Isayaasa 1 - ጌሻ ማፃፋ

¹ ኦዝያን፥ እዮአታም፥ አካዝነ ህዝቅያስ ይሁዳን ካል ካልድ ካዎትዳ ዎደ አሞፀ ናአይ እሳያስ ይሁዳባነ የሩሳላመባ በእዳ ቆንጨይ ሀይሳ።

ስኦና ደረ

² ሳሎቶ ስእተ፤ ሳአዉ ሀይዛ ስአ፤ ጎዳይ ሀይሳዳ ያጌስ፤ “ታ ናይታ የላዳ ድቻስ፤ ሽን ኤንቲ ታዉ ማካልዶሶና።

³ ቦር ባ ጎዳ ኤሬስ፤ ሀረይካ ባና ሃርዳይሳ ዛዳሉዋ ኤሬስ። ሽን እስራኤለይ ኤረና፤ ታ አሳይ አኬከና።

⁴ ህንተኖ፥ ናጋራንቾ ካዎተቶ፥ ባላ ኦሶን ዴፅዳይሳቶ፥ ኢታ ኦያ የለተቶ፥ ቱና ኦሶስ እመትዳ ናይቶ፥ ጎዳ አግዳይሳቶ፥ ህንተና አየ! እስራኤለ ጌሻ ካደታ፤ እያዉ ዞኮ ዛርደታ።

⁵ ማካላ ቦላ ማካላ አይስ ጉጄቲ? አይስ ዛር ዛር ሾጨቴቲ? ህንተ ሁጰይ ሀርገትስ፤ ህንተ ዎዛናይ ዳቡርስ።

⁶ ሁጰ ብናናፐ ቶሆ ፁጉን ጋካናዉ ፓያተ ባዋ፤ ማዱን፥ ክፅነ ስ ማእስ። ኤንቲ ጊይቦኮና፥ ዎይኮ ሜጨትድ ቃሸትቦኮና ዎይኮ ዛይተን ትየትድ ሎፅክቦኮና።

⁷ “ህንተ ቢታይ ኦፅስ፤ ህንተ ካታማት ታማን ፁገትዶሶና። ህንተ በእሽን ህንተ ጎሻ አላጋት ኤካና፤ እማ አሳት ህንተ ቢታ ቁኤ ከሳና።

⁸ የሩሳላመይ ዎይነ ጋደን ደእያ ሻቃራዳ፥ ሌሄ ግዶን ደእያ ጋባዳነ ሞርከን ተቀትዳ ካታማዳ ሀናዳ አታና።

⁹ ኡባፈ ዎልቃማ ጎዳይ ኑስ ጉ ኮቸ አሾናኮ ኑኒ ሶዶመነ ጋሞራ ካታማዳ ሀናናሽን” ያግስ።

¹⁰ ህንተኖ፥ ሶዶመ ሀላቃቶ፥ ጎዳ ቃላ ስእተ! ህንተኖ፥ ጋሞራ አሳዉ፥ ኑ ፆሳ ህግያ ስእተ!

¹¹ “ህንተ ያርሾ ዳሮይ ታዉ አይ ኦ? ሀኖ ጋካናዉ ህንተ ታዉ ሺሽዳ ኡርገ ዶርሳነ ሞ መሄ ፁሳ ያርሾይ ታዉ ግዳና። ታኒ ኮርማታ፥ ዶርሳ ኡርገታነ ዴሻታ ሱን ኡፋይትከ።

¹² ህንተ ታ ስንን በንታናዉ ያ ዎደ ታ ኬ ዳባባ ህንተ የና መላ ኦነ ኦይችዳይ?

