Galatiya 4 - ጌሻ ማፃፋ

¹ ታ ገይስ ሀይሳ። ላተይ ናኣ ግድ ደእሸ፥ ሻሎ ኡባይ እያባ ግድኮካ፥ እ አይለፈ አይኮካ ዱማተና።

² ሽን እያ አዋይ ግዳ ዎደይ ጋካናዉ እ ሀዳራ ኤክዳይሳታ ኩሸንነ ናገይሳታ ኩሸን ደኤስ።

³ ሄሳዳካ፥ ኑኒ ናአተን ደእያ ዎደ አላምያ ዎጋስ አይለትድ ደእዳ።

⁴ ሽን ዎደይ ጋክዳ ዎደ ፆሳይ ህገፈ ጋርሳን፥ ማጫሳፐ የለትዳ ባ ናኣ ኪትስ።

⁵ እ ሄሳ ኦዳይ፥ ህገስ ሃረትድ ደኤይሳታ ዎዛናዉነ ኑና ባ ናይታ ኦናሳ።

⁶ ኑ ፆሳ ናይታ ግድያ ግሾ፥ “አባ፥ አዋዉ” ግድ ፄግያ ባ ናኣ አያና ኑ ዎዛና ግዶ ኪትስ።

⁷ ሄሳ ግሾ፥ ህዛፐ ኔኒ ፆሳ ናአፐ አትሽን፥ አይለ ግዳካ። ኔኒ እያ ናአ ግድኮ፥ ፆሳ ላተይሳ ግዳዳሳ።

ጳዉሎስ ጋላትያ አሳስ ቆፔስ

⁸ ህንተ ካሰ ፆሳ ኤሮና ዎደ ፆሰ ግዶናይሳታስ አይለ ግድድ ሃረትደታ።

⁹ ሽን ሀእ ህንተ ፆሳ ኤርደታ፤ ኡባራካ ፆሳን ኤረትደታ። ያትን ፓናነ ጎኦና አላመ ዎጋታኮ ጉየ ዋንድ ስመቲ? ዎ ኤቅድ፥ ዋንድ ኤንታዉ አይለ ግዳናዉ ኮዬቲ?

¹⁰ ዱማ ግድዳ ጋላሳታ፥ አጌናታ፥ ዎደታነ ላይታ ህንተ ሎይ ቦንቸታ።

¹¹ ታና ህንተባይ ያሼስ፤ ታ ህንተዉ ጮ ዳቡራድናሻ?

¹² ታ እሻቶ፥ ታ ህንተዳ ሀንዳ ግሾ፥ ህንተካ ታዳ ሀንተ ጋዳ ህንተና ዎሳይስ። ህንተ ታና አይብንካ ቆህቤከታ።

¹³ ታኒ ኮይሮ ሀርገታሸ ህንተዉ ዎንገላ ኦድዳይሳ ህንተ ኤሬታ።

¹⁴ ታ ሀርገይ ህንተዉ ፓጨ ግድኮካ፥ ታና ሳለትበከታ፤ እፅበከታ። ሽን ታና ፆሳ ኪታንቾ ዎይኮ ክርስቶስ የሱሳ ሞከይሳዳ ሞክደታ።

¹⁵ ያትን፥ ሄ ህንተዉ ደእያ ኡፋይሳይ ኡባይ አዉ ብዴ? ህንተዉ ዳንዳኤትዳኮ፥ ህንተ ታዉ፥ ህንተ አይፍያ ከስድ እምያኮ እፆናይሳ ታ ማርካታይስ።

¹⁶ ያትን፥ ታ ህንተዉ ቱማ ኦድዳ ግሾ ህንተዉ ሞርከ ግዳድናዬ?

¹⁷ ሄ አሳት ህንተና ባንታኮ ዛራናዉ ኮዮሶና፥ ሽን ኤንታ ቆፋይ ሎኦሳ ግደና። ኤንታ ቆፋይ ህንተና ሻካናሳነ ህንተ ኤንታዉ ቆፓና መላ ኦናሳ።

¹⁸ ሎኦባ ኦናዉ አሞትኮ ሎኦ፥ ሽን ሄስ ታ ህንተራ ደእያ ዎደ ፃላላ ግዶናሽን ኡባ ዎደ ግዶ።

¹⁹ ታ ሲቆ ናይቶ፥ ክርስቶስ ህንተናን ምስለታና ጋካናዉ ማጫስ የሎስ እቀተይሳዳ ታ ህንተ ግሾ እቀታይስ።

²⁰ ህንተባይ ታዉ ሀድርን ታ ኡንኤታስ፤ ሀእ ህንተ ግዶን ታ በንታዳ ሸነታዳ ኦድያኮ አይ መላ ዶሳይናሽን።

አጋሮነ ሳሮ

²¹ ሙሰ ህገን ሃረትድ ዳናዉ ኮየይሳቶ፥ አነ ታዉ ኦድተ፤ ህገይ አይ ግያኮ ኤረከቲ?

²² ጌሻ ማፃፋይ፥ “አብራሃመስ ጋንደፈነ ጎዳተፈ የለትዳ ናምኡ ናይት ደኦሶና” ያጌስ።

²³ ጋንደ ናአይ አስ ናአ የልያ ማራን የለትስ፥ ሽን ጎዳተ ናአይ ፆሳ ኡፋይሳ ቃላን የለትስ።

²⁴ ሀ ማጫሳት ናምኡ ጫቆታስ ሌምሶ ግድድ ኤከቶሶና። ኤንታፈ እስንያ፥ ሲና ዙማፐ ይዳራ፥ ባ ናይታ አይለተስ የላሱ፤ እያካ አጋሮ።

²⁵ አጋራ አራበ ቢታን ደእያ ሲና ዙማን ሌምሰታዳ ሀእ ደእያ የሩሳላመ ዳናዉሱ። አይስ ጊኮ፥ እያ ባ ናይታራ አይለተን ደአዉሱ።

²⁶ ሽን ሳሎን ደእያ የሩሳላመይ አይለተን ደኡኩ፤ እያ ኑ ኡባስ አዮ።

²⁷ ጌሻ ማፃፋይ፥ “ናተ፥ የሎና ማይንተ ኡፋይታ፤ ናተ እቀታ ኤሮናረ እልላ። አዝናራ ደእያ ማጫሴፐ፥ አዝን ባይና ማጫሴስ ናይት ዳሮ” ያጌስ።

²⁸ ታ እሻቶ፥ ህንተ ይሳቃዳ ፆሳ ኡፋይሳ ቃላን የለትዳ ናይታ።

²⁹ ሽን ሄ ዎደ አሳ ማራዳ የለትዳይስ፥ አያና ዎልቃን የለትዳይሳ ጎድስ። ሀችካ ሄሳ መላ።

³⁰ ሽን ጌሻ ማፃፋይ ዎይጊ? “ጋንደ ናአይ ጎዳተ ናኣራ እስፈ ላቶና ግሾ፥ አይልዉ እ ናኣራ ዎላ ከሳ የዳ” ያጌስ።

³¹ ሄሳ ግሾ፥ ታ እሻቶ፥ ኑኒ ጎዳተ ናይታፐ አትሽን፥ ጋንደ ናይታ ግዶኮ።