Erata 8 - ጌሻ ማፃፋ

¹ ጭንጫ አስ ዳነይ ኦኔ? ኡባባስ ብርሸ ኤረይ ኦኔ? ጭንጫተ ፓሽክስድ፥ ምዳ ሶምኡዋ ፖእሴስ።

ካዎስ ኪተታ

² ካዎስ ኪተታ፤ ካሰ ኔኒ ኪተታና ጋዳ ፆሳ ስንን ጫቃዳሳ።

³ ካዋ ስንፈ ኤለሳዳ ከዮፓ፤ ካዎይ ባ ኮይዳባ ኦናዉ ዳንዳእያ ግሾ ኢታ ኦሶ ኦናዉ ደንዶፋ።

⁴ ኡባባ ኦናዉ ካዋስ ማት ደእያ ግሾ፥ “አይስ ሀይሳ ኦዲ?” ያግድ እያ ኦይቻናዉ ዳንዳኤይ ኦኔ?

⁵ እያ ኪታ ፖልያ አስ ቆሄተና፤ ጭንጫ አስ ልከ ዎድያነ ኦያ ኦግያ ኤሬስ።

⁶ አሰ ዴፆ መቶይ ጋክኮካ ኡባባስ ዎደይነ ኦገይ ደኤስ።

⁷ ስንፈ ሀናናባ ኤርያ አስ ባዋ፤ “ሀይስ ሀናና” ግድ ኦዳናዉ ዳንዳኤይ ኦኔ?

⁸ ሸምፖይ ሻከትድ ብያ ጋላስ ኦይክድ ተቃናዉ ዳንዳእያ አስ ባዋ፤ ዎይኮ ሀይቆይ ባ ጋላሳን ዮናዳ ድጋናዉ ዳንዳእያ አስ ባዋ። ኦላ ዎደ ኦንካ ኦለትከ ጋናዉ ዳንዳኦናይሳዳ ኢታተ ኢታ ኦያ ኡራ የደና።

⁹ ሳሎፐ ጋርሳን ሀንያባ ኡባ ታኒ አኬካዳ ቆፕያ ዎደ አስ ባዉ ደእያ ማታ ሀራ አስ ቆሀናዉ ጎኤተይሳ በአስ።

¹⁰ ኢታ አሳት ቦንቾን ሞገትሽን በአስ። ኤንቲ ኢታተ ኦዳ ካታማ አሳይ ሺቅድ ኤንታ ሳቢሽን ስአስ፤ ሄስ ኡባይ ሀዳ።

¹¹ አስ ቆፕድ ኢታባ ኦያ ጋሶይ፥ ኢታባ ኦዳ አሳታ ኤለስድ ሴረይ ባይና ግሾሳ።

¹² ናጋራንቾይ ፄቱ ቶሆ ኢታባ ኦሽን እያ ባረይ አዱቅኮካ፥ ፆሰ ያየይሳታስነ ቦንቸይሳታስ ሳእ ሎአናይሳ ታ ኤራይስ።

¹³ ኢታት ፆሰ ያዮና ግሾ ሳሮተ ኤንታዉ ባዋ፤ ኤንቲ ፆሰ ያዮና ግሾ ኤንታ ባረይ ኩያዳ ቃማና።

አስ ፆሳ ኦገ ኤረና

¹⁴ ሀ ሳአን ኦሰትያ ሀራ ሀዳባይ ደኤስ። ሄስካ፥ ጌሻ አሳት፥ ናጋራንቾት ኤካናዉ በሲያ ሴራ ኤክያ ዎደ ናጋራንቾት ጌሻት ኤካናዉ በሲያ ሎኦባ ኤከይሳ፤ ሄስ ኡባይ ሀዳ።

¹⁵ አስ ምያባፐ፥ ኡያባፐነ ባና ኡፋይስያባፐ አድ ሎኦባይ ሳሎፐ ጋርሳን ሀር ባይና ግሾ፥ አስ ባ ደኦን ኡፋይትኮ ሎኦ ጋስ። ፆሲ እያዉ እምዳ ላይን እ ዳቡርድ ደምዳባን ኡፋይታናዉ ዳንዳኤስ።

¹⁶ ታኒ ጭንጫተ አይበኮ ኤራናዉነ አስ ሀ ሳአ ቦላ ዳቡርያ ዳቡራ አኬካናዉ ሀልቻስ፤ ዉርሰን አስ ስኮ ይድ ኦያ ኦሶይ ደኤይሳ በአስ።

¹⁷ ታኒ ፆሲ ኦዳባ ኡባ በአስ። ሳሎፐ ጋርሳን ኦሰትዳ ኦሶ አስ ፕልግድ ኤራናዉ ዳንዳኦናይሳ ኤራስ። አስ አይ መላ ዳቡርድ ፕልግ ፄልኮካ፥ እያ ብርሸ ኤራናዉ ዳንዳኤና። ቃስ ጭንጫ አስ ሀይሳ ኤራይስ ጋናዉ ዳንዳኤና።