Isayaasa 14 - ጌሻ ማፃፋ

ድኦፐ ስሞ

¹ ጎዳይ ያይቆባስ ቃታና፤ እስራኤለ ዛሪድ ዶራና፤ ኤንታ፥ ኤንታ ቡዞ ቢታን ዎና። በታንቾት ኤንታራ እስፋና፥ ያይቆባ ሶ አሳራ ኦይከታና።

² ካዎተት ኤንታ፥ ኤንታ ቢታ ኤሀና። እስራኤለ አሳይ ኤንታና ማጫነ አደ አይለ ኦድ ጎዳ ቢታን ሃራና። ኤንቲ ባንታና ድእዳይሳታ ድአና፤ ባንታና ሃርዳይሳታ ሃራና።

³ ጎዳይ ህንተና፥ ህንተ ኡንኣፈ፥ መቱዋፐነ ህንተ ሃረትዳ ኢታ አይለተፈ ሸምፕስያ ዎደ፥

⁴ ህንተ ባብሎነ ካዋ ቦላ ሀይሳዳ ያግድ ቀልቅሳና። ኡንኤይስ ዋንድ አግዴ? እያ ሀንቁዋ ሱላይ ዋንድ አትዴ?

⁵ ጎዳይ ካዎተታ ፃምኣነ ሃረይሳታ ጉምባ መንስ።

⁶ ኤንቲ አሳ ዛው ባይና ሀንቁዋን ሾጭዶሶና፤ ባንታና ፆንዳይሳታ ቃንፆና ኡንኤሸ ደእዶሶና።

⁷ ሽን ቢታ ኡባይ ሸምፕድ ደእስ፤ ኡፋይሳን የፅስ።

⁸ ሀር አቶሽን፥ ልባኖሰ ዝጋትነ ፂዳት ካዋ ኩንደን ኡፋይትድ፥ “ኔኒ ካዉያዳ ኩንድዳፐ ጉየ፥ ኑና ቃንፃናዉ የይ ባዋ” ያጎሶና።

⁹ ኔኒ ያ ዎደ፥ ስኦለይ ነና ሞካናዉ ጊግስ፤ እ ካሰ ቢታ ካለዳ አሳ ሞይትለታ፥ ነና ሳሮና መላ ደንስ፤ ቃስ ካሰ ካዎ ግድዳ ኡባ ኤንታ አራታፐ ደንድ ኤሴስ።

¹⁰ ኤንቲ ኡባይ ሀይሳዳ ያጋና። “ሄኮ ነካ ኑዳ ዎልቃ ያዳሳ፤ ኑ መላ ግዳዳሳ።”

¹¹ ካሰ ዲ ዲፅን ሳበትያ ነ ቦንቾይ ሀእ ስኦለ ገልስ። ኦላ ኔኒ ዝንእያ ሂፃ፤ ጉፁነይ ኔኒ ማእያ አፍላ ግዳና ያጋና።

¹² ነኖ ዎንታ ናአዉ፥ ጉራ ባካላዉ፥ ሳሎፐ ዋና ኩንዳዲ? ነኖ ካዎተታ ካዉሽዳይሶ ዋና ቃንፀታዳ ሳአን ዎዲ?

¹³ ኔኒ ነ ዎዛናን፥ “ታኒ ሳሎ ከያና፤ ታ ካዎተ አራታ ፆሳ ፆልንቶታፐ ቦላራ ዎና፤ ታኒ ፑደሀ ባጋ ጋፃን ሺቆ ደርያ ሁጰን ኡታና።

¹⁴ ታኒ ሻራት ደእያ ቃ በሳፈ ቦላ አና፤ ታኒ፥ ታና ኡባፈ ቃ ፆሳ ዳንሳና” ያጋዳሳ።

¹⁵ ሽን ኔኒ ስኦለን፥ ህርክ ጪሞ ኦላን ዱገ የገታዳሳ።

¹⁶ ነና በእዳይሳት፥ “ቢታ ቃዳይስ፥ ካዎተታ ኮኮርስዳይስ፥

¹⁷ ሳኣ ቢታ ባዞ ከስዳይስ፥ ሳአን ደእያ ካታማታ ሽር የግዳይስ፥ ባ ቃሾ አሳታ የዶና እፅዳይስ ሀይሴ?” ያግድ ትሽ ኦድ ፄላና።

