Erata 10 - ጌሻ ማፃፋ

¹ ሀይቅዳ ኡዱንፀት ሳውያ ሽቱዋ ፅንቅሶሶና፤ ሄሳዳካ፥ ጉ ኤያተ ጭንጫተነ ግታ ቦንቹዋ ኢሴስ።

² ጭንጫ አሳ ዎዛናይ እያ ኡሻች ካለስ፤ ሽን ኤያ አሳ ዎዛን ሀድርስ ካለስ።

³ ኤያ አስ ኦገ ሄመትያ ዎደ እያዉ አኬክ ባዋ፤ እ ኤያ ግደይሳ አስ ኡባይ ኤሬስ።

⁴ ነ ሀላቃይ ነ ቦላ ሀንቀትኮ ነ በሳ የዶፋ፤ ስእ ግድ ዳንዳኦይ ግታ ናጋራ አቶ ጊሴስ።

⁵ ሳሎፐ ጋርሳን ታኒ በእዳ ሀራ ኢታባይ ደኤስ። ሄስካ ደርያ ሃረይሳት ኦያ ናቁዋ።

⁶ ኤያት ዳሮ ቃ ሹማተ ኦይክድ ደእያ ዎደ ዱረት ዝቃ በሳን ኡትዶሶና።

⁷ ታኒ አይለት ሃረይሳታዳ ፓራ ቶግድ ብሽን ቃስ ሃረይሳት አይለታዳ ቶሆን ሄመትሽን በአስ።

⁸ ኦላ ቦክያ አስ ሄ ኦላን ኩንዴስ፤ ግምበ ድርስ ላልያ ኡራ ሾሽ ዱኬስ።

⁹ ሹቹ ደንያ አስ ሄ ሹቻን፥ ም ቀርያ አስ ሄ ምን ደሸቴስ።

¹⁰ ዱንእዳ ካልታ ሌፎና ቀርኮ ዳሮ ዎልቃ ዉርሴስ፤ ሽን ጭንጫተን ኦያ ኦሱዋስ አይፈይ ደኤስ።

¹¹ ሾሽ ዱክ አግን ሾሹ ዶቅያ ለ ዎይስ ሄ ኡራ አይኮካ ማደና።

¹² ጭንጫ አሳ ኦድ እያዉ ቦንቾ እምሴስ፤ ሽን ኤያይ ባ ዶናፐ ከይዳ ቃላን ባዉ መቶን ገሌስ።

¹³ ኤያይ ባ ሃሳያ ኤያ ቃላን ዶምድ፥ ኢታተንነ ጎሻተን ፖሌስ።

¹⁴ ኤያ አስ ዳሮባ ኦደቴስ። ግዶሽን፥ ስንፈ ሀናናዉ ደእያባ ኦንካ ኤረና። አስ ሀይቅ አግን፥ ሀንያባ እያዉ ኦዳናዉ ዳንዳኤይ ባዋ።

¹⁵ ኤያ አስ ባ ኦሶን ዳቡሬስ፤ እ ባ ሶ ብያ ኦግያ ኤረና።

¹⁶ ናአ ግድዳ ካዎይነ ዎንታ ጉራ ግብራ ምያ ሀላቃት ደእያ ቢተ ነና አየ!

¹⁷ ቦንቸትዳ ካዎይነ ማታናዉ ግዶናሽን ዎልቃነ ምኖተ ደማናዉ ማራን ምያነ ኡያ ሀላቃት ደእያ ቢትያ አንጀትዳሮ።

¹⁸ አደይ አዛላ ግድኮ እያ ካራይ ዎዴስ፤ እያ ኩሸይ ኦናባ ግድኮ፥ እያ ኬይ ፆኬስ።

¹⁹ ካ ሙሳንነ ዎይነ ኡሻን ኡፋይስ በንቴስ፤ ሽን ሚሸይ ኡባባ ሻሜስ።

²⁰ ስእያ አስ ባዋ ጋዳ ነ ዎዛናን ካዎ ጫዮፓ፤ ዎይኮ ነ ዝንእያ ክፍልያን ዱረ ኡራ ባዶፋ። ነ ግዳይሳ ሳሎ ካፎይ ብድ ኤንታዉ ኦዳናዉ ዳንዳኤስ።