Hose 12 - ጌሻ ማፃፋ

¹ ኤፍሬማ አሳይ ዎንታፈ ኦማርስ ጋካናዉ ዶሎሀ ጫርኮ ኦይኬስ ዎይኮ የደስ። ኤንቲ ዎርዶነ ጌላተ ዳርሶሶና፤ አሶረ ቢታራ ጫቅዶሶና፤ ሻማሆ ዛይተ ግብፀ ቢታ የዶሶና።

² ጎዳስ ይሁዳ አሳራ ሞቶይ ደኤስ፤ እ ያይቆባ ናይታ ኤንታ ኦግያዳ ሴራና፤ ኤንታ ኦሱዋዳ ኤንታዉ ዛራና።

³ ያይቆብ ባ አየ ኡሎን ደእሸ ባ እሻ ግንድያ ኦይክስ። ድጭ ጋክድ ፆሳራ ቡተትስ፤

⁴ ኪታንቾራ ባፀትድ ፆንስ። ባና ኬሀ አይፈን ፄላና መላ ባ እሻ ዬክድ ዎስስ። ያይቆብ ፆሳ ቤተለን ደምን ፆሳይ ያን እያራ ሃሳይስ።

⁵ እ ጎዳ፥ ኡባፈ ዎልቃማ ፆሳ። እያ ኤረትዳ ሱንይ ጎዳ ጌተቴስ።

⁶ ሄሳ ግሾ፥ ህንተ ፆሳኮ ስምተ፤ ሲቆነ ሱረ ፕርዳ ምን ኦይክተ፤ ህንተ ፆሳይ ኦና ጋካናዉ ናግተ።

⁷ ዛልአንቾይ ዎርዶ ምዛነን ዛልኤስ፤ እ አሳ ጭማናዉ ዶሴስ።

⁸ ኤፍሬም፥ “ታኒ ዳሮ ዱረ፤ ታኒ ታዉ አቆ ደማስ። ታ አቆ ኡባን ታናን ኤንቲ ባላ ዎይኮ ናጋራ ደሞኮና።

⁹ ሽን ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ፤ ሻቃራ ባኣለ ጋላስ ህንተ ዱንካነን ደእዳይሳዳ ታ ህንተና ዛራ ዱንካነን ዎና።

¹⁰ ታኒ ናበታስ ኦዳስ፤ ዳሮ ቆንጨ ኤንታዉ እማስ፤ ኤንታ ባጋራ ዳሮ ሌምሶታ ኦዳስ” ያግስ።

¹¹ ጋላድ ኢታ ናጋራንቾ፤ ጋላዳ አሳት ፓናይሳታ። ኤንቲ ጋልጋላን ኮርማታ ያርሻና። ኤንታ ያርሾ በሳይ ጎሻን ደእያ ኬላ ሹቻዳ ላለታና።

¹² ያይቆብ ሶረ ቢታ ባቃትስ፤ እስራኤለይ ማቾ ኤካናዉ ኡነ ኦስ። ኮይታ እማናዉ ያን ዶርሰ ሄምስ።

¹³ ጎዳይ እስራኤለ አሳ ናበታ ባጋራ ግብፀ ቢታፈ ከስድ ሄ ናበታ ባጋራ ኤንታ ናግስ።

¹⁴ ሽን ኤፍሬም ጎዳ ዳሮ ሀንቀስ፤ እ ሱ ጉስዳ ግሾ እያ ጎዳይ አቻና፤ እያ ጫሻ እያዉ ዛራና።