¹⁸ ካዎተታ ካዎት ኡባይ ባ ዱፎን ዱፎን ቦንቾን ዝንአና።

¹⁹ ሽን ኔኒ እፀትዳ ታሸዳ ነ ዱፉዋፐ ጋፃ ሆለታዳሳ። ነ አሀይ ማሻን ሀይቅዳ አሀንነ ኦላን ደእያ ሹቻታኮ ዱገ ዎዳይሳታ አሀን ካመትስ። ኔኒ ቶሆን የትዳ አሀ መላ ግዳዳሳ።

²⁰ ኔኒ ነ ቢታ ይስዳ ግሾነ ነ አሳ ዎዳ ግሾ ኤንታራ ሞገታካ። ኢታ ሱንይ ኮቻይ መርናዉ ፄገቶፎ።

²¹ ኤንቲ ደንድድ ቢታ ላቶና፤ ሳአ ኡባ ካታማ ፃላላ ኦና መላ ኤንታ አዋታ ናጋራ ግሾ፥ እያ ናይታ ዎናዉ ጊግስተ።

²² ታኒ “ኤንታ ቦላ ደንዳና፤ ኤንታ ሱን፥ ኤንታ ኮቻነ ኤንታ የለታ ባብሎነፐ ይሳና።

²³ ታኒ ባብሎነ ቁፃረይ ደእያ በስነ ሃ ኤልያ በሲ ኦና፤ ታኒ ጋዶ ፕቶን እያ ፕታና” ያጌስ ኡባፈ ዎልቃማ ጎዳይ።

አሶረይ ያና

²⁴ ኡባፈ ዎልቃማ ጎዳይ ሀይሳዳ ያግድ ጫቅስ፦ “ታኒ ሀልችዳይሳዳ ሀናና፤ ታኒ ቆፕዳይሳዳ ፖለታና።

²⁵ ታኒ አሶረ አሳ ታ ቢታን መንረና፤ ታ ደርያ ቦላ እያ የና። እያ ቃምባራይ ኤንታ ቦላፈ፥ እያ ቶሆይ ኤንታ ሀሽያፐ ክቻና” ያግስ።

²⁶ ሳአ ኡባስ ቆፈትዳ ቆፋይ ሀይሳ፤ ካዎተታ ኡባ ቦላ ምጨትዳ ኩሸይካ ሀይሳ።

²⁷ ኡባፈ ዎልቃማ ጎዳይ ሀይሳ ቆፕዳ ግሾ እያ ድጋናዉ ዳንዳኤይ ኦኔ? እያ ኩሸይ ምጨትስ፤ ሄሳ ጉየ ዛራናዉ ዳንዳኤይ ኦኔ?

ፍልስፄመይ ያና

²⁸ ካዎይ አካዝ ሀይቅዳ ላይ ኦደትዳ ቃላይ ሀይሳ:

²⁹ ህንተኖ ፍልስፄመ አሳዉ፥ ህንተና ሾጭዳ ፃምአይ መእዳ ግሾ ኡፋይቶፍተ። ሄ ሾሻ ኮቻፈ ሀሶይ ከያና፤ እያ ኮቻይ ቃስ ፆንገትያ ሾሽ ግዳና።

³⁰ ማንቆፈ ማንቆት ታ ቆሩዋን ሄመታና፤ መቶታንቾት ዎፑ ግድ ዝንአና። ሽን ታኒ ነ ኮቻ ኮሻን ዉርሳና፤ ኔፐ አትዳ ጉታ ዎና።

³¹ ነኖ ፐንግያዉ፥ ዬካ! ነኖ ካታማዉ፥ ዋሳ! ህንተኖ ፍልስፄመ አሳዉ፥ ህንተ ኡባይ ህርጋን ትልእተ! ፑደሀ ባጋፈ ጩይ ከይድ ዬስ፤ ሄ ጩጋፐ ዱፅድ ጉየ አተይ ባዋ።

³² ሄ ካዎተይ ኪትዳ አሳታስ ዎይግድ ዛራኔ? ጎዳይ ፅዮነ ኬፅን፥ ቆሄትዳ አሳይ እ ግዶን ቆሰትድ አትያ በሲ ደምስ።