Daanela 5 - ጌሻ ማፃፋ

ካዋ ብልፃሶራ ግብራ

¹ እስ ጋላስ ካዎይ ብልፃሶር ሙኩሉ ግድያ ባ ሹማታስ ግብራ ጊግስድ፥ ኤንታራ እስፈ ዎይነ ኡሻ ኡይስ።

² ብልፃሶር ዎይነ ኡሻ ኡይድ ማትዳ ዎደ፥ እያ አዋይ ናቡካዳናፆር የሩሳላመን ደእያ ፆሳ ኬፈ ኤህዳ ዎርቃፈነ ብራፐ ኦሰትዳ ኡሻ ሚሸታ ኤሀና መላ ኪትስ። እ ሄሳ ኦዳይ እ፥ እያ ሹማታስ፥ እያ ማቸትነ እያ ላገት ኡሻ ሄ ሚሸታን ኡያናዉ ኮይዳ ግሾሳ።

³ ኤንቲ የሩሳላመን ደእያ ፆሳ ኬፈ ኤህዳ ዎርቃፈ ኦሰትዳ ኡሻ ሚሸታ ካዋስ ኤህዶሶና። ያትን ካዎይ፥ እያ ሹማት፥ እያ ማቸትነ እያ ላገት ሄ ሚሸታን ትገትዳ ዎይነ ኡሻ ኡይዶሶና።

⁴ ኤንቲ ሄ ዎይነ ኡሻ ኡይሸ፥ ዎርቃፈ ብራፐ፥ ናሰ ብራታፐ፥ ብራታፐ፥ ምፈነ ሹቻፈ ኦሰትዳ ፆሳታ ጋላትዶሶና።

⁵ ሄ ዎደ ቆፖና ደእሽን፥ አሳ ኩሸ ብራት ከይድ፥ ፆምፐ ዎያ ኮጫ ስንን፥ ሜሸትዳ ካዎ ጋ ጎዳ ቦላ ፃፍዶሶና። ሄ ኩሸይ ፃፍያ ዎደ ካዎይ በእስ።

⁶ ሄ ዎደ እያ ሶምኦይ ላመትድ፥ ብዶ ግድስ፤ ያሻን እያ ጋደይ ኮኮርስ፤ እያ ጉልባታይ እፅስ።

⁷ ካዎይ ባ ቃላ ቁ ኦድ፥ ሙራንቾታ፥ ማሮታነ ፆልንቶ ፓይደይሳታ ኤሀና መላ ኪትስ። እ፥ ባብሎነ ጭንጫታኮ ሀይሳዳ ያግስ፦ “ሀ ፁፍያ ናባብድ፥ እያ ብርሸ ታዉ ኦድያ ኦንካ፥ ኦቻ ቴራ ዳንያ ማኡዋ ማአና፤ እያ ቆን ዎርቃ አና፤ እ፥ ታ ካዎተ ሃርያ ሄን አስ ግዳና” ያግስ።

⁸ ባብሎነ ጭንጫት ኡባይ እያ ስን ይዶስና፤ ሽን ኤንታፈ ኦንካ ሄ ፁፍያ ናባባናዉ ዎይኮ እያ ብርሸ ኦዳናዉ ዳንዳእቤና።

⁹ ካዎይ ብልፃሶር ካሰይሳፈ አድ ዳጋምን፥ እያ ሶምኦይ ካሰይሳፈ አድ ብዶ ግድስ። እያ ሹማት ሀንያባ ይዶሶና።

¹⁰ እያ አይያ፥ ካዋነ እያ ሹማታ ፓላማ ስአዳ፥ ኤንቲ ግብራ ምያ ኬ ገላዳ፥ ሀይሳዳ ያጋሱ፦ “ካዋዉ፥ መርናዉ ካዎታ! ሀ ቆፋን ዳሮ ዳጋሞፋ፤ ነ ሶምኦይ ላመቶፎ።

¹¹ ጌሻ ፆሳታ አያን እያ ቦላ ደእያ፥ እስ አስ ነ ካዎተ ግዶን ደኤስ። እያዉ ኤራተ፥ አኬክነ ጭንጫተ ደኤስ። ካሰ ነ አዋይ፥ ካዎይ ናቡካዳናፆር እያ፥ ማሮታ፥ ሙራንቾታ፥ ብታንቾታነ ፆልንቶ ፓይደይሳታ ሀላቃ ኦድ ሹምስ።

¹² እ፥ ሎኦ አያን፥ ኤርነ አኬክ ደእያ አሰ። እ አሙሆ ብርሻናዉ፥ ቃንእሸ ኦዳናዉነ ፁራ ቆንጭሳናዉ ዳንዳኤስ። ካዎይ ብልፃሶራ ግድ ሱንዳ ዳነላ ፄጋ። እ ነዉ ፁፍያ ብርሸ ኦዳና” ያጋሱ።

¹³ ሄ ዎደ ዳነላ ካዋኮ ኤህን፥ ካዎይ እያኮ ሀይሳዳ ያግስ፦ “ዳነል ነኔ? ታ አዋይ፥ ካዎይ ይሁዳፐ ድእድ ኤህዳይሳታፐ እሶይ ነኔ?

