Erata 2 - ጌሻ ማፃፋ

ባና ዶሶይ ሀዳ

¹ ታኒ ታኮ፥ “ሃያ፥ ታ ነና ኡፋይስ አይበኮ ኤርሳናዉ ሎኦባ በሳና” ያጋስ፤ ሽን ሄስካ ሀዳ።

² ሚች ኤያተ ግደይሳ፥ ቃስ ሚኮይነ ኡፋይስ አይኮካ ጎኦናይሳ አኬካስ።

³ ሀእካ ታ ዎዛናይ ጭንጫተን ታና ካለሽን፥ ታና ዎይነ ኡሻን ኡፋይሳናዉ፥ ኤያካ ግዳናዉ ፓጫስ። አስ ባ ቃን ዎደን ሳሎፐ ጋርሳን ደእያባ ቦላ አይ ኦኮ ጎአነኮ ኤራናዉ ኮያስ።

⁴ እስ ግታባ ኦስ፤ ታ ዳና ኬታ ኬፃስ፤ ዎይነ ቶካስ።

⁵ ዱማ ዱማ አታክልትያነ አይፈ አይፍያ ምታ ቶካስ፤ አስ ሸምፕያ በሳ ጊግሳስ። ሄ በሳን ዱማ ዱማ አይፈ አይፍያ ምታ ቶካስ።

⁶ ሄ ምታ ኡሻናዉ፥ ሃ ዳጋያ በሲ ዜራዳ ጊግሳስ።

⁷ አደነ ማጫ አይለታ ሻማስ፤ ቃስ ታ ሶን የለትዳ ሀራ አይለትካ ታዉ ደኦሶና። ታፐ ካሰ የሩሳላመን ደእዳ አሳፐ አያ መሄ፥ ዴሸነ ዶርሰ ሃራስ።

⁸ ታ ሃርያ ዱማ ዱማ ቢታታፐነ ካዎታፐ ቦንቸትዳ ቡቁራ ኤህሳዳ፥ ዳሮ ዎርቃነ ብራ ታዉ ዳጋያስ። ቃስ፥ ታና ሳቢድ የፅያ አደነ ማጫ ሺሻስ፤ ሄሳ ቦላ፥ አሳስ ኡፋይስ እምያ ዳሮ ማጫሳታ ሺሻስ።

⁹ ታኒ ካሰ የሩሳላመን ደእዳ ኦደፈካ አዳ ግታ አስ ግዳስ። ታ ጭንጫተይካ ታራ ዉርሰ ጋካናዉ ደእስ።

¹⁰ ታ አይፈይ ፄልዳባነ ታ ዎዛናይ አሞትዳባ ኡባ ደማስ፤ ታ አሳተይ ኮይያ ኡፋይስ ኡባ ድጋብከ። ታኒ ኦዳ ኦሶ ኡባን ኡፋይታስ፤ ታ ዳቡራ ዎይ ሄሳ።

¹¹ ግዶሽን፥ ሄሳ ኡባ ኦ ስማዳ ታኒ አኬክያ ዎደ፥ ዳሮ ታኒ እያዉ ዳቡርዳ ኡባይ ሀዳ ግደይሳ በአስ። ሳሎፐ ጋርሳን ጎእያባይ አይኮይ ባዋ፤ ኡባይ ጫርኮ ኦይካናዉ የደያ መላ።

ጭንጫተነ ኤያተ ሀዳ

¹² ሄሳፈ ጉየ፥ ታኒ ጭንጫተ፥ ኤያተነ ጎሻተ አይበኮ ፓጫዳ ኤራናዉ ቆፋ ዶማስ። አዉደ ግድንካ ካዎይ ኦናዉ ዳንዳኤይ እያፐ ካሰ ካዎትዳ ካዎይ ኦዳይሳፈ ሀራባይ አይብ ደኢ?

