Isayaasa 16 - ጌሻ ማፃፋ

¹ ሞአበ አሳዉ፥ ባዞ ብያ ኦግያን ደእያ ሴላፐ ኡርገ ዶርሳታ እሞታ ኦድ፥ የሩሳላመን ደእያ ቢታ ሃረይሳስ የድተ።

² ሞአበ ማጫሳይ ባንታ ኬፈ ጎደትዳ ካፎታዳ አርኖና ሻፋ ፕንያ በሳን ላለታና።

³ ሞአበ አሳይ ይሁዳ አሳኮ፥ “ኑና ዞርተ፤ ኑና ኑ ሞርከታፐ አሽተ፤ ሴታ ጋላሳን ም ኩያዳ ህንተ ኩያ ኑ ቦላ ኩያይተ። ጎደተይሳታ ቆስተ፤ ቆሰትዳይሳታ አድ እሞፕተ።

⁴ ሞአበፐ ጎደተይሳት ህንተ ግዶን ደኦ፤ ኤንታ ይሳናዉ ኮየይሳታፐ ቆሰትድ አትያ በሰ ግድተ። ኤንታ ኡንኤይሳት ዉርዶሶና፤ ኤንታ ዮይ አትስ፤ ኦቶራንቾት ቢታፈ ይዶሶና።

⁵ ሄሳፈ ጉየ፥ ሲቆን እስ ካዎተ አራታይ ኤቃና፤ ሄ አራታን፥ ዳዊታ ኮቻፈ እስ አማነትያ ካዎይ ኡታና። እ ሱረተ ኮያና፤ ፅሎተ ኦናዉ ኤለሳና” ያጋና።

⁶ ይሁዳ አሳይ፥ “ሞአበ አሳይ አይ መላ ኦቶርያኮ ኑ ኤንታ ኦቶሩዋ ስእዳ፤ ኤንታ ጬቁዋነ ኤንታ ጫሻ ስእዳ፤ ሽን ኤንታ ኦቶሮይ ሀዳ” ያጋና።

⁷ ሄሳ ግሾ፥ ሞአበይ ባዉ ዬኮ፤ አስ ኡባይካ ሞአበስ ዬኮ። ቅር-ሄሬሳን ህንተ ደእያ ዎደ ምዳ ሎኦ ካ ሀሳይሸ ዬክተ።

⁸ ሀሰቦና ጎሻይነ ሰባማ ዎይነ ጋደይ ይስ። ካዎተታ ሀላቃት የረዳ ታሸት መላ ቢታ ካንድ ያእዜራ ጋክዶሶና፤ ኤንታ አጫይ ዳይድ፥ አባ ፕንስ።

⁹ ታኒ ያእዜራ ካታማስ ዬክዳይሳዳ ሰባማ ካታማ ዎይነታስ ዬካይስ። ሀሰቦና ካታማስነ ኤልኣላ ካታማስ፥ ታኒ ታ አፉ ጉሳይስ። ህንተ ም አይፍያነ ህንተ ቦትዳ ካ ቦላ ኦል ደንድስ።

¹⁰ ጎሻ ጋድያፐ ኡፋይስነ ሀሹ ጉስ ኤከትስ። ዎይነ ጋድያን ማዝሙረይ የፀተና። ኡፋይሳን ዎይነ ጉምእያ በሳን ጉምእያ አስ ባዋ፤ ታኒ ጉምኤይሳታ እልልሳ ይሳስ።

¹¹ ሄሳ ግሾ፥ ታ ዎዛናይ ሞአበስ፥ ታ ጋርሳ አሳተይካ ቅር-ሄሬሳስ ዬኬስ።

¹² ሞአበይ ባ ዙማ ቦላ ከይኮካ፥ ባና ጮ ዳቡርሴስ፤ እ ዎሳናዉ ባ ኤቃ ኬ ገልኮካ ባና አይኮካ ማደና።

¹³ ጎዳይ ካሰትድ ሞአበባ ኦድዳ ቃላይ ሀይሳ።

¹⁴ ሽን ሀእ ጎዳይ፥ “ኡነ ኦሳንቾ ዎደይ ጉ ግደይሳ መላ ሞአበ ቦንቾይነ እያ ዳሮተይ ሄ ላይ ግዶን ዉራና። እያን አትያ አሳይ ፓናይሳታነ ዎልቅ ባይናይሳታ ግዳና” ያጌስ።