Erata 4 - ጌሻ ማፃፋ

ገነ፥ ዳቡራነ ብዛተ

¹ ታኒ ዛራዳ፥ ሳሎፐ ጋርሳን አይ መላ ናቆይ ደእያኮ በአስ። ናቀተይሳት ምን ይድ ዬኮሶና። ናቀይሳታ ኩሸን ማት ደእያ ግሾ ናቀተይሳታ ማደይ ባዋ።

² ታኒ፥ “ሀእ ፓፃ ደኤይሳታፐ ካሰ ሀይቅዳይሳት ሎኦ” ያጋስ።

³ ግዶሽን፥ ሀ ናምአታፐ አድ የለትቦናይሳታነ ሳሎፐ ጋርሳን ኦሰትያ ናቁዋ በኦናይሳታ ቃዳይ ሎኦ።

⁴ አሳ ዳቡርነ አሞትዳባ ደሞይ፥ አሳስ ባ ላግያ ቦላ ደእያ ቃናተፐ ፑልተይሳ በአስ። ሄስካ ሀዳ፤ ጫርኮ ኦይካናዉ ካሎ መላ።

⁵ ባ ኩሸ እድምድ ኡትያ አዛላይ ኮሻን ሀይቄስ።

⁶ ዳቡራንነ ጫርኮ ካሎን ደምያ ዳኮባፐ ዎፓን ደምያ እስ ኩሸይ ሎኦ።

⁷ ሳሎፐ ጋርሳን ሀዳ ግድዳባ ሀራባ በአስ።

⁸ ሄስካ ናእ ዎይኮ እሽ ባይና እስ ብዛ አደይ ደኤስ። ሽን እያ ዳቡራስ ዛው ባዋ፤ ባዉ ደእያባን አለና። እ ባና፥ “ታ ሀይሳ ኦደስ ዳቡራይና? ታኒ ታና አይስ ኡፋይስ ድጋድና?” ያግድ ኦይችስ። ሄስካ ቃስ ሀዳነ መቶ ደኦ።

⁹ ባንታ ኦሱዋን ሎኦ አይፈ ደምያ ግሾ እስኖ ግደይሳፈ ናምአ ግደይስ ሎኦ።

¹⁰ ናምኣፈ እሶይ ኩንድኮ እሶይ ደንስ፤ ሽን ባርካ ደእያ ኡራይ ኩንድኮ እያ ደንይ ባይና ግሾ እያ አየ!

¹¹ ናምአይ እስፈ ዝንእኮ ሆኤስ፤ ሽን ባርካ ዝንእያ ኡራ ዋንድ ሆአናዉ ዳንዳኢ?

¹² እስ አስ ባርካ ተቃናዉ ዳንዳኦና መቱዋ ናምኡ አሳት ተቃናዉ ዳንዳኦሶና። ሄ አይፈን ዶቀትዳ ዎዶሮይ ኤለ ዱፀና።

አሳፐ አድ በንቶይ ሀዳ

¹³ ዞረ ኤኮና ኤያነ ጬጋ ካዉዋፐ ማንቆነ ጭንጫ ግድዳ ናአተ ካዎይ ሎኦ።

¹⁴ ሄ ናአተይ ቃሾ ኬፈ ከይድ ዎይኮ ማንቆተፈ ደንድድ ካዎ ግዳናዉ ዳንዳኤስ።

¹⁵ ሳሎፐ ጋርሳን ደእያነ ስመረትያ አሳ ኡባይ ካዋ ላትያ ናአተ ካለይሳ በአስ።

¹⁶ እስ ካዎይ ሃርያ አሳ ታይቦይ ዳሮ ግዳናዉ ዳንዳኤስ። ሽን ካልያ የለተይ እያ ካዎተን ኡፋይትቤና። ሄስካ ሀዳ፤ ጫርኮ ኦይካናዉ ካሎ መላ።