Hose 5 - ጌሻ ማፃፋ

ጎዳ ፕርዳይ እስራኤለ ቦላ

¹ “ህንተኖ ካህነቶ፥ ሀይሳ ስእተ! ህንተኖ እስራኤለ አሳቶ፥ አኬክተ! ካዎ ኬ አሳቶ፥ ሎይ ስእተ! ሀ ፕርዳይ ህንተ ቦላ ፕርደትስ። ህንተ ምፅጳስ ፅሄ ግድደታ፤ ታቦረ ዙማ ቦላ ምጨትዳ ግተዳ ግድደታ።

² ጌላት ዎ አግቦኮና፤ ሄሳ ግሾ፥ ታ ኤንታ ኡባ ሴራና።

³ ታኒ ኤፍሬማ ኤራይስ፤ እስራኤለይ ታፐ ጌምቤና። ኤፍሬማ፥ ኔኒ ሀእ ላይማ ግዳዳሳ፤ እስራኤለይ ቱንስ።”

⁴ “እስራኤለ አሳይ ባንታ ፆሳኮ ስሞና መላ ኤንታ ኢታ ኦሶይ ኤንታ ተቅስ። ላይማተ አያን ኤንታ ዎዛናን ደእያ ግሾ ኤንቲ ጎዳ ኤሮኮና።

⁵ እስራኤለ አሳ ኦቶሮይ ኤንታ ቦላ ማርካቴስ። እስራኤለ አሳይነ ኤፍሬማ አሳይ ባንታ ናጋራ ጋሶን በቶሶና፤ ይሁዳ አሳይካ ኤንታራ በቴስ።

⁶ ኤንቲ ጎዳስ ያርሻናዉ ባንታ ዶርሳ ዉድያነ መሄ ዉድያ ላግ ኤክድ እያ ኮያናዉ ባና፤ ሽን እ ኤንታፈ ሻከትዳ ግሾ እያ ደሞኮና።

⁷ ኤንቲ ላይማተን ናይታ የልዳ ግሾ ጎዳስ አማነትቦኮና። ሄሳ ግሾ፥ እስ አጌናን ኤንትነ ኤንታ ቢታይ ያና።

⁸ ግብአ ካታማን ሞይዘ፥ ራማ ካታማን ዛየ ፑንተ። ብንያመ አሳዉ፥ ‘ጉየ ስሚድ በእተ’ ያግድ ቤት-አዌናን ዋስተ።

⁹ ሴረትያ ዎደ ኤፍሬም ባይሳ ግዳና። እስራኤለ ኮቻ ግዶን ቱማ ሀናናባ ታኒ አዋጃና።

¹⁰ “ጎዳይ፥ ‘ይሁዳ ሀላቃት ዛዋ ሱግያ አሳ መላ ግድዶሶና፤ ታኒ ታ ሀንቁዋ ኤንታ ቦላ ድኦ ሃዳ ጉሳና።

¹¹ ኤፍሬማ አሳይ ኤርድ ኤቃ ጎይንዳ ግሾ፥ ሱረ ፕርዳን ኡንኤትዶሶና፤ ትንቸትዶሶና።

¹² ሄሳ ግሾ፥ ታኒ ኤፍሬማ አሳስ ብሌ፥ ይሁዳ አሳስ ፆ ግዳና።

¹³ “ ‘ኤፍሬም ባ ሀርግያ፥ ይሁድ ባ ማዱን በእዳ ዎደ ኤፍሬም አሶረ ቢታ ብስ፤ ሄ ግታ ካዋ ማዶ ኦይችስ። ሽን እ ኤንታ ሀርግያ ላናዉ ዎይኮ ኤንታ ማዱን ፓናዉ ዳንዳእቤና።

¹⁴ ሄሳ ግሾ፥ ታኒ ኤፍሬማስ ጋሞዳ ሀናና፤ ይሁዳስ ዎዳላ ጋሞዳ ሀናና። ታኒ ኤንታ መንረዳ ኤካ ባና፤ ኦንካ ኤንታ ታ ኩሸፐ አሸና።

¹⁵ ኤንቲ ባንታ ባላ አኬካና ጋካናዉነ ታና ኮያና ጋካናዉ ታኒ ጉየ ታ በሳ ስማና። ኤንቲ ባንታ ዋያን ታና ምንድ ኮያና’ ” ያጌስ።