Daanela 12 - ጌሻ ማፃፋ

ዎደ ዉርሰ

¹ “ሄ ዎደ ነ አሳ ናግያ ግታ ሀላቃይ፥ ምካኤል ደንዳና። ካዎተ መትዳ ዎድያፐ ዶምድ፥ ሀን ኤሮና መቶ ዎደይ ያና። ግዶሽን፥ ኤንታ ሱንይ ፆሳ ማፃፋን ፃፈትዳ ነ አሳ ኡባይ ሄ ዎደ አታና።

² ሀይቅዳ አሳፐ ዳሮት ደንዳና። ኤንታፈ ባጋት መርና ደኦስ፥ ባጋት ቃስ ዬላስነ መርና ካዉሻስ ደንዳና።

³ ጭንጫት ሳሎ ፖኦዳ ቃስ ዳሮታ ፅሎተ ኦገ ካለይሳት መርናዉ ፆልንቶዳ ፖአና።

⁴ ሽን ነኖ ዳነላ፥ ነ ዉርሰ ዎደይ ጋካናዉ፥ ሀ ማፃፋ ጎርዳዳ፥ ማታመ ዎ። ዳሮት ኤራተ ደማናዉ ያነ ሃነ ዎፀረታና” ያግስ።

⁵ ታኒ፥ ዳነል፥ ናምኡ አሳታ፥ እሶይ ሻፋፐ ሀፍን፥ እሶይ ሻፋፐ ሄፍንን ኤቅዳይሳታ በአስ።

⁶ ኤንታፈ እሶይ ሊኖ ማእድ፥ ሻፋፐ ቦላ ባጋራ ኤቅዳ ኪታንቹዋ፥ “ሀ ማላታት ፖለታናዉ አይ መላ ዎደ ጋምአኔ?” ያግድ ኦይችስ።

⁷ ሊኖ ማእድ፥ ሻፋፐ ቆሞ ባጋራ ኤቅዳ ኪታንቾይ፥ ባ ኡሻቻ ኩሽያነ ባ ሀድርሳ ኩሽያ ሳሎ ደንድ፥ መርናዉ ደኤይሳ ሱንን ሀይሳዳ ያግድ ጫቅስ፦ “ሀይስ፥ ዎደይ፥ ዎደትነ ዎደ ባጋይ ጋካናዉ ጋምአና፤ ጌሻ አሳታ ዎልቃይ ዉርያ ዎደ ሀ ኡባይ ፖለታና” ያግስ።

⁸ ሀ ኡባ ታኒ ስአስ፥ ሽን ታዉ ገልቤና። ያትን፥ ታኒ፥ “ታ ጎዳዉ፥ ሀ ኡባስ ዉርሰይ አይ ግዳንዴ?” ጋዳ ኦይቻስ።

⁹ እ ዛሪድ፥ “ዳነላ፥ ሀ ቃላይ ዉርሰ ዎደይ ጋካናዉ ጎርደትዳነ አታመትዳ ግሾ ኔኒ ባ፤

¹⁰ ዳሮት ፓጨትድ ከያና፥ ጌያናነ ቦረይ ባይናይሳታ ግዳና፤ ሽን ኢታት፥ ኢታባ ኦና። ኢታታፐ እስ አስካ አኬከና፤ ሽን ጭንጫት አኬካና።

¹¹ “ጋላስ ጋላስ ያርሸትያ ያርሾይ ድገትዳፐነ ዮ ቱናተይ ሄ በሳን ኤቅዳፐ ስምን፥ 1,290 ጋላስ።

¹² ገንጭድ 1,335 ጋላስ ጋካናዉ ናግያ አስ አንጀትዳይሳ።

¹³ “ኔኒ ዉርሰ ጋካናዉ ባ። ነ ሸምፓና፤ ዉርሰን ነና ጋክያ ላታ ኤካናዉ ደንዳና” ያግስ።