Hose 11 - ጌሻ ማፃፋ

ጎዳይ እስራኤለ ዶሴስ

¹ “እስራኤለይ ናአ ደእያ ዎደ እያ ዶስዳይ ታና፤ ታ ናኣ ግብፀፈ ፄጋስ።

² ታኒ ኤንታ ዳርሳዳ ፄግን፥ ኤንቲ ታፐ ዳሮ ሃክድ ብዶሶና። ባኣለ ኤቃታስ ያርሾ ያርሽዶሶና፤ ኤቃ ምስለታስ እፃነ ጩይስዶሶና።

³ ኤፍሬማ አሳ ኩሽያ ኦይካዳ ሄመ ታማርስዳይ ታና፥ ሽን ኤንታ ፓዳይ ታና ግደይሳ ኤሮኮና።

⁴ ታኒ ኤንታ ቃንነ ሲቆ ዎዶሮን ጎቻስ፤ ኤንታ ሞርገፈ ቃምባራ ደንዳ ሆካዳ ኤንታ ሙዛስ።

⁵ ኤንቲ ታኮ ስሞና እፅድ ግብፀ ቢታ ስማና፤ አሶረ ቢታ ካዎይ ኤንታ ቦላ ካዎታና።

⁶ ኤንታ ካታማን ማሽ ደንዳና፤ ኤንታ ካታማታ ፐንገታ መንረና፤ ኤንታ ዞረታይ ላለታና።

⁷ ታ አሳይ ታፐ ሃካናዉ ኮይስ። ኤንቲ ፆሳኮ ዋስኮካ፥ እ ኤንታና ቦንቸና።

⁸ ኤፍሬም፥ ታኒ ነና ዋታዳ አጎ? እስራኤለ፥ ታኒ ነና ዋታዳ አ እሞ? ታኒ ነና ዋታዳ አዳማ ካታማዳ ኦ? ታኒ ነና ዋታዳ ፃቦይማ ካታማዳ ኦ? ታኒ ነና ዳሮ ዶስያ ግሾ ታ ዎዛናይ ሄሳ ኤሮ ጌና።

⁹ ታኒ ህንተ ግዶን ደእያ ጌሻ ፆሳፈ አትሽን፥ አሰ ግድከ። ሄሳ ግሾ፥ ታኒ ታ ሱልያ ሀንቁዋ ህንተ ቦላ ኤህከ፤ ናምአን ኤፍሬማ ይስከ፤ ታ ሀንቁዋራ ህንተኮ ዪከ።

¹⁰ ኤንቲ ጎዳ ካላና፤ እካ ጋሞዳ ጉዳና። እ ጉድያ ዎደ እያ ናይት ዉሎሀ ባጋፈ ኮኮርሸ ያና።

¹¹ ግብፀፈ ካፎዳ፥ አሶረፐ ሆለዳ ፓልሸ ያና። ታኒ ኤንታ፥ ኤንታ ኬን ኬን ዎና። ታኒ ጎዳይ ሄሳ ኦዳስ” ያግስ።

እስራኤለ ናጋራ

¹² ኤፍሬማ አሳይ ዎርዶን፥ እስራኤለ አሳይ ጭሞን ታና ተቅዶሶና። ይሁዳ አሳይ አማንያ ጌሻ ፆሳ ቦላ ፃልታምስ።