¹³ ሀዳ ያርሹዋ ኤሄይሳ አግተ! ህንተ ጩይስያ እፃነይ ታና ሻቴስ። አጌና ፄሮን ህንተ ቦንችያ ጋላሳ፥ ሳምባታነ ኢታተን ህንተ ሺቅያ ሺቁዋ ታኒ እፃይስ።

¹⁴ አጌና ፄሮን ህንተ ቦንችያ ጋላሳነ ህንተ ባኣለ ጋላሳታ ታኒ እፃስ፤ ኤንቲ ታዉ ቶሆ ግድዶሶና፤ ታኒ ኤንታ ቶካናዉ ዳንዳእከ።

¹⁵ ህንተ ኩሸ ምጭድ ታና ዎስያ ዎደ ታኒ ታ አይፍያ ህንተፈ ገንና። ህንተ ኩሸይ ሱን ኩምዳ ግሾ ህንተ ዳርስ ዎስኮካ ታኒ ስእከ።

¹⁶ ሜጨትተ፤ ህንተና ጌሽተ፤ ህንተ ኢታ ኦሱዋ ታ ስንፈ ድግተ፤ ገነ ሀኑዋ አግተ።

¹⁷ ሎኦባ ኦሶ ታማርተ፤ ፅሎ ፕርዳ ኮይተ። ኡንኤትዳይሳታ አሽተ፤ ይኦታስ ኤቅተ፤ አምኤታስ ሞተትተ” ያጌስ ጎዳይ።

¹⁸ “ሃይተ፤ አነ ዎል አማንስ። ህንተ ናጋራይ ባራ ቢታዳ ዞእኮካ፥ ሻቻዳ ቦፃና፤ ሱዳ ዞእኮካ ፑቶዳ ቦፃና።

¹⁹ ህንተ ኤሮ ግድ ታዉ ኪተትኮ ቢታ አንጁዋ ማና።

²⁰ ሽን ህንተ እፃስ ግድ ማካልኮ፥ ማሻን ሜተታና” ያጌስ ጎዳይ ባ ዶናን።

²¹ አማነትዳ ካታምያ ዋናዳ ላይማ ግዳዴ? ካሰ ሱረተነ ፅሎተ እ ግዶን ኩምስ፥ ሽን ሀእ ሸምፖ ዎይሳት እ ግዶን ደኤስ።

²² ነ ብራይ ባልትስ፤ ነ ማልኦ ዎይነይ ሃን የለትስ።

²³ ህንተ ሀላቃት ማካላንቾታነ ካይሶ ላገ ግድዶሶና፤ ኤንቲ ኡባይ ዎፈ ዶሰይሳታነ ኩሸ ፄለይሳታ። ይኦታስ ሱረ ፕርዶኮና፤ አምኤታ ዋሱዋ ስኦኮና።

²⁴ ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እስራኤለ ዎልቃማይ፥ ሀይሳዳ ያጌስ፤ “ሀእ ታኒ ታ ሞርከታ ቦላ ታ ሀንቁዋ ጉሳና፤ ታራ ኤቀተይሳታ ሀሎ ከያና።

²⁵ ታኒ ታ ኩሽያ ነ ቦላ ዛራና፤ ነ ባልተ ጌሻና፤ ነ ቱናተ ኡባ ኔፐ ድጋና።

²⁶ ታኒ በንይሳዳ ነ ሀላቃታ፥ ኮይሮይሳዳ ነ ዞራንቾታ ደንና። ሄሳፈ ጉየ፥ ኔኒ አማነትዳ ቢታ፤ ፅሎተ ካታማ ጌተታና” ያጌስ።

²⁷ ፅዮነይ ሱረ ፕርዳን፥ ባንታ ናጋራ ፓፀይሳትካ ፅሎተን ዎዘታና።

²⁸ ሽን ማካላንቾትነ ናጋራንቾት እስፈ መቃና፤ ጎዳ አገይሳት ያና።

²⁹ ህንተ ኡፋይትዳ ያርሾ ዎላን ዬላታና፤ ህንተ ዶርዳ ኮራን ካዉያና።

³⁰ ህንተ ሀይ ቆቆፈትድ ዉርዳ ዎላዳነ ሃ ይዳ አታክልተ በሳዳ ግዳና።

³¹ ባና ምኖ ገይ ቡፃ ግዳና፤ እያ ኦሶይካ ፖልኡ ግድ ቶእያ ታማ ግዳና፤ ኤንቲ እስፈ ፁገታና፤ ሄ ታማ ቶይሳና አስ ባዋ።