Hose 7 - ጌሻ ማፃፋ

¹ “ታኒ እስራኤለ ፓናዉ ኮይያ ዎደ ኤፍሬማ ናጋራይነ ሳማረ አሳ ኢታ ኦሶይ ቆንጭስ። ኤንቲ ኡባ ዎደ ጭሞሶና፤ ካይሶት መንድ ገሎሶና፤ ፓንጋት ከይድ ቦንቆሶና።

² ሽን ታኒ ኤንታ ኢታ ኦሶ ኡባ ኤረይሳ አኬኮኮና። ኤንታ ኢታ ኦሶይ ኤንታ ናቅ ኦይክስ፤ ሄ ኢታ ኦሶይ ኡባ ዎደ ታ ስንን ደኤስ።

³ “ኤንቲ ካዋ ባንታ ኢታተን፥ ሀላቃታ ባንታ ዎርዱዋን ኡፋይሶሶና።

⁴ ኤንቲ ኡባይ ላሞሶና፤ ሙኑቃይ ደንዳና ጋካናዉ ዳቦ ኡከይስ ታማ ሺሾ ኮሾናይሳዳ ኤንቲ ቴልዳ ጮጨ መላ።

⁵ ባንታ ካዋ ቦንቾ ባኣለ ጋላሳን ሀላቃት ዎይነ ኡሻን ማትዶሶና። እካ ቀልቅሰይሳታስ ባ ኩሽያ እሚስ።

⁶ ኤንታ ዎዛናይ ታማ ጮጨ መላ፤ ኤንቲ ሺቅድ ኢታባ ማቀትዶሶና። ኤንታ ሀንቆይ ቃማ ኩመ ጩይሸ አቄስ፤ ሳእ ዎንትያ ዎደ ታማ ላጮዳ ኤፄስ።

⁷ ኤንቲ ኡባይ ቴልዳ ጮጨ መላ ባንታ ሀላቃታ ሞሶና። ኤንታ ካዎት ኡባይ ኩንድዶሶና፤ ኤንታፈ ኦንካ ታና ፄገይ ባዋ።

⁸ “ኤፍሬማ አሳይ ሀራ ካዎተ አሳራ ዋላከትስ፤ ኤፍሬማ አሳይ ሽረትቦና ኡይ መላ ግድስ።

⁹ አላጋት እያ ዎልቃ ምዶሶና፥ ሽን እ ሄሳ ኤርቤና፤ እያ ሁጰይ ፑሉምስ፥ ሽን እ ሄሳ አኬክበና።

¹⁰ እስራኤለ አሳ ኦቶሮይ ኤንታ ቦላ ማርካቴስ። ሄስ ኡባይ ሀንንካ ኤንቲ ጎዳኮ፥ ባንታ ፆሳኮ፥ ስምቦኮና ዎይኮ እያ ኮይቦኮና።

¹¹ “ኤፍሬማ አሳይ ሆለዳ ኤያነ ጮ ጭመተይሳታ። ኤንቲ ማዶ ደማናዉ እስ ቶሆ ግብፀ፤ እስ ቶሆ አሶረ ስሞሶና።

¹² ኤንቲ ብያ ዎደ ታኒ ኤንታ ቦላ ግተ የጋና፤ ታኒ ኤንታ ካፎ ኦይክያዳ ኦይካና። ኤንታ ኢታ ኦሱዋ ግሾ ታኒ ኤንታ ሴራና።

¹³ “ኤንታ አየ! ኤንቲ ታፐ ሃክዶሶና። ኤንታዉ ዮ ግዶ! ኤንቲ ታ ቦላ ማካልዶሶና። ታኒ ኤንታ ዎዛናዉ ኮያስ፥ ሽን ኤንቲ ታ ቦላ ዎርዶ ሃሳዮሶና።

¹⁴ ባንታ ሂፃን ዝንእድ ዘሌሎሶና፥ ሽን ባንታ ዎዛናፐ ዎሶኮና። ካስነ ዎይነ ኡሻስ ባንታ አሳተ ጋሮሶና፥ ሽን ኤንቲ ታፐ ሃክዶሶና።

¹⁵ “ኤንታ ሎህስዳይነ ምንዳይ ታና፥ ሽን ታዉ ኢታባ ማቀቶሶና።

¹⁶ ኤንቲ ሀዳባኮ ስምዶሶና። ኤንቲ አማንና ዶንገ ግድዶሶና። ኤንታ ሀላቃት ኢታባ ኦደትዳ ግሾ ማሻን ዉራና፤ ሄስካ ኤንታዉ ግብፀን ሚቻስ ግዳና።