Erata 1 - ጌሻ ማፃፋ

ኡባባይ ሀዳ

¹ ሀይስ፥ ዳዊታ ናኣ፥ የሩሳላመን ካዎትዳ ጭንጫ ኡራ ቃላ።

² ሄ ጭንጫይ፥ “ኡባባይ ሀዳ፤ ኡባባይ ሀዳፐ ሀዳ፤ ኡባባይ ኩመ ሀዳ” ያግስ።

³ ባ ደእያ በሳን ኡባን፥ አስ ዳቡርድ ኦያባ ኡባን እያዉ ዎይ አይቤ?

⁴ እስ የለተ አያ ዎደ፥ ሀራ የለተ በሳ ኦይኬስ። ሽን ሀ ቢታይ መርናዉካ ላመቶና ደኤስ።

⁵ አው ዶሌስ ዉሌስ፤ ናምአን ዶላናዉ ያ ዶልያ በሳ ኤለሴስ።

⁶ ጫርኮይ እስ ቶሆ ዱገ እስ ቶሆ ፑደ ጫርኬስ፤ ቃስ ዩይ ዩይ አድ፥ ስመረትድ ዬስ።

⁷ ጎግያ ሃ ኡባይ አባን ገሌስ፤ ሽን አባይ ኩም ኤረና። ሄ ሃይ ስሚድ ጎጋናዉ፥ ጉየ ባ ፑልትያ በሳ ቤስ።

⁸ ኡባባይ ሳለያባ፤ እ አይ መላ ሳለያኮ ኦድ ዉርሳናዉ ዳንዳኤተና። አይፈይ ፄልድ ካል ኤረና፤ ሀይ ስእድ፥ ታዉ ግድስ ጌና።

⁹ ካሰ ሀንዳባይ ዎንቶካ ስሚድ እ ሀናና፤ ቃስ ሀእ ሀንሸ ደኤይስ ካሰ ሀንዳባ። ሄሳ ግሾ፥ ሳሎ ጉፋንን ኦራባይ አይብካ ባዋ።

¹⁰ ኦንካ፥ “ሄኮ፥ ሀይስ ኦራባ” ጊኮ፥ ሄስ ኦራ ግደና፤ ሄስ ኑኒ የለታናፐ ካሰ ሀንዳባ።

¹¹ ካሰ አዳ ዎደታን ሀንዳባታ ዛሪድ ሀሳያባይ ባዋ፤ ጉየፐ ሀናናባታ ኤንታፈ ጉየ ኦንካ ሀሳየና።

ጭንጫተ ሀዳ

¹² ታኒ ጭንጫይ፥ የሩሳላመን እስራኤለስ ካዎ ግዳዳ ደአስ።

¹³ ታኒ ሳአን ደእያባ ኡባ ሻካዳ ኤራናዉነ ጭንጫተን ፕልጋዳ ፄላናዉ ቆፋ ቃቻስ። ያታዳ አሳ ኡባስ ፆሳይ እምዳ ደኦይ ዳሮ ዳቡርስያባነ ኡፋይሶናባ ግደይሳ አኬካስ።

¹⁴ ሳሎፐ ጋርሳን ሀንዳባ ኡባ ታኒ በአስ፤ ሽን ኡባይካ ሀዳ፤ ጫርኮ ኦይካናዉ የደይሳ መላ።

¹⁵ ጌል ሱራናዉ ዳንዳኤና፤ ባይናባ ታይባናዉ ዳንዳኤተና።

¹⁶ ታኒ ታ ዎዛናን ሀይሳዳ ያጋዳ ቆፓስ፤ “ታፐ ካሰ የሩሳላመ ሃርዳ ኡባታፐ ታኒ ግታነ ጭንጫ ግዳስ። ጭንጫተነ ኤራ ጉስ እ አይበኮ ፓጫዳ ኤራስ” ያጋስ።

¹⁷ ታኒ ጭንጫተፈ፥ ጎሻተፈነ ኤያተፈ ግዶን ደእያ ዱማተ አይበኮ ኤራናዉ ዳሮ ዳቡራስ። ሽን ዉርሰን ሄስካ ጫርኮ ኦይካናዉ የደይሳ መላ ሀዳ ግደይሳ ኤራስ።

¹⁸ ጭንጫተ ዳርያ ዎደ አዛንያባይ ዳሬስ፤ ኤር ዳርያ ዎደ ቃስ መቶይ ዳሬስ።