Isayaasa 30 - ጌሻ ማፃፋ

እፃስ ግያ ደርያ አየ!

¹ ጎዳይ፥ “ጌላ ናይታ አየ! ታኒ ሀልቻቦና ኦሶና፤ ታ አያናን ግዶናሽን ባንታ ሸነን ጫቅድ ናጋራ ቦላ ናጋራ ጉጀይሳታ አየ!

² ታና ዞረ ኦይቾና ግብፀ ዎኦሶና። ፓሮና ሚፃ ባንታዉ ተቀ፥ ግብፀ ባንታዉ ሸምፕያ ኩያ ኦሶና።

³ ሽን ፓሮና ሚፃይ ህንተዉ ዬላ፥ ግብፀ ኩያይ ህንተዉ ካዉሻተ ግዳና።

⁴ ኤንታ ሀላቃት ፃነሳን ደእኮካ፥ ኤንቲ ኪትዳይሳት ሀኔሳ ካታማ ጋክኮካ፥

⁵ ዬላፈ አትሽን፥ ሀራ ማደይነ ጎእ ባይና ግሾ እያን አማነትያ ኡባይ ካዉያናነ ዬላታን” ያጌስ።

⁶ ነገባን ደእያ ዶአታባ ጎዳይ ኦድዳይ ሀይሳ፦ ኪተትዳይሳት መቶይነ ኡንእ ደእያ ቢታራ፥ አደ ጋሞይነ ማጫ ጋሞይ ዎራራ፥ ኢታነ ፆንገትያ ሾሻት ደእያ ባዙዋራ ካንድ ባና። ሀረታነ ግማለታ ዞኮን ባንታ ዱረተ ጫንድ ኤንታ አይኮካ ማዶና ቢታ ባና።

⁷ ግብፀይ አይኮካ ማደና፤ ሄሳ ግሾ፥ ታኒ እያ፥ “ፓና ራኣባ” ያጋዳ ፄጋና።

⁸ ሀእ ባዳ ስንራ ያና ዎድያስ መርና ማላ ግዳና መላ ኤንታ ስንን ሹቻ ዎጫዳ ፃፋ፤ ማዝጋበንካ ፃፋ።

⁹ ኤንቲ ጌላነ ዎርዳንቾ ናይታ፤ ኤንቲ ጎዳይ ኦድያባ ስአናዉ ኮዮና ናይታ።

¹⁰ ኤንቲ ቆንጨ በኤይሳታ፥ “ቆንጨ በኦፕተ” ያጎሶና። ናበታ፥ “ኡፋይስያባነ ጭምያባ ኦድተፐ አትሽን፥ ሱረባ ኦዶፕተ።

¹¹ ኦግያፐ ክችተ፤ ሆሮጋፐ ሃክተ፤ እስራኤለ ጌሻራ ኑና ሶምኦን ጋፍተ” ያጎሶና።

¹² ሄሳ ግሾ፥ እስራኤለ ጌሻይ ሀይሳዳ ያጌስ፦ “ህንተ ሀ ቃላ እፅድ፥ ገነንነ ጭሞን አማነትዳ ግሾ፥

¹³ ሀ ናጋራይ ህንተዉ ዛእድ ዎድያ፥ አኬኮና ኤለስድ ኩንድያ አዱሳ ግምበ መላ ግዳና።

¹⁴ እያ መቆይ ኡርቃፈ መዳ ኦቶ መላ ድፕ ግድ መቃና። ሄ መቁዋ ግዶፈ ታማ ካሽያ ዎይኮ ሃ ዱቅያ ኩንእ በንተና” ያጌስ።

¹⁵ እስራኤለ ጌሻይ፥ ኡባ ሃርያ ጎዳይ፥ ሀይሳዳ ያጌስ። “ስሞንነ ሸምፖን ህንተ አታና፤ ስእ ጉሳንነ አማነተን ህንተዉ ዎልቃ ግዳና፤ ሽን ህንተ እፅደታ።

¹⁶ ህንተ፥ ‘አካይ፥ ኑኒ ፓራ ቦላ ኡትድ ባቃታና’ ያግደታ፤ ሄሳ ግሾ፥ ህንተ ባቃታና። ቃስ ህንተ፥ ‘ኤሶትያ ፓራ ቶግድ ባና’ ” ያግደታ፤ ሽን ህንተና የደይሳት ህንተፈ አ ኤሶታና።

¹⁷ እስ ቶራንቹዋ በእድ ህንተፈ ሙኩሉ አሳይ ባቃታና፤ እቻሹ ቶራንቾት ህንተና ኡባ የደና። ዙማ ሁጰን ኤቅዳ ባንድራ ምዳ ዎይኮ ዙማ ቦላ ደእያ ማላዳ ህንተ ሀናና ጋካናዉ ህንተና የደና።

