Daanela 2 - ጌሻ ማፃፋ

ናቡካዳናፆራ አሙሁዋ

¹ ናቡካዳናፆር ካዎትዳ ናምአን ላይን አሙሆ አሙህስ። ሄ አሙሆይ እያ ዳጋንን፥ ስኮይ እያ ኤኮና እፅስ።

² ሄሳ ግሾ፥ እ አሙህዳ አሙሁዋ እያዉ ኦዳና መላ ማሮት፥ ብታንቾት፥ ሙሩነይሳትነ ፆልንቶ ታይበይሳት ያና መላ ካዎይ ኪትስ። ኤንቲ ይድ እያ ስንን ኤቅዶሶና።

³ ካዎይ ኤንታኮ፥ “ታና ዳጋንያ አሙሆ አሙሀስ፤ ሄ አሙሆይ አይበኮ ኤራናዉ ኮያይስ” ያግስ።

⁴ ፆልንቶ ታይበይሳት ሶረ ዶናን፥ “ካዋዉ፥ መርናዉ ካዎታ! ነ አሙሁዋ ኑስ ነ አይለታስ ኦዳ፤ ኑ ነዉ እያ ብርሸ ኦዳና” ያግዶሶና።

⁵ ካዎይ ኤንታኮ፥ “ህንተ ሀ አሙሁዋነ እያ ብርሸ ታና ኤርሶና እፅኮ፥ ታ ህንተና ቃንፃና፤ ህንተ ኬይ ቡረ የግያ በሲ ግዳናይሳ ታ ህንተዉ ምንዳ ኦዳይስ።

⁶ ሽን ህንተ አሙሁዋነ እያ ብርሸ ታዉ ኦድኮ፥ እሞታ፥ ዎይቶነ ዳሮ ቦንቾ ታፐ ደማና። ሄሳ ግሾ፥ አነ አሙሁዋነ እያ ብርሸ ታና ኤርስተ” ያግስ።

⁷ ኤንቲ ዛሪድ፥ “ካዎይ አሙሁዋ ኑስ ባ አይለታስ ኦዶ፤ ኑ እያ ብርሸ ኤርሳና” ያግዶሶና።

⁸ ካዎይ ዛሪድ፥ “ታ ምኖ ቆፋ ህንተ ኤርያ ግሾ ዎደ አዱሳናዉ ህንተ ኮየይሳ ታ ኤራይስ።

⁹ ህንተ አሙሁዋ ታዉ ኦዶና እፅኮ፥ እስ ፕርድ ህንተና ናጌስ። ሀኖታይ ላመታና ግድ ህንተ ኡፋይስ ኦያ ግሾ ታዉ ዎርዶነ ገነ ቃላ ኦዳናዉ ማቀትደታ። ሄሳ ግሾ፥ አሙሁዋ ታዉ ኦድተ። ያትኮ፥ ህንተ እያ ብርሸ ኤርሳናዉ ዳንዳኤይሳ ታ ኤራና” ያግስ።

¹⁰ ፆልንቶ ታይበይሳት ዛሪድ፥ “ካዎይ ኦይችያ ኦይሻ ዛራናዉ ዳንዳእያ እስ አስካ ቢታን ባዋ። አይ ግታነ ዎልቃማ ካዎይ ማሮታ፥ ብታንቾታነ ፆልንቶ ታይበይሳታ ሄሳ መላባ ኦይችድ ኤረና።

¹¹ ካዎይ ኦይችዳ ኦይሾይ ዴፆ፤ አሳ ግዶን ዶና ፆሳታፐ አትሽን፥ ሄሳ ካዋስ ቆንጭሳናዉ ዳንዳኤይ ባዋ” ያግዶሶና።

¹² ካዎይ ዳሮ ይሎትድ፥ ባብሎነን ደእያ ጭንጫታ ኡባ ዎናዳ ኪትስ።

¹³ ጭንጫታ ዎናዉ አዋጆይ ከይስ፤ ዳነላነ እያ ላገታ ዎናዉ አስ ኪተትስ።

¹⁴ ካዋ ናገይሳታ ሀላቃይ አርዮክ፥ ባብሎነን ደእያ ጭንጫታ ዎናዉ ከይያ ዎደ ዳነል እያ ጭንጫተንነ ሂላን ኦድስስ።

¹⁵ እ ካዋ ናገይሳታ ሀላቃ አርዮካ፥ “ካዎይ ሀይሳ መላ ኢታ አዋጆ አይስ ከስዴ?” ግድ ኦይችስ። አርዮክ ሀኖታ ዳነላስ ኦድስ።

¹⁶ ዳነል ካዋኮ ገልድ፥ አሙሁዋ ብርሸ ኤርሳናዉ ባዉ ዎደይ እመታና መላ ዎስስ።

¹⁷ ሄሳፈ ጉየ ዳነል ባ ሶ ስሚድ፥ ባ ሄ ላገታስ፥ አናንያስ፥ ምሳኤላስነ አዛርያስ ሀኖታ ኦድስ።

¹⁸ ኤንቲ ባብሎነን ደእያ ሀንኮ ጭንጫታራ እስፈ ሀይቆናዳ፥ ሳሎ ፆሳይ ማሮታ ኦድ፥ ሀ ፁራ ኤንታዉ ቆንጭሳናዳ ዎሳና መላ ኤንታዉ ኦድስ።

