Isayaasa 10 - ጌሻ ማፃፋ

¹ ኢታ ህገነ ኡንኤያ አዋጆ ከሰይሳታ አየ!

² ሄሳን ኤንቲ ማንቆታ፥ አምኤታነ ይኦታ ፕርዳ ጌላዮሶና፤ አምኤታነ ይኦታ አቁዋ ቦንቆሶና።

³ እ፥ ሃሆ ቢታፈ ያ መቱዋን ሴርያ ዎደ ህንተ ዋናኔ? ማዶ ደማናዉ ኦደኮ ባቃታኔ? ህንተ ሻሉዋ አዉን ቆታኔ?

⁴ ህንተ ድኤትዳ አሳራ ጎሸታና፤ ሀይቅዳ አሳ ግዶን ዝንአና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

አሶረይ ፕርደታና

⁵ ጎዳይ ሀይሳዳ ያጌስ፤ “ታ ይሉዋስ ፕርጮነ ታ ሀንቁዋስ ፃምአ ግድዳ አሶረ ቢታ አየ!

⁶ ኤንታ ሻሉዋ ድአናዳነ ቦንቃናዳ፤ ኦገ ኡርቃዳ ኤንታ የናዳ ፆሰ ኤሮና ካዎተ ቦላ ታኒ አሶረ ኪታና፤ ታና ሀንቀዳ አሳ ቦላ እያ የዳና።

⁷ ሽን አሶረ ካዎይ ሀይሳ ሀልችቤና፤ እያ ዎዛናይ ሀይሳ ቆፕቤና። እ ቆፕዳይ ዳሮ ካዎተታ ይሳናሳ።

⁸ ሄሳ ግሾ እ ያግድ ጬቀቴስ፤ ‘ታ ቶራ ሞጮናት ኡባይ ካዎታ ግዶኮናዬ?’

⁹ ካልኖይ ካርካምሻ ካታማ መላ ግደነዬ? ሀማት አርፋዳ ካታማ መላ ግደነዬ? ሳማረይ ዳማስቆ ካታማ መላ ግደነዬ?

¹⁰ የሩሳላመንነ ሳማረን ደእያ ኤቃታፐ ዳርያ ኤቃታ ጎይንያ ካዎተታ ሴራናዉ ታኒ ታ ኩሽያ የዳስ።

¹¹ ታኒ ሳማረ ካታማ ቦላነ እያ ኤቃ ምስለታ ቦላ ኦዳይሳዳ የሩሳላመ ካታማ ቦላነ እያ ኤቃ ምስለታ ቦላ ኦክናዬ?” ያግስ።

¹² ጎዳይ ፅዮነ ደርያ ቦላነ የሩሳላመ ቦላ ባ ኦሱዋ ኡባ ፖልዳፐ ጉየ፥ አሶረ ካዋ እያ ኦቶሩዋስነ ጬቁዋስ እያ ሴራና።

¹³ አሶረ ካዎይ ሀይሳዳ ያጌስ፦ “ታ ኩሸ ምኖተን፥ ታ ጭንጫተንነ ታ አኬካን ሀይሳ ኦስ። ታኒ ካዎተታ ግዶን ደእያ ዛዋታ ሾዳስ፤ ኤንታ ሻሉዋ ቦንቃስ፤ ታ ዎልቃን ካዎተታ አራታፐ ዎሳስ።

¹⁴ አስ ካፎ ኬን ኩሸ የደይሳዳ ታኒ ካዎተ ሻሉዋን ታ ኩሽያ የዳስ። ቃስ ዶገትዳ ጱጱለታ ሺሸይሳዳ ታኒ ቢታ ኡባ ሺሻስ። ባ ቀፍያ ቃዳይ ዎይኮ ዶና ጱቅዳይ ዎይኮ ዋስዳይ እሶይካ ባዋ” ያግስ።

¹⁵ ካልት ባራ ቃንፅያ አድያ ቦላ ደንዳናዉ ዳንዳኢ? ዎይኮ ማጋዘይ ባናን ጎኤትያ አድያ ቦላ ኦቶራናዉ ዳንዳኢ? ኩሸይ ደንና ፃምእ ባና ባዉ ደን? ጉፈይ ኦይክያ አስ ባይና ባዉ ሄመቲ?

