Isayaasa 41 - ጌሻ ማፃፋ

እስራኤለ ማዱዋ

¹ ህንተኖ፥ ዩሾይ አባን ተቀትዳ ቢታቶ፥ ስእ ግድ፥ ታኒ ኦደይሳ ስእተ! ደረይ ባንታ ዎልቃ ኦራ፤ ኤንቲ ሃ ሺቅድ፥ ኦደቶ፤ አነ ኑኒ ፕርደታናዉ እስፈ ሺቆስ።

² “ዶሎሀ ባጋፈ እሱዋ ደንድ ብያ በሳ ኡባን ፆኖ እመይ ኦኔ? እ ካዎተታ እያ ኩሸን አድ እሜስ፤ ካዎታ እያዉ ሃርስስ። እ ኤንታ ባ ማሻን ብዶ ከሴስ፤ ባ ዶንግያን ኤንታ ፑኖ ኦስ።

³ እ ኤንታ የደሸ፥ እያ ቶሆይ ካሰ የቦና ኦግያራ ሳሮ ካንስ።

⁴ ሀይሳ ኦዳይነ ፖልዳይ የለተካ ኮይሮፐ ፄግዳይ ኦኔ? ታኒ ጎዳይ፥ ኮይሩዋራ ደአይስ ዉርሰራካ ደኤይ ታና” ያጌስ።

⁵ ዩሾይ አባን ተቀትዳ ቢታት፥ ሄሳ በእድ ያይዶሶና፤ ሳኣ ጋፃን ደኤይሳት ኮኮርዶሶና። ኤንቲ እስፈ ሺቅድ ታኮ ይዶሶና።

⁶ እሶይ እሱዋ ማዴስ፤ ባ እሻ፥ “ምና” ያጌስ።

⁷ ኩሸ ሂላንቾይ ዎርቃ ሼሸይሳ ምንስ፤ ናርቃን ቆፅድ ሌእሰይስ ባቻን ብራታ ሴርሰይሳ፥ “ምና” ጌስ። እ ብራታ ንይሳ፥ “ሎኦ ኦሳ” ያጌስ፤ ኤቃይ ቃፆና መላ ምስማረን ሼስ።

⁸ “ሽን ነኖ እስራኤለ፥ ታ አይልያዉ፥ ታ ዶርዳ ያይቆባ፥ ታ ላግያ አብራሃመ ኮቻዉ፥

⁹ ታኒ ነና ቢታ ጋፃፐ ኤሀስ፤ ሃሆሶፐ ፄጋዳ፥ ‘ኔኒ ታ አይለ’ ታኒ ነና ዶራስ፤ ታኒ ነና የግከ።

¹⁰ ያዮፋ፥ ታኒ ኔራ ደአይስ፤ ዳጋሞፋ፥ ታኒ ነ ፆሳ። ታኒ ነና ምንና፤ ነና ማዳና፤ ታኒ ነና ፆንያ ታ ኡሻቻ ኩሽያን ካትሳና።

¹¹ ነ ቦላ ሀንቀትያ ኡባይ ዬላትድ ካዉያና፤ ኔራ ኤቀተይሳት ባይናባ ግዳና።

¹² ነ ሞርከታ ኔኒ ኮያና፤ ሽን ኤንታ ደማካ፤ ነና ኦለይሳት ባይናባ ግዳና።

¹³ ታኒ ጎዳይ፥ ነ ፆሳይ፥ ነ ኡሻቻ ኩሽያ ኦይካና፤ ያዮፋ፥ ታኒ ነና ማዳና።

¹⁴ ነኖ ጉፁንያዉ፥ ያይቆባ፥ ህንተኖ እስራኤለ አሳዉ፥ ያዮፍተ፤ ታኒ ህንተና ማዳና፤ ህንተና ዎዝያ እስራኤለ ጌሻይ ታና።

¹⁵ ሄኮ፥ ታኒ ነና ኦራ፥ ቃራነ አቻራ ደእያ፥ ካ ቆፅያ ሚሸ ኦስ። ኔኒ ደረታ ቆፃዳ ሊቅሳና፤ ዙማታካ ፑኖ ኦና።

¹⁶ ኔኒ ኤንታ ፑናና፤ ጫርኮይ ኤንታ ኤፋና፤ ሽን ኔኒ ጎዳን ኡፋይታና፤ እስራኤለ ጌሻን ቦንቸታና።”

