Ibraawe 8 - ጌሻ ማፃፋ

የሱሲ ኑ ካህነ ሀላቃ

¹ ኑኒ ሃሳያ ግታባይ ሄሳ። ሳሉዋን ኡባፈ ቦላ ፆሳ አራታፐ ኡሻቻ ባጋን ኡትዳ ሀይሳ መላ ካህነ ሀላቃይ ኑስ ደኤስ።

² እ አሳን ግዶናሽን፥ ጎዳን ኤቅዳ ቱማ ዱንካንያን ፆሳ ኬን ኦስ።

³ ካህነ ሀላቃ ኡባይ እሞነ ያርሾ ያርሻናዉ ሹመቴስ። ሄሳ ግሾ፥ ሀ ካህነይ ያርሻናዉ እስባይ ዳናዉ ኮሼስ።

⁴ ህገይ ኪተይሳዳ ያርሽያ ካህነት ደእያ ግሾ፥ ክርስቶስ ሳአን ደእያባ ግድያኮ እ ካህነ ግደና።

⁵ ኤንቲ ካህነተን ኦያ ዱንካነይ ሳሎን ደኤይሳስ ሌምሶነ ኩያ። ሙሰይ ዱንካንያ ኤስያ ዎደ ፆሳይ እያኮ፥ “ታኒ ነና ዙማ ቦላ በስዳ ሌምሱዋ ካላዳ ኦ” ያግስ።

⁶ ሽን የሱሲ ግዶ ግድድ ስገያ ጫቆይ፥ ኮይሮ ጫቁዋፐ አይሳዳ እ ኤክዳ ኦሶይ ኤንታይሳፈ አስ። ሄስ ኤቅዳይ አያ ጫቆ ቃላና።

⁷ ኮይሮ ጫቁዋን ባል ባይናባ ግድያኮ ናምአን ጫቆ ኮሸና።

⁸ ሽን ጎዳይ ኤንታ ቦርድ፥ ሀይሳዳ ያግስ፦ “ታኒ እስራኤለ አሳራነ ይሁዳ አሳራ ኦራ ጫቆ ጫቅያ ዎደይ ያና።

⁹ ሄ ጫቆይ ታ ኤንታ አዋታ ግብፀ ቢታፈ ኩሽያ ኦይካዳ፥ ጎቻ ከስዳ ዎደ ኤንታራ ጫቅዳ ጫቁዋ መላ ግደና። ኤንቲ ታ ጫቁዋን አማነትቦና ግሾ፥ ታኒ ኤንታ የጋ አጋስ ያጌስ ጎዳይ።

¹⁰ ሽን ህዛፐ ጉየ እስራኤለ አሳራ ታ ጫቃና ጫቆይ ሀይሳ ያጌስ ጎዳይ። ታኒ ታ ህግያ ኤንታ ጉግያን ዎና፤ ኤንታ ዎዛናን ፃፋና። ታኒ ኤንታ ፆሳ ግዳና፤ ኤንትካ ታ አሰ ግዳና።

¹¹ ኤንታፈ ኦንካ ባ ሾሩዋ ዎይኮ ባ እሻ፥ ‘ጎዳ ኤራ’ ያግድ ታማርሰና። ኤንቲ ጉፈ ግታ ጋካናዉ ኡባይ ታና ኤራና።

¹² ታኒ ኤንታ ናቁዋ አቶ ጋና፤ ኤንታ ናጋራ ዛራ ቆፕከ” ያጌስ።

¹³ ፆሳይ ሀ ጫቁዋ “ኦራ” ግድ ፄግሸ ኮይሮይሳ ጋልእስስ። ህዛ፥ ጋልአይነ ጬጋይ ይያ ዎደይ ጋክስ።