Isayaasa 23 - ጌሻ ማፃፋ

ፅሮሳስ ኦደትዳ ትንብተ

¹ ፅሮሳ ካታማስ ኦደትዳ ጎዳ ቃላይ ሀይሳ። ፅሮሳ ካታማን ኬ ዎይኮ ሸምፕያ ሶይ ባይና ግሾ ህንተኖ ታርሰሳ ማርካብያ ላገይሳቶ ዬክተ! ቆጵሮሳ ቢታፈ ሀ ዎረይ ህንተኮ ይስ።

² ህንተኖ፥ አባ ማታን ደእያ አሳዉ፥ ህንተኖ አባ ቦላራ ሄመትያ ዱረትዳ፥ ስዶና ዛልአንቾቶ፥ ስእ ጊተ!

³ ህንተዉ ያ ካይ፥ ናይለ ሻፋፐ ጫከትዳ ሽሆራ ቢታ ካ፤ ህንተ ካዎተታስ ዛልኤ በሲ።

⁴ ነኖ ስዶና ካታማዉ፥ አባ ማታን ደእያ ሚፃዉ፥ አባይ፥ “ታኒ እቀታብከ፤ የላብከ፤ አደነ ማጫ ናአ ድቻብከ” ያግድ ኦድዳ ግሾ ዬላታ።

⁵ ሄ ዎረይ ግብፀ ቢታ ጋክያ ዎደ ኤንቲ ፅሮሳባ ስእድ ዳጋማና።

⁶ ህንተኖ አባ ማታን ደእያ አሳዉ፥ ዘሌልሸ ታርሰሳ ፕንተ።

⁷ በን ዎደ ኬፀትዳ ካታማይ፥ እያ ቶሆይ እያ ሃሆ ቢታ ኤፍዳይነ ህንተ እያን ኡፋይትያ ፅሮሳ ካታማይ ሀይሴ?

⁸ ካላቻ ዎስስያ ካታማ፥ እያ ዛልአንቾት ሀላቃታ ግድዳነ እያ ግዶን ባይዘይሳትነ ላመይሳት ቦንቸትዳይሳታ ግድዳ ፅሮሳ ካታማ ቦላ ሀይሳ ሀልችዳይ ኦኔ?

⁹ ኦቶራንቾታ ቦንቾ ኡባ ጉናዉነ ቢታ ቦላ ቦንቸትዳ ኡባ ካዉሻናዉ ኡባፈ ዎልቃማ ጎዳይ ሀይሳ ሀልችስ።

¹⁰ ህንተኖ፥ ታርሰሳ አሳዉ፥ ህንተና ተቅያባይ ባይና ግሾ፥ ናይለ ሻፋዳ ቢታ ቦላ ኩምድ ጎግተ።

¹¹ ጎዳይ አባ ቦላ ባ ኩሽያ ምጭስ፤ እያ ካዎተ ቃስ። ካናነ ሚፃ ላላና መላ ጎዳይ ኪትስ።

¹² ጉጅድካ፥ “ህንተኖ፥ ኡንኤትዳ ስዶና አሳዉ፥ ህንተ ኡፋይሳን የፅያ ዎደይ ዉርስ። ደንድድ ቆጵሮሳ ፕንተ፤ ያንካ ህንተ ሳሮ ደመከታ” ያግስ።

¹³ ባብሎነ ቢታ በእተ፤ ሄ ቢታይ ሀእ ፓናባ ግድስ። አሶረ አሳይ ሄ ቢታን ዶእ አቃናዳ ኦስ። ኤንቲ ያን ደእያ ዎጋ ኬታ ላልድ ባንታዉ ሚፃ ግምብዶሶና፤ ቢታ ባይሳ ኦዶሶና።

¹⁴ ህንተኖ፥ ታርሰሳ ማርካበቶ፥ ህንተ ሚፃይ ላለትዳ ግሾ፥ ዘሌልተ።

¹⁵ ፅሮሳ ካታማይ እስ ካዎስ ደኦ ላይ ግድያ ላፑን ታሙ ላይ ዶገትድ ዳና ዎደይ ያና። ላፑን ታሙ ላይ ዉርያ ዎደ ላይማ ማጫሳስ የፀትያ የ መላ ፅሮሳ ካታማስ የፀታና።

¹⁶ ኤንቲ፥ “ነኖ ዶገትዳ ላይማ ካታማዉ፥ ነ ዲ ኤካዳ ካታማራ ዩያ። ነና አሳይ ሀሳያና መላ ማልኦ ቃላን ዳሮ የ የፃ” ያጋና።

¹⁷ ላፑን ታሙ ላይይ ፖለትያ ዎደ፥ ጎዳይ ፅሮሳ ፆሞሳና። ሽን ሄሳፈ ጉየ፥ እ በን ባ ላይማተ ኦሱዋኮ ስማና፤ ሳአን ደእያ ካዎተታ ኡባራ ላይማታና።

¹⁸ ግዶሽን፥ እያ ዛልእያ ዎይነ እያ ዳሞዘይ ጎዳስ ዱማትዳይሳ ግዳና፤ እያ ዛልእያ ዎይነ ካነ ሎኦ ማኦ ሻማናዉ፥ ጎዳስ ኦያ አሳስ እመታናፐ አትሽን፥ ሚሸ ኬን ዎይኮ ምንጃ ኬን ኡተና።