Hose 9 - ጌሻ ማፃፋ

እስራኤለይ ሴረታና

¹ እስራኤለ አሳቶ፥ ኡፋይቶፍተ! ሀራ ካዎታዳ ፖጩ ጎፕተ! ህንተ ህንተ ፆሳፈ ሃክድ ላይማትደታ፤ ካ ጌሽያ ዉዱማን ላይማተስ እምያ ጋትያ ዶስደታ።

² ሄሳ ግሾ፥ ህንተ ዉዱማፈ ካ፥ ጉምእያ በሳፈ ዎይነ ኡሻ ደመከታ፤ ዎይነይ ህንተዉ አይፈና።

³ ኤንቲ ጎዳ ቢታን ጋምኦኮና። ኤፍሬም ግብፀ ቢታ ስማና፤ አሶረ ቢታን ቱና ካ ማና።

⁴ ኤንቲ ጎዳስ ዎይነ ኡሻ ያርሾ ጉሶኮና፤ ኤንታ ያርሾይ እያ ኡፋይሰና። ሄ ያርሾይ ኤንታዉ ሾቻ መላ ግዳና፤ ሄሳ ምያ ኡባይ ቱናና። ሄ ካይ ኤንታ ኮሻ ፃላላ ዛራናሳፈ አትሽን፥ ጎዳራ ደእያ እስፈተስ ማደና።

⁵ ጎዳ ህንተ ቦንቻና መላ እ ህንተዉ እምዳ ባኣለ ጋላሳታን ህንተ አይ ኦኔ?

⁶ ኤንቲ ዮፐ ከስ ኤክኮካ ግብፀይ ኤንታ ሺሻና፤ መምፕሳ ካታማይ ኤንታ ሞጋና። ኤንቲ ሺሽዳ ብራ ሚሸ ኡባ ሻራፍ ምታና፤ ኤንቲ ደእያ በሳን ቡሎይ ዶላና።

⁷ ሴራ ጋላስ ይስ፤ ፕርዳ ዎደይ ጋክስ። እስራኤለ አሳይ ሄሳ ኤሮ! ህንተ ናጋራ ግሾነ ሞርከተ ግሾ ናበይ ኤያ መላ ፆሳ አስ ጌተትዳይስ ጎሻ መላ ታይበትስ።

⁸ ናበይ ፆሳራ ግድድ፥ ኤፍሬማ ናጌስ፤ ሽን እያ ኦግያን ፅሄይ የገትስ፤ ፆሳ ኬን እያ ሞርከተ ናጌስ።

⁹ ግብአ ካታማን ሀንዳይሳዳ ኤንቲ ቱንዶሶና። ፆሳይ ኤንታ ናቁዋ ሀሳያና፤ ናጋራ ግሾ ኤንታ ሴራና።

¹⁰ ጎዳይ፥ “ታኒ መላ ቢታን ዎይነ አይፈ ደምዳይሳዳ እስራኤለ አሳ ደማስ። ታኒ ባላሰ ምን ኮይሮ አይፈ በእዳይሳዳ ህንተ አዋታ በአስ። ሽን ኤንቲ ብኤል-ፋጎራ ጌተትያ በሳ ይድ፥ ዬላይያ ኤቃስ ባንታና ዱማይዶሶና፤ ኤንቲ ሄ ዶስዳ ኤቃዳ ቱንዶሶና።

¹¹ ኤፍሬማ ቦንቾይ ካፎዳ ፓል ያና፤ ህዛፐ ጉየ የሎይ ባዋ፤ ቃንቶይ ባዋ፤ አተ ባዋ።

¹² ኤንቲ ናአ የልድ ድችያባ ግድኮካ ታ ኤንታ ዎ ዉርሳና። ታኒ ኤንታፈ ሃክዳ ዎደ ኤንታና አየ!

¹³ ኤፍሬም ሎኦ በሳን ቶከትዳ ዛምባ ም መላ ሀንን በአስ፥ ሽን ባ ናይታ ሹካስ አ እሚስ” ያግስ።

¹⁴ አቤት ጎዳዉ፥ ኤንታዉ እማ! ነ ኤንታዉ አይ እማኔ? ነ ኤንታዉ ቦሸትያ ኡሎነ መልዳ ን እማ።

¹⁵ ጎዳይ፥ “ኤንታ ኢታተ ግሾ ታኒ ጋልጋላን እፆ ዶማስ። ኤንታ ናጋራ ግሾ ታኒ ኤንታ ታ ኬፈ ጎዳና፤ ህዛፐ ጉየ ታ ኤንታ ዶስከ፤ ኤንታ ሀላቃት ኡባይ ጌላታ።

¹⁶ ኤፍሬም ደሸትን፥ እያ ፃጶይ መልስ፤ አይፈይካ ባዋ። ኤንቲ ናአ የልኮካ ታኒ ኤንቲ ዶስያ ናይታ ዎና” ያግስ።

¹⁷ ኤንቲ እያዉ ኪተቶና እፅዳ ግሾ ታ ፆሳይ ኤንታ ፕፅር ሆላና፤ ኤንቲ ካዎተታ ግዶን ቶይላትሸ ዳና።