¹⁶ ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እያ ምኖ ኦላንቾታ ቦላ ግልቅስያ ሀርገ የዳና። እያ ቦንቹዋ ላፆ ታም ማና።

¹⁷ እስራኤለ ፖኦይ ታማ ግዳና፤ ኤንታ ጌሻይ ላጮ ግዳና። እያ አጉንነ እያ ክንቾትያ እስ ጋላስ ፁጋናነ ማና።

¹⁸ ሀርገይ አሰ ግልቅሰይሳዳ ጎዳይ ባ ዎራ ም ቦንቹዋነ ባ አራዳ ቢታ ቦንቹዋ ይሳና።

¹⁹ ዎራን አትያ ምይ ዳሮ ጉ ግድያ ግሾ፥ ሀር አቶሽን ጉ ናእካ ታይብድ ዉርሳና።

አትዳ ጉት ስማና

²⁰ ሄ ዎደ እስራኤለፐነ ይሁዳፐ አትዳ ጉት ባንታና ሾጭዳይሳን ግዶናሽን፥ ቱማ ጎዳን፥ እስራኤለ ጌሻን ዘምፓና።

²¹ አትዳ ይሁዳ አሳይ ዎልቃማ ፆሳኮ ስማና።

²² ነኖ እስራኤለ፥ ኔኒ አባ ጋፃን ደእያ ሻፍያ መላ ዳርኮካ፥ አትዳ ጉታ ፃላል ስማና። ፅሎተ ኩምዳ ዮይ እያ አሳስ አዋጀትስ።

²³ ኤ፥ ጎዳይ፥ ኡባፈ ዎልቃማ ፆሳይ ሳአ ኡባ ቦላ ኤሀናዉ ቆፕዳ ዩዋ ኤሀና።

²⁴ ሄሳ ግሾ፥ ጎዳይ፥ ኡባፈ ዎልቃማ ፆሳይ ሀይሳዳ ያጌስ፦ “ፅዮነን ደእያ ታ አሳዉ፥ ግብፀት ኦዳይሳዳ አሶረት ህንተና ፃምአን ሾጭያ ዎደነ ባንታ ጉምባ ህንተ ቦላ ደንያ ዎደ ያዮፍተ።

²⁵ ጉ ዎደፐ ጉየ፥ ታኒ ህንተ ቦላ ሀንቀትዳይሳ አጋና፤ ሄሳፈ ጉየ፥ ታ ሀንቆይ ኤንታ ይሳናዉ ደንዳና” ያጌስ።

²⁶ ኡባፈ ዎልቃማ ጎዳይ ኦሬባ ሹቻ ማታን ምድያመታ ሾጭዳይሳዳ ኤንታ ልሶን ሾጫና። እ ግብፀን ኦዳይሳዳ ባ ፃምአ አባ ቦላ ደንና።

²⁷ ሄ ጋላስ፥ እያ ቶሆይ ህንተ ሀሽያፐ ዎና፤ እያ ቃምባራይ ህንተ ሞርገፈ ክቻና። ህንተ ኦርድዳ ግሾ ቃምባራይ መቃና።

²⁸ ሞርክያ ዎታዳራት ጋየ ካታማ ገልዶሶና፤ ምግሮናራ ካንዶሶና፤ ባንታ ኦላ ሚሽያ ምክማሳ ዎዶሶና።

²⁹ ኤንቲ ኦግያራ ካን አድ፥ ጌባን አቅዶሶና። ራማን ደእያ አሳይ ኮኮርዶሶና፤ ግብአን፥ ካዋ ሳኦላ ካታማን ደእያ አሳይ ባቃትዶሶና።

³⁰ ጋልማ አሳዉ፥ ዋሶ ጎችተ! ላይሻ አሳዉ፥ ስእተ! አናቶታ አሳዉ፥ ኦይሻ ዛርተ!

³¹ ማድማና አሳይ ባቃትዶሶና፤ ገብማ አሳይ ባንታ ሸምፑዋስ ቆሰትዶሶና።

³² ሞርክያ ዎታዳራት ሀች ኖባን ደኦሶና፤ ኤንቲ ፅዮነ ዙማ ቦላ ኤቅድ፥ ባንታ ኩሽያ ቃድ፥ የሩሳላመ ካታማ ባብሶሶና።

³³ ሄኮ፥ ጎዳይ፥ ኡባፈ ዎልቃማ ፆሳይ፥ ታሸታ ግታ ዎልቃን ሻቃና፤ አዱቅዳ ምት ቃንፀታና፤ ቃ ግዳይሳት ካዉያና።

³⁴ ጎዳይ ስከትዳ ዎራ ካሎታና ጋካናዉ ቃንፃና፤ ልባኖሰይ ዎልቃማ ስንን ኩንዳና።