Isayaasa 52 - ጌሻ ማፃፋ

¹ ነኖ ፅዮነ፥ ባርካ፤ ባርካ፥ ምኖተ አፍላዳ ማአ። ነኖ ጌሻ ካታመ፥ የሩሳላመ፥ ነ ቦንቾ ማኡዋ ማአ። ህዛፐ ጉየ ቃፃረቶናይነ ቱን ነ ግዶ ገለና።

² ነኖ፥ ድኤትዳ የሩሳላመ፥ ነ ባና ቆቆፋ፤ ደንዳዳ ነ አራታ ቦላ ኡታ። ነኖ ፅዮነ አሳዉ፥ ነ ቆን ቃሸትዳ ሳንላታ ብርሻ።

³ ኡባ ሃርያ ጎዳይ ሀይሳዳ ያጌስ፦ “ህንተ ካሰ ጋተይ ባይና ባይዘትደታ፤ ሀእ ቃስ ሚሸ እሞና ጮ ዎዘታና።

⁴ ጎዳይ ሀይሳዳ ያጌስ፦ ታ አሳይ ኮይሮ በተ አስ ግድድ ግብፀ ብስ፤ ጉየፐ አሶረት ታ አሳ ጮ ኡንኤዶሶና።

⁵ ፆሳይ ሀይሳዳ ያግድ ኦዴስ፦ ታ አሳይ ጋተይ ባይና ጮ ድኤትድ ብን፥ ታዉ ሀይሳን አይበ ደኤይ? ኤንታ ሃረይሳት ቶቾሶና፤ ታ ሱንይ ኡባ ዎደ ጫየቴስ።

⁶ ሄሳ ግሾ፥ ታ አሳይ ታ ሱን ኤራና፤ ሄ ጋላስ ሀይሳ ኦደይ ታና ግደይሳ ኤንቲ ኤራና፤ ኤ፥ እ ታና” ያጌስ ኡባ ሃርያ ጎዳይ።

⁷ ሎኦ ምሽራቾ ኤህያ፥ ሳሮተ አዋጅያ፥ አቶተ ኦድያ፥ ፅዮነኮ፥ “ነ ፆሳይ ካዎትስ” ያግሸ ደርያ ቦላራ ያ ቶሆት ዋን ሎኦና።

⁸ ነ ካታማ ናገይሳት ባንታ ቃላ ቁ ኦድ፥ ኡፋይሳን እስፈ የፆሶና። ጎዳይ ፅዮነ ስምያ ዎደ ኤንቲ ባንታ አይፈን በአና።

⁹ ህንተኖ የሩሳላመን ላለትዳ በሳቶ፥ እስፈ ኡፋይሳን የፅተ፤ ጎዳይ ባ አሳ ምንስ፤ የሩሳላመ ዎዝስ።

¹⁰ ጎዳይ ባ ጌሻ ቀስያ ካዎተታ ኡባ ስንን ቆንጭስስ። ቢታ ጋፃ ጋካናዉ ደእያ አሳ ኡባይ ኑ ፆሳ አቶተ በአና።

¹¹ ህንተኖ ጎዳ ሚሽያ ቶከይሳቶ፥ ሻከትተ፥ ሻከትተ፥ ያፐ ከይተ። ቱናባ ቦቾፍተ፤ እያ ግዶፈ ከይተ፤ ህንተና ጌሽተ።

¹² ሽን ህንተ ከይሸ ኤሶን ከየከታ፤ ዎይኮ ጎደትድ ቤከታ። ጎዳይ ህንተፈ ስን አድ ካለና፤ እስራኤለ ፆሳይ ጉየራ ግድድ ህንተና ናጋና።

ዋየ ኤክያ አይለ

¹³ “ሄኮ፥ ታ አይለይ አኬካን ኦና፤ እ ቦንቸትድ፥ ቁ ቁ ጋና፤ ዳሮ ግታታና።

¹⁴ እያ ሶምኦይ አሳ ኡባፈ፥ እያ መይ አሳ ናይታፐ አድ ቆሄትስ፤ እያ በእድ ዳሮ አሳይ ዳጋምዶሶና።

¹⁵ ሽን ሀእ ዳሮ ካዎተት ኡባይ እያባን ማላለታና፤ እያ ጋሶን፥ ዳሮ ካዎት ባንታ ዶና ኦይካና። ኤንቲ ባንታዉ ኦደትቦናባ በአና፤ ስእቦናባ አኬካና” ያጌስ።