¹⁹ ሄ ቃማ ፁራይ ዳነላስ ቆንጭስ። ዳነል ሳሎ ፆሳ ሀይሳዳ ያግድ ጋላትስ፤

²⁰ “ጭንጫተነ ዎልቅ ፆሳሳ ግድያ ግሾ፥ እያ ሱንይ መርናፐ መርና ጋካናዉ ጋላተቶ።

²¹ እ ዎደታነ አጌናታ ላሜስ፤ ካዎታ አራታን ኡትሴስ፤ አራታፐ ድጌስ። ጭንጫታስ ጭንጫተ እሜስ፤ አኬካንቾታስ ኤራ እሜስ።

²² እ ፁራነ ጌምዳባ ቆንጭሴስ፤ እ ማን ደእያባ ኤሬስ፤ ፖኦይ እያራ ደኤስ።

²³ ታ ማይዛታ ፆሳዉ፥ ታ ነና ጋላታይስ፤ ሳባይስ። ነ ታዉ ጭንጫተነ ዎልቃ እማዳሳ፤ ኑኒ ነና ኦይችዳባ ታና ኤርሳዳሳ፤ ካዋ አሙሁዋ ኑና ኤርሳዳሳ” ያግስ።

ዳነል አሙሆ ብርሽስ

²⁴ ሄሳፈ ጉየ፥ ዳነል ባብሎነን ደእያ ጭንጫታ ዎሳናዉ ካዉዋፐ ኪታ ኤክዳ፥ አርዮካኮ ብድ፥ “ጭንጫታ ዎፓ፤ ታና ካዋኮ ገልሳ፤ ታኒ እያ አሙሁዋ ብርሸ እያ ኤርሳና” ያግስ።

²⁵ አርዮክ ኤለስድ ዳነላ ካዋኮ ገልስድ፥ ካዋኮ፥ “ይሁዳፐ ድኤትድ ይዳ አሳፐ ካዋ አሙሁዋ ብርሸ ኤርሳናዉ ዳንዳእያ አሰ ደማስ” ያግስ።

²⁶ ካዎይ ብልፃሶራ ጌተትያ ዳነላ፥ “ታ አሙህዳ አሙሁዋነ እያ ብርሸ ታና ኤርሳናዉ ዳንዳአይ?” ግድ ኦይችስ።

²⁷ ዳነል ሀይሳዳ ያግድ ዛርስ፦ “ካዋዉ፥ ነ ኦይችዳ ፁራ ቆንጭሳናዉ ዳንዳእያ ጭንጫ አስ፥ ማሮይ፥ ብታንቾይነ፥ ሙሩንያ አስ ባዋ።

²⁸ ሽን ፁራ ቆንጭስያ እስ ፆሲ ሳሎን ደኤስ። ዉርሰ ዎደታን ሀናናባ እ፥ ነና በስስ። ነ አርሳን ዝንአዳ፥ ነ በእዳ አሙሆይነ ቆንጨይ ሀይሳ።

²⁹ “ካዋዉ፥ ነ አርሳን ዝንአዳ፥ ስንፈ ያናባ ቆፓዳሳ። ሄ ዎደ ፁራ ቆንጭስያ ፆሳይ ስንፈ ሀናናባ ነና በስስ።

³⁰ ሀ ፁራይ ታዉ ቆንጭዳይ፥ ታ ሀራ አሳፐ ጭንጫ ግድዳ ግሾ ግደና። ሽን ኔኒ ካዎይ፥ አሙሁዋ ብርሸ ኤራናዳነ ነ ሁጰን ስመረትያ ቆፋ አኬካና መላሳ።

³¹ “ካዋዉ፥ ነ ዳሮ ግታ፥ ጶልያነ ፄላናዉ ያሽያ ምስለይ ነ ስንን ኤቅዳይሳ በአዳሳ።

³² ሄ ምስልያ ሁጰይ፥ ዋላህ ባይና ዎርቃፈ፥ እያ ትራይነ ኩሸት ብራፐ፥ ኡሎይነ ዎድረት ናሰ ብራታፐ፥

³³ ሱይለይ ብራታፐነ ቶሆ ያቻ ባጋይ ብራታፐ ባጋይ ቢታፈ መትስ።

³⁴ ኔኒ ምስልያ ፄልያ ዎደ፥ እስ ሹች አሳ ኩሸይ ቦቾና ቆለትድ፥ ብራታፐነ ቢታፈ መትዳ ምስልያ ቶሆ ያቻ ቦላ ዎድ ጋጭስ።

³⁵ ሄ ዎደ ብራት፥ ኡርቅ፥ ናሰ ብራታይ፥ ብርነ ዎርቀይ ኡባይ ጋጨትድ፥ ቦነን ዉዱማን ደእያ ሱላ መላ ግድን፥ አይኮይካ አቶናሽን ጫርኮይ ፕትድ ኤፍስ። ሽን ምስልያ ቦላ ዎዳ ሹቻይ ዙማ ግድድ ሳኣ ኩምስ።

