Isayaasa 32 - ጌሻ ማፃፋ

ፅሎተ ኩምዳ ካዎተ

¹ ሄኮ፥ ካዎይ ፅሎተን ካዎታና፤ ሃረይሳት ሱረተን ሃራና።

² እስ እስ አስ ባ ሁጰን ጫርኮፈ ጌምያ በሲ፥ ጎተፐ ቆሰትድ አትያ በሲ ግዳና። መላ ቢታን ጎግያ ሃ መላነ ሳሞ ቢታን ግታ ዛላ ኩያ መላ ግዳና።

³ ፄልያ አሳታ አይፈይ ቅልምኤና፤ ስእያ አሳታ ሀይይ ሀይዝድ ስአና።

⁴ ኤሶትያ አሳ ዎዛናይ ኤራናነ አኬካና። ደዶትያ አሳ እንፃርሳይ ብለታና፤ ጌሽድ ኦደታና።

⁵ ህዛፐ ጉየ ኤይ አስ ኤራንቾ ጌተተና፤ ኢታ አስ ቦንቸተና።

⁶ ኤያይ ኤያተ ኦደቴስ፤ እያ ዎዛናይ ናጋራ ቆፔስ። ጎዳ ቦላ ምኖባ ኦደቴስ፤ እያ ቦላ ኢታባ ማቀቴስ፦ ኮሻትዳይሳስ ካ እመና፤ ሳሞትዳይሳ ሃ ድጌስ።

⁷ ገነ አሳ ቆፋይ ኢታ፤ ማንቆት ሱረባ ኦደትኮካ ኤንታ ይሳናዉ ዎርዶን ኢታ ቆፋ ቆፔስ።

⁸ ሎኦ አስ ሎኦባ ሀልቼስ፤ ሄ ሎኦ ሀልቹዋን ምንድ ደኤስ።

የሩሳላመ ማጫሳ

⁹ ህንተኖ ቆፍ ባይና ደእያ ማጫሳዉ፥ ደንድተ፤ ታ ኦደይሳ ስእተ፤ ህንተኖ አማነትድ ደእያ ማጫ ናይቶ፥ ታ ህንተዉ ኦደይሳ ስእተ።

¹⁰ ላይ ኩሞና ህንተ አማነትድ ደኤይሳት ኮኮራና፤ ዎይነ እያ ዎድያን ማፀከታ፤ ቶክዳባፐ አይፈ ሺሸከታ።

¹¹ ህንተኖ እንጀትን ደእያ ማጫሳዉ ኮኮርተ። ህንተኖ አማነትድ ደእያ ማጫ ናይቶ ያይተ። ህንተ ማኡዋ ቃርድ ካዮ ማኦ ህንተ ፄሳን ዳንጭተ።

¹² ሎኦ ጋደን አይፍያ ዎይነይ ይዳ ግሾ፥ አዛንድ ህንተ ትራ ቆፅተ።

¹³ አጉንነ ክንቾተይ ታ አሳ ጋድያን ዶልስ። አሳይ ኡፋይትድ ደእዳ ኬታስነ ካታማስ ዬክተ።

¹⁴ ካዎ ኬይነ ዳሮ አሳይ ደእያ ካታማይ ባይሳታና፤ ሚፃትነ ግምበ ሻኮት መርናዉ ላለታና፤ ዎራ ሀረት ኡፋይትያ በስነ ዶርሳ ዉደይ ሄመትያ በሲ ግዳና።

¹⁵ ሄስ ሀናናይ፥ አያናይ ኑ ቦላ ጉካና ጋካናዉ፥ መላ ቢታይ አራዳና ጋካናዉነ አራዳ ቢታይ ዎራ ግዳና ጋካናሳ።

¹⁶ ሄሳፈ ጉየ፥ መላ ቢታን ሱረ ፕርድ፥ አራዳ ቢታን ፅሎተ ዳና።

¹⁷ ፅሎተ ሳሮተ ኤሀና፥ ዎፓተነ አማነተ መርናዉ ቢታ ኩማና።

¹⁸ ታ አሳይ ሳሮይ ኩምዳ ኬን፥ አማንያ በሳንነ ዎፑ ግዳ ሶን ሸምፕድ ዳና።

¹⁹ ሻች ቡክድ ዎራ ይስያኮካ፥ ቃስ ካታማይ ኩም ላለትያኮካ፥

²⁰ ሻፋታ ጋፃን ህንተ ካ ዘርድ፥ ህንተ መህያስነ ህንተ ሀረታስ ሄን በሲ ደመይሳት ህንተ አንጀታና።