¹⁸ ሽን ጎዳይ ህንተዉ ኬሀናዉ ናጌስ፤ ጎዳይ ፅሎ ፕርድያ ፆሲ ግድያ ግሾ ህንተዉ ቃታናዉ ደንዳና። እያ አማነትድ ናግያ ኡባይ አንጀትዳይሳታ።

¹⁹ ህንተኖ፥ የሩሳላመን ደእያ ፅዮነ አሳዉ፥ ህዛፐ ጉየ ዬከከታ። ፆሳይ ቃን ኩምዳ ፆሲ ግድያ ግሾ፥ ህንተ ማደ ኮይድ እያኮ ዋስያ ዎደ ህንተዉ ዛሮ እማና።

²⁰ ጎዳይ ህንተዉ መቶ ካነ ኡንአ ሃ እምኮካ፥ ህንተ አስታማረይ ህዛፐ ባና ቆሰና። ሽን ህንተ አይፈይ ህንተ አስታማርያ በአና።

²¹ ህንተ ኡሻች ዎይኮ ሀድርስ ስምያ ዎደ፥ ጉየራ ህንተና፥ “ኦገይ ሀይሳ፤ እያራ ቢተ” ግያ ቃላ ህንተ ስአና።

²² ብራንነ ዎርቃን አሌቀትዳ ኤቃ ምስለታ ህንተ ቱንሳና። ቱና ጩርቃዳ ህንተ ኤንታ፥ “ኑፐ ሃክተ” ያግድ ዎራ ሆላና።

²³ ሄ ዎደ እ፥ ህንተ ቢታን ዘርዳ ካስ እራ ቡክሳና፤ ቢታፈ ዶልያ ካይ ዳሮነ ሙሩታ ግዳና። ሄ ጋላስ ህንተ መሄይ ዳልጋ ደንባን ሄመታና።

²⁴ ጎሻ ቦራትነ ሀረት ግላን ፑነትዳ ጌሻ ሀርቁዋ ማና።

²⁵ አስ ዉርያ ዎደ ሚፃት ላለትያ ጋላስ ደረታነ ዙማታ ቦላፈ ፑልቶ ሃ ጎጋና።

²⁶ ሄ ጋላስ አጌና ፖኦይ አዋ ፖኦዳ ሀናና፤ አዋ ፖኦይ ካሰይሳፈ ላፑን ኩሸ ዳራና፤ ላፑን ጋላስ ፖኡዋ መላ ግዳና። ሄ ኡባይ ሀናናይ ጎዳይ መቅዳ ባ አሳ ኮልያ ዎደነ እ ደችን ማዱንፅዳ አሳ ፓያ ዎደ።

²⁷ ሄኮ፥ ጎዳ ሱንይ ሱልያ ሀንቁዋራ፥ ምዳ ጩያ ሻራራ ሃሆ በሳፈ ያና። እያ ዶናን ሀንቆይ ኩምስ፤ እያ እንፃርሳን ምያ ታም ደኤስ።

²⁸ እያ ፔኖይ፥ ቆ ጋካናዉ ክፅድ፥ ኡባባ ፕትድ ኤፍያ ሃ ክፃ መላ። እ፥ ካዎተታ ዮ ዛርዛረን ሀርቃና፤ አሳ ጋፓታ ብፃልድ ኦገ ባለና።

²⁹ ጌሻ ባለይ ቦንቸትያ ጋላስ የፀይሳዳ፥ ህንተ የፃና። ጎዳ ዙማኮ፥ እስራኤለ ዛላኮ ብያ ዎደ ሱሱልኤ ፑንሸ የፅያ አሳይ ኡፋይተይሳዳ ህንተ ኡፋይታና።

³⁰ ጎዳይ ባ ያሽያ ቃላ ስሳና፤ ባ ሱልያ ሀንቁዋን፥ ታማ ላጩዋን፥ ጎትያን፥ ኡሹዋንነ ሻቻን ባ ቀስያ ቆንጭሳና።

³¹ ጎዳይ ባ ግርሳን አሶረ ዳጋንና፤ እያ ፃምአይ ኤንታ ሾጫና።

³² ጎዳይ ኤንታ ባ ሴርያ ፃምአን ኤንታ ሾጭያ ዎደ እያ አሳይ ካራቦራነ ዲራ የፃና። ባ ቀስያ ደንድ ኤንታ ሾጫና።

³³ በንፐ ዶምድ አሶረ ካዎይ ፁሳ ቶፈታ ጌተትያ በሲ ጊግስ። ሄ በሳይ ኦላነ ዳልጋ፤ ቃስ ዳሮ ም ዶረትድ ደእያ በሲ። ጎዳ ፔኖይ ዲነ ሻፋዳ ጎግድ፥ ሄ ታማ ኤና።