Isayaasa 26 - ጌሻ ማፃፋ

ፆኖ ማዝሙረ

¹ ሄ ጋላስ ይሁዳ ቢታን ሀ ማዝሙረይ የፀታና። ኑስ ምኖ ካታም ደኤስ፤ ፆሳይ አቶተ እያ ዩሹዋን ግምበነ ሚፃ ኦስ።

² ባ አማኑዋ ናግያ ፅሎ ደረይ፥ ገላና መላ ካረታ ዶይተ።

³ እ ነናን አማነትዳ ግሾ፥ ባ ዎዛና ነናን ዎዳ ኡራ፥ ኔኒ ፖሎ ሳሮተን ናጋሳ።

⁴ ጎዳይ መርና ዛላ ግድያ ግሾ፥ ጎዳን መርናዉ አማነታ።

⁵ ቃን ደኤይሳታ ዝቅ ኦስ፤ ቁ ግዳ ካታማ ካዉሽስ። እያ ሳአን ዱገ የግስ፤ ቢታ ባናን ሆልስ።

⁶ ማንቆት እያ የና ኡንኤትዳይሳት እያ ቦላራ ሄመታና።

⁷ ፅሎታ ኦገይ ሱረ፤ አቤት ፅሉዋዉ፥ ኔኒ ፅሎታ ኦግያ ጊግሳሳ።

⁸ አቤት ጎዳዉ፥ ኑኒ ነ ህግያ ናጋናዉ አሞቶስ፤ ነ ሱን ቦንቾይነ ነ ቴማይ ኑ ዎዛና አሞ።

⁹ ቃማ ታኒ ነና ላሞታስ፤ ዎንታ ታ አያናይ ነና ምንድ ኮዬስ። ነ ቢታ ፕርዳናዉ ያ ዎደ፥ ሳአን ደእያ አሳይ ፅሎተ ታማሬስ።

¹⁰ ኢታ አሳስ ኬሀተ ኦሰትኮካ፥ እ ፅሎተ ታማረና። ሱረ ቢታን ኢታባ ኦስ፤ ጎዳ ግታተ ኤረና።

¹¹ አቤት ጎዳዉ፥ ነ ኩሸይ ቁ ግስ፤ ሽን ኤንቲ በኦኮና። ነ አሳስ ኔኒ ምሸትያ ምሻ በእድ ዬላቶ። ኔኒ ነ ሞርከታስ ጊግስዳ ታማይ ኤንታ ምድ ይሶ።

¹² አቤት ጎዳዉ፥ ኑስ ሳሮተ እማዳሳ፤ ኑ ኦሶ ኡባ ነ ኦዳሳ።

¹³ አቤት ጎዳዉ፥ ኑ ፆሳዉ፥ ሀራ ጎዳት ኑና ሃርዶሶና፤ ሽን ኑኒ ነ ሱን ፃላላ ቦንቾስ።

¹⁴ ኤንቲ ሀይቅዶሶና፤ ስሚድ ደኦን ዶኮና። ነ ሴርን ይዳ ግሾ፥ ዛሪድ ደንዶኮና። ኤንታ ቆፍሱዋ ኡባ ቁቻዳ ይሳዳሳ።

¹⁵ አቤት ጎዳዉ፥ ኔኒ ካዎተ ዳርሳዳሳ፤ ካዎተ ዳርሳዳ ኔኒ ቦንቸታዳሳ፤ ቢታ ዛዋ ኡባ ዳልግሳዳሳ።

¹⁶ አቤት ጎዳዉ፥ መቶ ዎደ ኤንቲ ነና ኮይዶሶና። ነ ኤንታ ሴርዳ ዎደ ነና ካልካሽድ ዎስዶሶና።

¹⁷ አቤት ጎዳዉ፥ ቃንትዳ ማጫስ፥ የሎ ዎደይ ጋክን ኡንኤታዳ ዋሰይሳዳ፥ ኑኒ ነ ስንን ሄሳዳ ሀንዳ።

¹⁸ ኑኒ ቃንትዳ፤ እቀትዳ፤ ሽን ጫርኮ የልዳ። ኑኒ ሳኣስ አቶተ ኤህቦኮ፤ ቢታን ደእያ አሳ የልቦኮ።

¹⁹ ሀይቅዳ ነ አሳይ ፓፃና፤ ኤንታ አሀይ ደንዳና። ህንተኖ፥ ቢታ ጋርሳን ደኤይሳቶ፥ ደንድድ ኡፋይሳ ማዝሙረ የፅተ። ህንተ አካይ ዎንታ አካ መላ፤ ቢትያ ሀይቅዳይሳታ ዛራዳ እማና።

²⁰ ታ አሳዉ፥ ብድ ህንተ ሶ ገልድ፥ ካርያ ህንተ ቦላ ጎርድተ። ጎዳ ሀንቆይ አና ጋካናዉ፥ ጉ ዎደስ ህንተና ቆስተ።

²¹ ቢታ ቦላ ደእያ አሳ፥ ኤንታ ናጋራ ግሾ ሴራናዉ፥ ጎዳይ ባ ደእያ በሳፈ ከይድ ዬስ። ቢትያ ባ ቦላ ጉክዳ ሱ ቆንጭሳና፤ ሀይቅዳይሳታ ዛራዳ ገንኩ።