Galatiya 1 - ጌሻ ማፃፋ1 አሳፐ ዎይኮ አሳ ባጋራ ግዶናሽን፥ የሱስ ክርስቶሳፐነ እያ ሀይቆፐ ደንዳ ፆሳ አዋፐ ሀዋረ ግዳና መላ ኪተትዳ ታ ጳዉሎስ፥ 2 ታራ ደእያ አማንያ እሻት ኡባይ፥ ጋላትያን ደእያ ዎሳ ኬታስ ኪትዳ ኪታ። 3 ፆሳይ ኑ አዋይነ ኑ ጎዳ የሱስ ክርስቶሲ ህንተዉ አ ኬሀተነ ሳሮተ እሞ። 4 ሀ ኢታ ዎድያፐ ኑና አሻናዉ፥ ኑ ፆሳ፥ ኑ አዋ ሸነን ክርስቶስ ኑ ናጋራ ግሾ ባና አድ እሚስ። 5 ፆሳስ መርናፐ መርና ጋካናዉ ቦንቾይ ግዶ። አምንእ። ቱማ ዎንገላይ እስኖ 6 ክርስቶሳ አ ኬሀተን ህንተና ፄግዳ ፆሳ አግድ፥ ሀራ ዎንገላኮ፥ ህንተ ኤለስድ፥ ዋንድ ስምዳኮ ታና ማላልሴስ። 7 ህንተና ባለናዉነ ክርስቶሳ ዎንገላ ዎብሳናዉ ኮይያ ጉ አሳት ደኦሶናፐ አትሽን፥ ቱማ ዎንገላይ እስኖ። 8 ሽን ኑና ግድን ዎይኮ ሳሎ ኪታንቾ ግድን ኑኒ ህንተዉ ኮይሮ ኦድዳ ዎንገላፐ ዱማትያ ሀራ ዎንገላ ህንተዉ ኦድያባ ግድኮ፥ እ ባደትዳባ ግዶ። 9 ሀይሳፈ ስን ኑኒ ግዳይሳዳ ሀእካ ዛራዳ ጋይስ። ህንተ ኤክዳ ዎንገላፐ ዱማትያ ዎንገላ ኦንካ ህንተዉ ኦድኮ ሄ ኡራይ ባደትዳባ ግዶ። 10 ያትን፥ ታና አስ ናሻና መላ ኮያናዬ? ዎይኮ ፆሲ ናሻና መላ ኮያይና? ዎይኮ ታ አሰ ኡፋይሳናዉ ኮያይና? ታ አሰ ኡፋይሳናዉ ኮያባ ግድኮ፥ ክርስቶሳ አይለ ግድከ። ጳዉሎሳ ፄገተ 11 ታ እሻቶ፥ ታ ህንተዉ ኦድዳ ዎንገላይ አሳፐ ግዶናይሳ ህንተ ኤራና መላ ታ ኮያይስ። 12 ታዉ ሀ ዎንገላ የሱሲ ክርስቶስ ቆንጭስስፐ አትሽን፥ አሳፐ ኤካብከ ዎይኮ አስ ታና ታማርስቤና። 13 ታ ካሰ አይሁደ አማኖን ደእያ ዎደ ዋና ደእዳኮ፥ ህንተ ስእደታ። ታ ዎሳ ኬ ቃይ ባይና ጎዳናዉነ ይሳናዉ ባፀታስ። 14 አይሁደ አማኖ ናጎን፥ ታ ዎደን ደእያ አይሁደ እሻታፐ አይስ። ኑ አዋታ ዎጋስ አዳ ምሸታይስ። 15 ሽን ታ ቡሮ ታ አየ ኡሎን ደእሽን ፆሳይ ታና ዶርስ፤ ባ አ ኬሀተን ታና ፄግስ። 16 አይሁደ ግዶና አሳስ ዎንገላ ኦዳና መላ ፆሳይ ባ ናኣ ታዉ ቆንጭስዳ ዎደ ታ ኦደራካ ዞረታብከ። 17 ዎይኮ ታፐ ስን ሀዋረ ግድዳይሳታራ ጋሄታናዉ የሩሳላመ ባብከ። ሽን ታ ካሰታዳ አራበ ቢታ ባስ፤ ሄሳፈ ስማዳ ዳማስቆ ካታማ ያስ። 18 ሄ ላይፈ ጉየ፥ ጰፅሮሳራ ጋሄታናዉ የሩሳላመ ባዳ እያራ ታማነ እቻሹ ጋላስ ኡታስ። 19 ሽን ጎዳ እሻ ያይቆባፐ አትሽን፥ ሀንኮ ሀዋረታ በአብከ። 20 ታ ህንተዉ ፃፍይዳይስ ዎርዶ ግዶናይሳ ፆሳ ስንን ህንተዉ ቆንጭሳይስ። 21 ሄሳፈ ጉየ፥ ታኒ ሶረ ቢታነ ክልቅያ ቢታ ባስ። 22 ይሁዳን ደእያ ዎሳ ኬ አሳይ ታና በእድ ኤርቦኮና። 23 ሽን ኤንቲ፥ “ካሰ ኑና ጎድያ ኡራይ፥ ሀእ ሄ እ ይሳናዉ ኮይያ አማኑዋባ ሳባኬስ” ያገይሳ ስእዶሶና። 24 ስእዳ ኡባይ ታ ጋሶን ፆሳ ጋላትዶሶና። |
The Word for the World International and The Word for the World Ethiopia