ ጌተታና” ያጌስ።

⁸ “ሽቅዳይሳታ ቦላ ጉጃዳ ሀራታካ ታኒ ሺሻና” ያጌስ እስራኤለፐ ላለትዳይሳታ ሺሽያ፥ ኡባ ሃርያ ጎዳይ።

ፆሳይ ኢታታ ሞቴስ

⁹ ህንተኖ ባዞ ዶአቶ፥ ህንተኖ ዎራ ዶአቶ፥ ኡባይ ሃ ይድ ሚተ።

¹⁰ እስራኤለ አሳ ናገይሳት ቆቀ፤ ኤንታዉ ኤር ባዋ፤ ኤንቲ ኡባይ ቦጫናዉ ዳንዳኦና ቡታለ ካናታ፤ ኤንቲ ዝንእድ ኤልሞቶሶና፤ ስኮ ዶሶሶና።

¹¹ ኤንቲ ምድ ካሎና ያራምባ ካና መላ፤ ኤንቲ አኬክ ፓጭዳ ሄንንቾ። ኤንቲ ኡባይ ባንታ ኦገ ብዶሶና፤ ኡባይ ባንታ ጎአ ፃላላ ኮዮሶና።

¹² ኤንቲ፥ “ሃ ዪተ፤ ዎይነ ኡሻ አነ ኡዮስ፤ ማይያ ኡሻ አነ ጋኖስ! ዎንቶይ ሀች መላ ግዳና፤ ሀችፈካ አድ ሎአና” ያጎሶና።