¹⁷ “ማንቆትነ መቶታንቾት ሃ ኮያና፥ ሽን ደሞኮና፤ ኤንታ ቆይ ሳሞን መላና። ግዶሽን፥ ታኒ ጎዳይ ኤንታ ስአና፤ ታኒ፥ እስራኤለ ፆሳይ፥ ኤንታ አግከ።

¹⁸ ታኒ መላ ዙማታ ቦላ ሻፋ፥ ዛንጋራታን ፑልቶ ሳና። ባዙዋ ሃ ኤልያ በሲ፥ መላ ቢታ ፑልቶይ ከያሶ ኦና።

¹⁹ ታኒ መላ ቢታን፥ ዝጋ፥ ሶቃላ ም፥ ባርሰኔተ ምነ ሻማሆ ዶልሳና። መላ ቢታ ፂድ፥ ማሮይነ ጫጭ ኩምዳ ቢታ ኦና።

²⁰ እስራኤለ ጌሻይ ሄሳ መዳይሳነ ጎዳ ኩሸይ ሄሳ ኦዳይሳ አሳይ በአና፥ ኤራና፥ ቆፓናነ አኬካና መላ ታኒ ሄሳ ኦስ።”

²¹ “አነ ህንተ ሞቱዋ ሺሽተ” ያጌስ ጎዳይ፤ “አነ ህንተ ማርካ ሃ ኤህተ” ያጌስ ያይቆባ ካዎይ።

²² አነ ኤንቲ ባንታ ኤቃታ ሃ ኤሆ፥ አይብ ሀናኔኮ ኤንታ ኤቃት ኑስ ኦዶ። ኑኒ አኬካና መላነ ኤንታ ዉርሰ ኤራና መላ ካሰ ሀንዳባይ አይበኮ ኑስ ኦዶ፤ ዎይኮ ስንፈ ሀናናባ ኑስ ቆንጭሶ።

²³ ህንተ ፆሳታ ግደይሳ ኑኒ ኤራና መላ ስንፈ ያናዉ ደእያባ ኑስ ኦድተ። ኑኒ ዳጋማና መላነ ያያና መላ፥ ሎኦ ግድን ኢታ ግድን አነ እስባ ኦተ።

²⁴ ሽን ህንተ ባይናባ መላ፤ ህንተ ኦሶይካ ሀዳ፤ ህንተና ዶርያ አሳይካ እፀትዳይሳታ።

²⁵ ታኒ ፑደሀ ባጋፈ እሱዋ ደንን፥ እ ዬስ። ታ ሱን ፄግያ እሶይ ዶሎሀፐ ያና፤ ኦቶ መይስ ኡርቃ የይሳዳ፥ እ ካለይሳታ የና።

²⁶ ኑኒ ኤራና መላነ እ ልከ ጋና መላ ካሰትድ ኑስ ሀይሳ ኦድዳይ ኦኔ? ህንተፈ ኦንካ ካሰትድ ሀይሳ ቆንጭስዳይ፥ ዎይኮ አዋጅዳይ ዎይኮ ባ ቃላ ስስዳይ ባዋ።

²⁷ ታኒ ሀይሳ ካሰታዳ ፅዮነስ ኦዳስ፤ ታኒ የሩሳላመስ ምሽራቾ ኦደይሳ እማስ።

²⁸ ሽን ታኒ ፄልያ ዎደ እሶይካ ባዋ፤ ታኒ ዞረ ኦይችያ ዎደ ኤንታ ኤቃታ ግዶፈ ዛሮ እምያ እሶይካ ባዋ።

²⁹ ሄኮ፥ ኤንቲ ኡባይ ሀዳ፤ ኤንታ ኦሶይካ ፓና፤ ሼሽድ መዳ ኤንታ ምስለትካ ጫርኮ።