³⁶ “አሙሆይ ሀይሳ፤ ሀእ ብርሸ ኑኒ ነዉ ኦዳና።

³⁷ ካዋዉ፥ ኔኒ ካዎታ ካዎ። ሳሎ ፆሳይ ነዉ ካዎተነ ዎልቃ፥ ምኖተነ ቦንቾ እሚስ።

³⁸ ኔኒ ቢታ ኡባ ሃራናዳ ኦስ፤ አሰ፥ ዶአነ ሳሎ ካፎ ነ ኩሸን ዎስ። ሄሳ ግሾ፥ ዎርቃ ሁጰይ ነና።

³⁹ “ኔፐ ጉየ፥ ምኖተን ነና ጋኮና ሀራ ካዎተ ደንዳና። ካልድ፥ ቢታ ኡባ ሃርያ፥ ናሰ ብራታ ግድያ፥ ሄን ካዎተ ደንዳና።

⁴⁰ ዉርሰን ኡባ ጋጭድ ሊቅስያ ብራታዳ ምንዳ ኦይዳን ካዎተ ደንዳና። ብራት ኡባ ጋጭድ ሊቅሰይሳዳ እ፥ ባፐ ካሰ ደንድዳ ካዎተታ ጋጭድ ሊቅሳና።

⁴¹ “ቶሆትነ ቶሆ ብራት ባጋይ ብራታፐ፥ ባጋይ ቢታፈ መትዳይሳ ነ በእዳይሳዳ፥ ሄ ካዎተይ ሻከትዳ ካዎተ ግዳና። ብራት ቢታራ ዋላከትን፥ ኔኒ በእዳይሳዳ ባጋይ ብራታዳ ምኖ ግዳና።

⁴² ቶሆ ብራት ባጋይ ብራታ፥ ባጋይ ቢታ ግድዳይሳዳ፥ ሀ ካዎተስ ባጋይ ምኖ፥ ባጋይ ሹጎ ግዳና።

⁴³ ብራት ቢታራ ዋላከትን ኔኒ በእዳይሳዳ ሄ ናምኡ ባጋ አሳይ ገሎንነ ኤኮን ዋላከታና። ሽን ብራት ቢታራ ዋላከታናዉ ዳንዳኦናይሳዳ ኤንቲ እስኖ ግድድ ጋምአናዉ ዳንዳኦኮና።

⁴⁴ “ሄ ካዎታ ላይን፥ ሳሎ ፆሳይ ኩንዶና፥ ሀራ አሳስ አድ እመቶና ካዎተ ኤሳና። ሄ ኤቅዳ ካዎተይ፥ ሄ ካዎተታ ኡባ ጋጭድ ይሳና፤ ሽን እ መርናዉ ኤቅድ ዳና።

⁴⁵ አሳ ኩሸይ ቦቾና ዙማፐ ቆለትድ፥ ዎድ፥ ብራታፐ፥ ናሰ ብራታፐ፥ ቢታፈ፥ ብራፐነ ቢታፈ መትዳ ምስልያ ጋጭዳ ሹቻ ብርሸይ ሄ ካዎተ። “ግታ ፆሳይ ስንፈ ሀናናባ ካዋ በስስ። አሙሆይ ቱማ፤ ብርሸይካ አማነትዳይሳ” ያግድ ዛርስ።

⁴⁶ ሄሳፈ ጉየ፥ ካዎይ ናቡካዳናፆር ዳነላ ቦንችድ፥ ጉፋንስ፤ አሳይ እያ ስንን ያርሾ ያርሻና መላነ እፃነ ጩይሳና መላ ኪትስ።

⁴⁷ ካዎይ ዳነላ፥ “ቱማ ነ ፆሳይ ፆሳታ ፆሰ፥ ካዎታ ጎዳነ ፁራ ቆንጭስያ ፆሰ። ኔኒ ሀ ፁራ ቆንጭሳናዉ ዳንዳእዳይ ሄሳ ግሾሳ” ያግስ።

⁴⁸ ሄሳፈ ጉየ፥ ካዎይ ዳነላ አድ ቦንችስ፤ ዳሮነ አልኦ እሞታታ እያዉ እሚስ። ባብሎነ ቢታ ሃርያ አሰ ኦስ፤ ባብሎነን ደእያ ጭንጫታ ኡባ ቦላ ሀላቃ ኦድ ሹምስ።

⁴⁹ ዳነል ኦይሻን፥ ካዎይ ስድራቃ፥ ምሳቃነ አብዳናጎ ባብሎነ ቢታ አይሰይሳታ ኦድ ሹምስ፤ ሽን ዳነል ካዎ ኬን ጋምእስ።