¹³ ፖኦይ ማፐ፥ ጭንጫተ ኤያተፈ ሎኦ ግደይሳ ታኒ በአስ።

¹⁴ ጭንጫ አሳ አይፈት እያ ሁጵያ ግዶን ደኦሶና፤ ሽን ኤያት ማን ሄመቶሶና። ግዶሽን፥ ኤንታ ናምኣ ዉርሰይ እስኖ ግደይሳ አኬካስ።

¹⁵ ታኒ ታኮ፥ “ኤያ ጋከያ ቃዳይ ታናካ ጋኬስ፤ ያትን፥ ታኒ ጭንጫ ግደይስ ታና አይ ማዲ?” ያጋዳ ቆፓስ። ቃስ ታኒ ታ ዎዛናን፥ “ሀይስካ ሀዳ” ያጋስ።

¹⁶ ኤያ ግድን ጭንጫ፥ ሀይቆፐ ጉየ፥ እያ ሀሳየይ ባዋ፤ ስንፈ ያ ላይን ኑኒ ኡባይ ዶገትድ አታና። ኤያይ ሀይቀይሳዳ፥ ጭንጫይካ ሀይቄስ።

ኦሶን ዳቡር ሀዳ

¹⁷ መቶፐ አትሽን፥ ጎእያባይ ባይና ግሾ፥ ሀ ደኦይ ታና ሻትስ። ሄስካ ሀዳ፤ ጫርኮ ኦይካናዉ የደያ መላ።

¹⁸ ሳሎፐ ጋርሳን ታኒ ዳሮ ዳቡራዳ ደምዳ ታ ሻሉዋ ኡባ ታፐ ጉየራ ያ ኡራስ አጋዳ ብያ ግሾ፥ ታኒ ዳቡርዳ ኡባይ ታና ሻትስ።

¹⁹ ታፐ ጉየራ ያ አደይ ጭንጨኮ ኤየኮ ኦን ኤሪ? ሽን እ ኦና ግድንካ፥ ታኒ ዳሮ ዳቡርዳባነ ታ ጭንጫተን ደምዳባ ኡባ ባዉ ኤክድ፥ ጎዳ ግዳና፤ ሄስካ ሀዳ።

²⁰ ሄሳ ግሾ፥ ሳሎፐ ጋርሳን ታ ዳቡርዳባ ቦላ ታ ዎዛናይ ኡፋይስ ቃንፅስ።

²¹ አስ ባ ደእዳ ላይን ባዉ ደእዳ ጭንጫተን፥ ኤራንነ ሂላን ዳቡርድ ደምዳባ ኡባ አይኮካ ዳቡሮናይሳስ የግድ ቤስ። ሄስካ ሀዳነ ግታ ቆሆ።

²² ያትን፥ ሳሎፐ ጋርሳን አስ ዳሮ ዳቡርድ ኦዳባ ኡባፈ አይ ጎአ ደሚ?

²³ እ ባ ደኦ ላይን ዳቡርያ ዳቡር ኡባይ አዛኖፐነ ሙደፈ አትሽን፥ ሀር አይብካ እያዉ ጉጀና፤ ሀር አቶሽን ቃማካ እያ ሁጰይ ቆፋፐ ሸምፐና፤ ሄ ኡባይካ ሀዳ።

²⁴ ህዛ አሳስ ጎአ ግድያባይ አይበ ጊኮ፥ አስ ምድ ኡይድ ባ ዳቡራን ኡፋይታናይሳ። ሄ ኡፋይሳይ ቃስ ፆሳ ኩሽያፐ እመትዳባ ግደይሳ ታኒ አኬካስ።

²⁵ እያ ሸነ ግዶና፥ ምን ኡይን አሳስ ኡፋይስ አዉን ደኢ?

²⁶ ፆሳ ኡፋይስያ ኡራስ ፆሳይ ጭንጫተ፥ ኤራተነ ኡፋይስ እሜስ፤ ናጋራንቹዋስ እ ዳቡርድ ሺሻና መላ፥ ዳቡራ እሜስ። ሽን እ ሺሽዳይሳ ፆሳይ ኤክድ፥ ባዉ ያይያ ሀራስ እሜስ። ሄሳ ግሾ፥ ሀ ኡባይ ሀዳነ ጫርኮ ኦይካናዉ የደ መላ።