Isayaasa 54 - ጌሻ ማፃፋ

ፅዮነ ስን ቦንቹዋ

¹ ናተ፥ የሎና ማይን፥ የፃ! ናተ፥ እቀታ ኤሮናረ፥ ኡፋይሳን እልላ! አዝናራ ደእያ ማጫሰ ናይታፐ ባርካ ደእያ ማጫሰ ናይት ዳራና።

² ነ ዱንካንያ በሳ ዳልግሳ፤ ዱንካንያ ገሸታ ፕድ ኦዳ ምጫ፤ ፁምሶፓ፤ ዎዶሩዋ አዱሳ፤ ሽያ ምን።

³ ኔኒ ኡሻችነ ሀድርስ ዳልጋና፤ ነ ኮቻት ካዎተታ ላታና፤ ባይሳትዳ ኤንታ ካታማታን ኬፅድ ዳና።

⁴ “ያዮፋ፤ ኔኒ ዬላታካ፤ ዳጋሞፋ፤ ኔኒ ካዉያካ። ነ ያላጋተ ዬላ ኔኒ ዶጋና፤ ነ አምኤተ ቦርያ ህዛፐ ጉየ ሀሳያካ።

⁵ ነ አዝናይ ነና መዳይሳ፤ እያ ሱንይ ኡባፈ ዎልቃማ ጎዳ። እስራኤለ ጌሻይ ነና ዎዝዳይሳ፤ እ ቢታ ኡባ ፆሳ ጌተታና።

⁶ አዝን አግን፥ ዶገታዳ አዛንያ ማጫሳዳ፥ ያላጋተን አዝና ሶፐ ከይዳ፥ ማጫሳዳ ኔኒ ሀናዳ ደእሽን፥ ታኒ ጎዳይ ነና ዛራዳ ፄጋስ።

⁷ “ጉ ዎደ ታኒ ነና አጋስ፥ ሽን ግታ ቃን ታኒ ነና ዛራዳ ኤሀና።

⁸ ሱልያ ሀንቆን ታኒ ታ ሶምኡዋ ኔፐ ጉ ዎደስ ገንስ። ሽን መርና ማሮተን ታኒ ነዉ ቃታና” ያጌስ ነና ዎዝያ ጎዳይ።

⁹ “ሀይስ ታዉ ኖሄ ዎድያ መላ፤ ሄ ዎደ ታኒ ዮ ሃን ዛራዳ ሳኣ ይስከ ጋዳ ጫቅዳይሳዳ፥ ዛራዳ ነ ቦላ ሀንቀቶና መላነ ሴሮና መላ ታኒ ጫቃስ።

¹⁰ ደረት ቃፃናዉ፥ ዙማት ባንታ በሳፈ ክቻናዉ ዳንዳኦሶና፤ ሽን ታ መርና ሲቆይ ኔፐ ሻከተና፤ ታ ሳሮተ ጫቆይ ኔፐ ክቸና” ያጌስ ነዉ ቃትያ ጎዳይ።

¹¹ “ነኖ፥ መቶትዳ ካታመ፥ ጎተይ ያነ ሃነ ሾጭዳረ፥ ምንያባይ ይዳረ፥ ሄኮ፥ ታኒ ነና ቦንቾ ሹቻን አሌቅሳዳ ኬፃና፤ ነ ባሱዋ ሳንፓረ ሹቻን ሂፃና።

¹² ነ ሹቻ ግምብያ ቁስትያ ዞኦ እንቆ ሹቻን፥ ነ ፐንግያ ጶልያ አልኦ ሹቻን፥ ነ ድርሳ ቦንቾ ሹቻን ግምባና።

¹³ ነ ናይት ኡባይ ጎዳፐ ታማራና፤ ነ ናይታ ሳሮተይ ዳራና።

¹⁴ ኔኒ ፅሎተን ምናዳ ኤቃና፤ ገነይነ ኡንኤይ ኔፐ ሃካና። ነና ያሽስያባ ዴና፤ ዳጋም ኔኮ ሺቀና።

¹⁵ ነና ኦላናዉ ደንደይ ደእኮ፥ ሄስ ታፐ ግደና፤ ነና ቆሀናዉ ኮየይ ደእኮ፥ እ ኩንዳና።

¹⁶ “ሄኮ፥ ሁበን ታማ ሁብድ፥ ባ ቆፕዳ ኦላ ሚሽያ ቆፅያ ኡራ ታኒ መስ፤ ይሳና መላ ይሰይሳ መዳይ ታና።

¹⁷ ነና ቆሀናዉ ኦሰትዳ አይ ሚሸይካ ነ ቦላ ኦና፤ ነና ሞትያ እንፃርሳ ኡባስ ነ ዛሮ እማና። ጎዳ አይለታ ላታይ ሀይሳ፤ ታፐ ኤንቲ ኤክያ ፅሎ ሀይሳ” ያጌስ ጎዳይ።