Isayaasa 17 - ጌሻ ማፃፋ

ዳማስቆይ ያና

¹ ዳማስቆባ ጎዳይ ሀይሳዳ ያጌስ፦ “ሄኮ፥ ህዛፐ ጉየ ዳማስቆይ ካታማ ግዶኖሽን፥ ላለ ዶረ ግዳና።

² አሮራ ካታማት አስ ባይና ባይሳ ቢታ ግዳና፤ ያን መሄይ ሄመታና፤ ኤንታ ያሽያባይ ዴና።

³ ኤፍሬማፐ ሚፃት፥ ዳማስቆፈ ካዎተይ ያና፤ ሶረፐ አትዳ ጉት እስራኤለ አሳ ቦንቹዋ መላ ግዳና” ያጌስ ኡባፈ ዎልቃማ ጎዳይ።

⁴ “ሄ ዎደ እስራኤለ ቦንቾይ ቃረታና፤ እያ ኦርደተይ ግልቃና።

⁵ እስራኤለይ፥ ካ ጫክ ኤክድ ከይዳ ጎሻ ጋደ መላ ግዳና፤ ዎይኮ ካ ጫክ ስምን ካሎትዳ ራፋይመ ዛንጋራ መላ ግዳና።

⁶ ሻማሆ ቆቆፍ ስምን፥ ፄራን ናምኡ ዎይኮ ሄ አይፈት አተይሳዳ ዎይኮ እስ ያንግያ ቦላ ኦይዱ ዎይኮ እቻሹ አይፈት አተይሳዳ እስራኤለፐ ጉት አታና” ያጌስ ጎዳይ እስራኤለ ፆሳይ።

⁷ ሄ ጋላስ አሳይ ባንታና መዳይሳኮ፥ ባንታ አይፍያካ እስራኤለ ጌሻኮ ዛራና።

⁸ ኤንቲ ባንታ ኩሸን ጊግስዳ ያርሾ በሳኮ ፄሎኮና፤ አሼራ ኤቃ ምስልያስ ግድን፥ እፃነ ጩይሳናዉ ኤንቲ ባንታ ኩሸን መዳ ያርሾ በሳ ቦንቾኮና።

⁹ ሄ ዎደ እስራኤለ አሳ ጋሶን ህወነ አሞረ ካታማት ላለትዳይሳዳ ኤንታ ምኖ ካታማት ላለታና፤ ባይሳ ግዳና።

¹⁰ ህንተ ህንተና አሽያ ፆሳ ዶግደታ፤ ህንተ ቆሰት አትያ ዛላ ቆፕበከታ። ሄሳ ግሾ፥ ኔኒ ሎኦ ምነ ካረ ቢታፈ ይዳ ሎኦ አታክልትያ ቶክኮካ፥

¹¹ ሄ ጋላስ ኤንቲ ድጭድ ጋካና መላ ኦኮካ፥ ቃስ ኔኒ ዘርዳ ዎንተ ኤንቲ ጪያኮካ ኔኒ አይፈ ደማካ። እያ በሳን ፓፆና ሀርገነ መቶ ጫካና።

¹² ሄኮ፥ አባ ቤታዳ ጉምያ ዳሮ አሳ፥ ቃስ ዎልቃማ ሃዳ ዋስያ ካዎተታ አየ!

¹³ ካዎተት ዳሮ ሃዳ ጉሞሶና፤ ሽን ጎዳይ ኤንታ ሴራና። ኤንቲ ዙማ ሁጰን ደእያ ቡረ ጫርኮይ ደንይሳዳነ ጎተይ ባና ደንይሳዳ ኤንታ ደንድ ሃሆ በሲ ላላና።

¹⁴ ሳእ ቃምያ ዎደ ኤንቲ ዳጋማና፤ ሳእ ዎንታናፐ ስን ኤንቲ ያና። ኑና ዎልቃን ኤከይሳታነ ቦንቀይሳታ ቃዳይ ሀይሳ።