Hizqeela 4 - ጌሻ ማፃፋ

የሩሳላመ ተቀተ ሌምሶ

¹ “ነኖ አሳ ናአዉ፥ ቢታፈ መዳ ፁበ ኤካዳ፥ ነ ስንን ዎ፤ ያታዳ የሩሳላመ ካታማ ምስለ እያ ቦላ መ።

² ካታማ ዩሹዋ ድራ፤ እያ ቢታ ዶራ፤ ሚፃ ኬ፤ ኦላንቾት ኡትያ በሲ ጊግሳ፤ ግምብያ ላልያ ዱሩማ እያ ዩሾን ጊግሳ።

³ ብራታ ባሸ ኤካዳ፥ ነ ግዶንነ ካታማ ግዶን ድርስ ኦዳ ኤሳ። ነ ሶምኡዋ እያኮ ዛራዳ ደሬቃ፤ ካታማ ዩሹዋ ተቃ፤ እያ ተቀይካ ነና፤ ሄስካ እስራኤለ አሳስ ማላ ግዳና።

⁴ “እስራኤለ አሳ ሴረተስ ማላ ግዳና መላ ኔኒ ነ ሀድርሳ ምየን ዝንአ። ኔኒ ነ ሀድርሳ ምየን ዝንእያ ጋላሳታ ታይቡዋን እስራኤለ አሳይ ዋንድ ሴረታናዉ ደእያኮ በሳና።

⁵ እስራኤለ አሳይ ዋንድ ሴረታናዉ ደእያኮ በሳናዉ ኔኒ ዝንአና መላ ሄ ፄታነ ኡዱፉን ታሙ ጋላስ ነዉ እማስ፤ እስ ጋላስ እስ ላይራ ግና ግዳና።

⁶ “ኔኒ ሄ ጋላሳታ ፖልዳፐ ጉየ፥ ዛራዳ፥ ይሁዳ አሳይ ዋንድ ሴረታናዉ ደእያኮ በሳናዉ ነ ኡሻቻ ምየን ዝንአና መላ ኦይታሙ ጋላስ ነዉ እማስ። እስ ጋላስ እስ ላይራ ግና ግዳና።

⁷ ነ ሶምኡዋ ተቀትዳ የሩሳላመኮ ዛራዳ፥ ነ ኩሽያ ደንዳ ማንዳሸ፥ የሩሳላመ ቦላ ትንብተ ኦዳ።

⁸ ሄ ተቀይ ዉራና ጋካናዉ እስ ምየፐ ሀራ ምየ ሽረቶና መላ ታ ነና ዎዶሮን ቃቻና።

⁹ “ኔኒ ግስተነ ባንጋ፥ ቆምኦሎነ ምስረ፥ ማልዶነ ሙርቃ ኤካዳ፥ ካ ዎያ ሚሸን ቆላዳ፥ ኔኒ ዝንእያ ሄ ፄታነ ኡዱፉን ታሙ ጋላስ እያፐ ካዳ ማና።

¹⁰ ጋላስ ጋላስ ነ ምያ ካ ማዛና፤ እካ ናምኡ ፄታነ ሀስታሙ ግራመ ግዶ፤ ሄሳ እያ ዎደን ዎደን ማ።

¹¹ ጋላስ ጋላስ ነ ኡያ ሃይካ ልከራ ግዶ፤ እካ ናምኡ ኩባያ ግዶ፤ ሄሳ እያ ዎደን ዎደን ኡያ።

¹² ዎራ ሼሻ ከምኤለ ኤዳ፥ አሳይ ፄልሽን፥ ሄ ዋላክዳ ካ ባንጋ ኡይዳ ኡካዳ ማ።

¹³ ሄስ እስራኤለ አሳይ ታ ኤንታ ላልያ ካዎተታ ግዶን ደእሸ፥ ቱንዳ ካ ማናዉ ደኤይሳስ ማላ” ያግስ።

¹⁴ ታኒ፥ “ሀይእ! ኡባ ሃርያ ጎዳዉ፥ ሄስ ሀነና፤ ታኒ ቱናዳ ኤርከ። ታ ናአተፈ ዶማዳ ሀች ጋካናዉ፥ ባዉታ ዎይኮ ዶእ ዎዳባ ማ ኤርከ፤ ቱንዳ አሾይ ታ ዶናኮ ሺቅ ኤረና” ያጋስ።

¹⁵ እ ዛሪድ፥ “ሎኦ፥ ያትኮ፥ ዎራ ሼሻ ከምኤለን ኡከይሳ አጋዳ፥ ኦሻ ከምኤለን ነ ኡይ ኡካ” ያግስ።

¹⁶ እ ጉጅድ፥ “ነኖ፥ አሳ ናአዉ፥ አኬካ! የሩሳላመ ካታማ ካ ገሎና መላ ታኒ ተቃና ሀናይስ። አሳይ ካ ህርግሸ ማክድ ማና፤ ሃ ያይሸ ልክድ ኡያና።

¹⁷ ህዛ፥ ኤንታዉ ደእያ ካይነ ሃይ ዉራና፤ ኤንቲ ዳጋማን እሶይ እሱዋ ፄላና፤ ባንታ ናጋራ ጋሶን ሴረትድ ግልቃና።