Isayaasa 53 - ጌሻ ማፃፋ

¹ ኑኒ ኦድዳባ ኦን አማንዴ? ጎዳ ቀሰይ ኦደስ ቆንጭዴ?

² እ እያ ስንን መላ ቢታን አጭዳ ዱሩማ መላ፤ ፃጶ የድዳ ዶላ መላ ድጭስ። ኑኒ እያ ሎይ ፄሎና መላ ማል ዎይኮ ቴም ባዋ። ኑኒ እያኮ ሺቆና መላ ጩቹ ማልኦ ግደና።

³ እ አሳን ካትስ፥ እፀትስ፤ እ መቶፐነ አዛኖፐ ሻከት ኤሮና አስ ግድስ። አስ እያ በአናፐ ግድ ባ ሶምኡዋ ዎራ ዛርያ አሳዳ ካትስ፤ ኑኒ እያ ቦንችቦኮ።

⁴ እ ቱማ ኑ ዋይያ ባዉ ኤክስ፤ ቃስ ኑ ዳቡራ ቶክስ። ሽን ኑኒ፥ እ ፆሳን ደሸትድ ኩንድዳዳነ ማዱንፅዳዳ ቆፕዳ።

⁵ ሽን እ ኑ ናጋራ ግሾ፥ ጫደትድ ማዱንፅስ፤ ኑ ቆሁዋ ግሾ ሾጨትድ ሊቅስ። እያ ሴራን ኑኒ ሳሮ ደምዳ፤ እያ ማዱንን ኑኒ ፓፅዳ።

⁶ ኑኒ ኡባይ ኦገ ባልዳ ዶርሳዳ ዎራ ብዳ፤ ኑ ኡባይ ኑ ኦግያ ኦግያ ብዳ። ሽን ጎዳይ ኑ ኡባ ናቁዋ እያ ቦላ ዎስ።

⁷ እ ኡንኤትስ፤ ቆሄትስ፤ ሽን ባ ዶና ዶይቤና። ሹካናዉ ኤፍያ ኡርገ ዶርሳዳ ላገትስ፤ ባ እክስያ ሜድያ ኡራ ስንን ስእ ግያ ዶርሳ መላ አይኮካ ፖግቤና።

⁸ ኤንቲ እያ ኡንኤንነ ጌላ ፕርዳን ኤፍዶሶና፤ እ ታ አሳ ናጋራ ግሾ ሾጨትድ፥ ደኦን ደኤይሳታ ቢታፈ ክችዳይሳ እያ ኮቻፈ ኦን አኬክዴ?

⁹ እያ ዶናን ባል ባይና፥ እ፥ ኢታባ ኦና፥ ባ ሀይቁዋን ኢታ አሳታራ ታይበትስ፤ እያ ዱፎይ ዱረ አሳታራ ግድስ።

¹⁰ ሽን እያ ቆሄተይነ እያ ኡንኤተይ ጎዳ ሸነ ግድስ። እ ባና ናጋራ ያርሾ ኦያ ዎደ ባ ኮቻ በአና። እያ ላይይ አዱቃና፤ ጎዳ ሸነይ እያ ኩሸን ፖለታና።

¹¹ ባ ሸምፑዋ ዋያፐ ጉየ፥ እ ደኦ ፖኦ በአና፤ ኡፋይታና። ታ ፅሎ አይለይ ባ ኤራተን ዳሮታ ፅልሳና፤ ኤንታ ቆሁዋካ ቶካና።

¹² ሄሳ ግሾ፥ ታኒ እያ ግሹዋ ግታ አሳታ ግዶን እማና፤ ምኖታራ እ ድኡዋ ሻከታና። እ ባ ሸምፑዋ ሀይቆስ አድ እምድ፥ ኢታታራ ፓይደትስ። እ ዳሮ አሳ ናጋራ ቶክስ፤ ጌላታስ ጋናትስ።