Inbaqoome 1 - ጌሻ ማፃፋ

እንባቆመ ኮይሮ ሞቱዋ

¹ ናብያ እንባቆመስ ጎዳይ ቆንጭስዳ ቃላይ ሀይሳ።

² እንባቆመይ፥ “አቤት ጎዳዉ፥ ታና ማዳና መላ ታኒ ነና ፄግያ ዎደ አዉደ ጋካናዉ ስኦና እፃይ? ታኒ ኡንኤታዳ ኔኮ ዋስያ ዎደ አዉደ ጋካናዉ አሾና እፃይ?

³ ኔኒ ሀ ኢታተ ኡባ ታና አይስ በሳይ? ኔኒ ባላ በአሸ አይስ ስእ ጋይ? ዮይነ ጌላተ ታ ስንና፤ ፓላምነ ኦሽ ቢታ ኡባን ዳርስ።

⁴ ሄሳ ግሾ፥ ህገይ ዶልእስ፤ ሱረ ፕርድ ካንና። ናጋራንቾት ፅሎ አሳታ ተቅድ ኦይክዳ ግሾ፥ ፕርድ ጌላትስ” ያግስ።

ጎዳ ዛሩዋ

⁵ ጎዳይ ዛሪድ፥ “ህንተ ዩሹዋን ደእያ ካዎተታ ፄልድ ማላለትተ። ህንተዉ አስ ኦድን ህንተ አማኖና ኦሱዋ ታኒ ህንተ ዎድያን ኦና።

⁶ ታኒ ቃይ ባይናይሳታነ ድርግያ ባብሎነ አሳ ደንና። ኤንቲ ባንታባ ግዶና ቢታ ኦልድ ኦይካናዉ ቢታ ኡባን ዩዮሶና።

⁷ ኤንቲ ያሽሶሶናነ ዳጋንሶና፤ ባንታና ቦንችስያ ህገ ከሶሶና።

⁸ ኤንታ ፓራት ማሄፐ አድ ኤለሶሶና፤ ኮሻትዳ ኦማርሳ ሱመፐ አድ ዎዛና ምኖ። ኤንታ ፓራ አሳት ሃሆፐ ዮሶና፤ ኤንቲ አርጋን እስባ ኦይካናዉ ዎያዳ ፓሎሶና።

⁹ ኤንታ ኦላንቾት ኡባይ ኢታ ኦሶ ኦናዉ ባዞ ጫርኮዳ ጫርክሸ ዮሶና። አሳ ድእድ ሻፈዳ ሺሾሶና።

¹⁰ ኤንቲ ካዎታ ቦላ ቀልቅሶሶና፤ ሃረይሳታ ኤንቲ ቶቾሶና። ኤንቲ ሹቻ ድርሳን ድረትዳ ካታማታ ኡባ ቦላ ሚጮሶና። ሄ ድርሳታ ድአናዉ ኤንታ ዩሹዋን ቢታ ሺሾሶና።

¹¹ ሄሳፈ ጉየ፥ ኤንቲ ኡባ ጫርኮ መላ ፕትድ ኤፋና። ሄ ጌላታስ ኤንታ ዎልቃይ ኤንታ ፆሳ” ያግስ።

እንባቆመ ናምአን ሞቱዋ

¹² አቤት ጎዳዉ፥ ታ ፆሳዉ፥ ታ ጌሻዉ፥ ኔኒ መርና ፆሳ ግድኪ? ኔኒ ኑ ዛላ ግድያ ግሾ ኑኒ ሀይቆኮ። አቤት ጎዳዉ፥ ባብሎነ አሳይ ኑና ፕርዳና መላ ኤንታ ደንዳ ዎልቃ ኤንታዉ እማዳሳ።

¹³ ነ አይፈት ዳሮ ጌሽ ግድያ ግሾ፥ ኢታባ ፄላናዉ ዶሶኮና፤ ኔኒ ኢታባይ ኦሰትያ ዎደ በአሸ ስእ ጋካ። ያትን፥ ሀ ኢታታ አይስ ስእ ጋዳ ፄላይ? ናጋራንቾት ባንታፈ አድ ፅልያ አሳታ ምትያ ዎደ አይስ ስእ ጋይ?

¹⁴ ኔኒ አሰ አባ ሞሎዳነ ካለይ ባይና ኡሎራ ጎሸትያ መተታ መዳሳ።

¹⁵ ባብሎነ አሳይ አሳ ኡባ ቃጰን ቆርድ ከሳና፤ ኤንታ ባንታ ግትያን ኦይካና፤ ኤንታ ባንታ ዳቹዋን ቡርድ ሺሻና፤ ሄሳ ኦድ ኤንቲ ኡፋይታናነ ሀሹ ጋና።

¹⁶ ሄሳ ግሾ፥ ኤንቲ ባንታ ግትያስ ያርሻና፤ ባንታ ዳቹዋስ እፃነ ጩይሳና። ኤንቲ ሻሎ ደመይነ እንጀትን ደኤይ ሄ ግተታና።

¹⁷ ያትን፥ ኤንቲ ባንታ ግትያ ቃይ ባይና የግሸነ ምሽ ካዎተታ ይስሸ ዋንድ ዳኔ?