Hose 2 - ጌሻ ማፃፋ

¹ “ህንተ እሻታ፥ ‘ታ አሰ’ ቃስ ህንተ ምቸታ፥ ‘ማሮተ ደምዳይሳታ’ ያግድ ፄግተ።

እስራኤለ ሴረተነ ስሞ

² “ህንተ አይዉ ሀንቀትተ፤ እዮ ካጭተ። አይስ ጊኮ፥ እያ ታ ማቾ ግዱኩ፤ ታካ እ አዝና ግድከ። እያ ባ ሶምኡዋፈ ላይማተ ማላ ድጎ፤ ላይማተ ኦሱዋ ባ ንታ ግዶፈ ድጎ።

³ ሄስ ሀኖና እፅኮ እያ የለትዳ ጋላሳዳ፥ ታኒ እዮ ፅረ ካሎ አሻና። ቃስ እዮ መልዳ መላ ቢታ ኦና፤ ታኒ እዮ ሳሞን ዎና።

⁴ ኤንቲ ላይመፐ የለትዳ ናይታ ግድዳ ግሾ፥ ታኒ እ ናይታስ ቃትከ።

⁵ ኤንታ አይያ ላይማታሱ፤ ካዉሻባ ሀናዳ ኤንታ ቃንታሱ። እያ፥ ‘ታኒ ታ ካነ ታ ሃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገታ ካላዳ ባና’ ያጋሱ።

⁶ ሄሳ ግሾ፥ ታኒ እ ኦግያ አጉንን ጎርዳና፤ እያ ባ ኦግያ ደሞና መላ ታኒ እ ዩሹዋ ግምበን ድራና።

⁷ እያ ባ ላገታ ጌዶ ዎፃና፥ ሽን ጋኩኩ፤ ኤንታ ኮያና፥ ሽን ደሙኩ። ሄሳፈ ጉየ፥ ‘ሀእ ዱሳፈ ታዉ በንይስ ሎኦ ግድያ ግሾ፥ ስማዳ ታ ኮይሮ አዝናኮ ባና’ ያጋና።

⁸ ካ፥ ዎይነ ኡሻነ ዛይትያ እዉ እምዳይነ ኤንቲ ባኣለ ኤቃስ ያርሽያ ብራነ ዎርቃ እዉ ዳርስዳይ ታና ግደይሳ እያ ኤሮና እፃሱ።

⁹ ሄሳ ግሾ፥ ካፅያ ዎደ ታ ካ፥ ቴርያ ዎደ ታ ዎይንያ ኢፐ ዛራዳ ኤካና። እያ ባ ካሉዋ ካምያ ሱፍያነ ሊኑዋ ኢፐ ቃራ ኤካና።

¹⁰ እ ላገታ ስንን ታኒ እ ካሉዋ ቃራና፤ ታ ኩሽያፐ እዮ ኦንካ አሸና።

¹¹ ታኒ እ ኡፋይሳ ባለታ ኡባ፥ አጌና ፄሮ ጋላሳታ፥ እ ሳምባታ ጋላሳታ፥ ላይን ላይን ቦንቸትያ ባለታ አሻና።

¹² እያ፥ ‘ታ ላገት ታዉ እምዳ ጭጋ’ ግያ ዎይንያነ ባላሰ ም ታ ይሳና፤ ታኒ ሄ በሳ ዎራ ኦና፤ ባዞ ዶአት እያ ማና።

¹³ እያ ታና ዶጋዳ ባ ላገታ ካላዳ፥ ሳጋዮታንነ አሌቆታን አሌቀታዳ፥ ባኣለ ኤቃስ እፃነ ጩይስዳ ጋላሳታ ግሾ ታኒ እዮ ሴራና፤ ያጌስ ጎዳይ።

¹⁴ “ሄሳ ግሾ፥ ታኒ እዮ ጭማዳ መላ ቢታ ኤሀዳ፥ እዉ ሲቆ ቃላን ኦዳና።

¹⁵ ያን ታኒ እ ዎይነ ጋደ እዉ ዛራዳ እማና፤ አኮራ ዛንጋራ (መቶ ዛንጋራ) እዉ ኡፋይሳ ፐንገ ኦና። ግብፀ ቢታፈ ከይዳ ዎድያዳ ባ ጌላኦተ ላይን ደእያ ሀኖታን ኡፋይሳን የፃና” ያጌስ።

¹⁶ ሄ ጋላስ እያ ታና፥ “ታ አዝናዉ” ያጋዳ ፄጋና፤ ካሰይሳዳ፥ “ታ ጎዳዉ” ያጋዳ ፄጉኩ።

¹⁷ አይስ ጊኮ፥ ታኒ እ ዶናፐ “ባኣለ” ኤቃታ ሱን ድጋና፤ ህዛፐ ጉየ ታኒ እዮ “ባኣለ” ሱን ፄግስከ።

¹⁸ ሄ ዎደ ታኒ ታ አሳ ግሾ ሳኣ ዶአታራ፥ ሳሎ ካፎታራነ ቢታራ ጎሸትያ መተታራ ጫቃና። ታኒ ቢታፈ ዶንገ፥ ማሸነ ኦላ ይሳና። ኤንቲ ቢታ ቦላ ሳሮ ዳና።

¹⁹ ታኒ ነና መርናዉ ታዉ ማቾ ኦና፤ ፅሎተን፥ ሱረ ፕርዳን፥ መርና ሲቁዋንነ ማሮተን ታዉ ጊግሳና።

²⁰ ታኒ አማነታዳ ነና ታዉ ጊግሳና፤ ነካ ጎዳ ኤራና።

²¹ “ሄ ዎደ ታኒ ዛሮ እማና፤ ታኒ ሳሎታስ ዛሮ እማና፥ ሳሎት ሳኣስ ዛሮ እማና።

²² ሳአይ ካስ፥ ዎይነ ኡሻስነ ዛይትያስ ዛሮ እማና፤ ኤንቲ እዝራኤለስ (ፆሳይ ቶካና) ዛሮ እማና።

²³ ታኒ እዮ ታ ግሾ ጋዳ ቢታ ቦላ ቶካና፤ ካሰ ታኒ፥ ‘ማርከ’ ግዳይሳታ ማራና፤ ‘ታ አሰ ግደከታ’፤ ግዳይሳታ፥ ‘ታ አሰ’ ጋና። ኤንትካ ታና፥ ‘ኔኒ ኑ ፆሳ’ ያጋና” ያጌስ ጎዳይ።