¹⁴ ፆሳታ አያን ነናን ደኤይሳ፥ ኤር፥ አኬክነ ጭንጫተ ነዉ ደኤይሳ ታ ስአስ።

¹⁵ ሀ ፁፍያ ናባባናዉነ እያ ብርሸ ታዉ ኦዳናዉ ሙራንቾትነ ጭንጫት ይዶሶና፤ ሽን ኤንቲ ታዉ ብርሸ ኦዳናዉ ዳንዳእቦኮና።

¹⁶ ኔኒ ብርሸ ኦዳናዉነ ዴፆ ኦይሻ ኡባ ዛራናዉ ዳንዳኤይሳ ታ ስአስ። ህዛ ነ ሀ ፁፍያ ናባባናዉነ እያ ብርሸ ታዉ ኦዳናዉ ዳንዳእኮ፥ ኦቻ ቴራ ዳንያ ማኡዋ ማይዛና፤ ነ ቆን ዎርቃ አና፤ ኔኒ፥ ካዎተ ሃርያ ሄን አሰ ግዳና።”

¹⁷ ዳነል ካዋስ ዛሪድ፥ “ነ እሞይ ነዉ ግዶ፤ ነ ዎይቱዋ ሀራ አሳስ እማ። ግዶሽን፥ ታኒ ፁፍያ ካዋስ ናባባና፤ ብርሸካ ኦዳና።”

¹⁸ “ካዋዉ፥ ኡባፈ ቃ ፆሳይ ነ አዋ ናቡካዳናፆራስ ካዎተ፥ ግታተ፥ ቦንቾነ ቴማ እሚስ።

¹⁹ እያ ግታተ ጋሶን ደረይ፥ ካዎተትነ ዱማ ዱማ ዶናን ኦደትያ ኮቻት እያዉ ያሻን ኮኮርዶሶና። እ ዎናዉ ኮየይሳ ዎስ፤ አሻናዉ ኮየይሳ አሼስ፤ ሹማናዉ ኮየይሳ ሹሜስ፤ ካዉሻናዉ ኮየይሳ ካዉሼስ።

²⁰ ሽን እ ኦቶርትዳ ዎደነ እያ ዎዛናይ ሙምዳ ዎደ፥ ባ አራታፐ ዎስ፤ እያ ቦንቾይካ ቃረትስ።

²¹ አሳ ግዶፈ ጎደትስ፤ እያ ካሀይ ላመትን ዶአ ግድስ። ቦራዳ ማታ ምሸ ደምባ ሀረታራ እስፈ ደእስ። እያ አሳተይ ሳሎ አካን ላክስ። ሄስ ሀንዳይ፥ ኡባፈ ቃ ፆሳይ አሳ ናይታ ካዎተ ኡባ ሃረይሳነ ባ ኮይዳይሳስ እመይሳ እ ኤራና መላሳ።

²² “ሽን ብልፃሶራ፥ ኔኒ እያ ናአይ፥ ሀ ኡባ ኤራሸ ነ ነናተ ካዉሻባካ።

²³ ቃስ ሳሎ ጎዳ ቦላ ኦቶርታዳ፥ ነናተ ቁ ቁ ኦዳሳ። እያ ኬፈ ቦንቀትድ ይዳ ዎርቃ ሚሸታን ኔኒ፥ ነ ሹማት፥ ነ ማቸትነ ነ ላገት፥ ዎይነ ኡሻ ኡይደታ። ቃስ ፄላናዉ፥ ስአናዉነ ኤራናዉ ዳንዳኦና ብራፐ፥ ዎርቃፈ፥ ናሰ ብራታፐ፥ ብራታፐ፥ ምፈነ ሹቻፈ ኦሰትዳ ፆሳታ ጋላትደታ። ነ ደኡዋነ ነ ኦግያ ባ ኩሸን ኦይክዳ ፆሳ ቦንቻባካ።

²⁴ ሄሳ ግሾ፥ ኩሸ ብራት እያፐ ኪተትን፥ ሀ ፁፈይ ፃፈትስ።

²⁵ “ፁፈይ፥ ‘ማነ፥ ማነ፥ ተቀል፥ ፓረስ’ ያጌስ።

²⁶ “አራምከ ዶናን እያ ብርሸይ ሀይሳ። ማነ፦ (ታይበትስ) ‘ፆሳይ ነ ካዎታ ላይ ታይብድ ዉራናዳ ኦስ’ ጉሱ።

²⁷ ተቀል፦ (ማዛነትስ) ‘ምዛነን ማዛነታዳ፥ ካዉያዳ በንታዳሳ’ ጉሱ።

²⁸ ፓረስ፦ (ሻከትስ) ‘ነ ካዎተይ ሻከትድ ሜዶናስነ ፋርሰስ እመትስ’ ” ጉሱ።

²⁹ ሄ ዎደ፥ ብልፃሶራ ኪታን፥ ኦቻ ቴራ ዳንያ ማኡዋ ዳነላ ማይዝዶሶና፤ እያ ቆን ዎርቃ አዶሶና፤ ቃስ ካዎተ ሃርያ ሄን አስ ግዳና መላ አዋጅዶሶና።

³⁰ ሄ ዎደ ቃማ ሞርከት ገልድ፥ ባብሎነ ካዋ ብልፃሶራ ዎዶሶና።

³¹ እያ ካዎተ፥ ላይ ኡሱፑን ታማነ ናምአ ግድዳ ሜዶና አደይ ዳርዮስ ኤክስ።